جەر تەلىمدەرىن عارىشتان باقىلاۋ ءتيىمدى بولا ما؟

 نۇر- سۇلتان. قازاقپارات - ق ر اۋىل شارۋاشىلىعى مينيسترلىگى اۋىل شارۋاشىلىعى جەرلەرىنە مونيتورينگ جۇرگىزۋگە ارنالعان عارىش سەرىكتەرىنىڭ مۇمكىندىكتەرىن قولدانۋدى قامتاماسىز ەتۋگە باعىتتالعان قوسالقى زاڭدارعا تۇزەتۋ ەنگىزبەك.

 قازاقستاندا وسىنداي جەرلەردىڭ جالپى اۋدانى -  202 ميلليون گەكتار، سونىڭ ىشىندە 105,2 ميلليون گەكتار اۋىل شارۋاشىلىعى اينالىمىندا. جەر پايدالانۋدا ۇزاق ۋاقىت پايدالانىلمايتىن نەمەسە ءتيىمدى پايدالانىماي كەلگەن جەرلەر كوپ. جەر كودەكسى پايدالانىلمايتىن نەمەسە ۇتىمسىز پايدالانىلاتىن اۋىل شارۋاشىلىعى القاپتارىن جوسىقسىز جەر پايدالانۋشىلاردان قايتارىپ الۋدى قاراستىرادى. وسىنداي جەر پايدالانۋشىلارعا قاتىستى مەملەكەت زاڭ بۇزۋشىلىق انىقتالعان ساتتەن باستاپ جەر سالىعىنىڭ مولشەرلەمەسىن 10 ەسە ارتتىرىپ، ەكونوميكالىق اسەر ەتۋ شارالارىن قولدانادى. جەر ينسپەكتورلارىنىڭ شەكتەۋلى شتاتى، جوعارى سىبايلاس جەمقورلىق تاۋەكەلدەرى جانە جۇرگىزىلەتىن مەملەكەتتىك باقىلاۋدىڭ اۆتوماتتاندىرىلماعانى ونى ءتيىمسىز ەتەدى، ويتكەنى بارلىق جەر ۋچاسكىلەرىن قامتۋ قاراستىرىلماعان. جەر القاپتاردىڭ تاپشىلىعى، قولدانۋسىز جاتقان جەرلەردىڭ كوپتىگى حالىقتىڭ جانە اۋىل شارۋاشىلىعى ءوندىرىسىن دامىتقىسى كەلەتىن كاسىپكەرلەردىڭ نارازىلىعىن تۋدىرۋدا.  وسىعان بايلانىستى «اتامەكەن» سيفرلىق تەحنولوگيالار مەن ادىستەردى قولدانا وتىرىپ، جوسىقسىز جەر پايدالانۋشىلارعا قاتىستى باقىلاۋدى كۇشەيتۋ قاجەتتىلىگىن قولدايدى. وسى رەتتە ۋاكىلەتتى ورگان ۇسىنىپ وتىرعان تۇزەتۋلەرگە قاتىستى بيزنەس- قوعامداستىقتىڭ كوپتەگەن سۇراقتارى مەن ەسكەرتپەلەرى بار.

 «اۋىل شارۋاشىلىعى جەرلەرىن ءتيىمدى پايدالانۋ وتە وزەكتى. اوك كوميەتىندە اۋىل شارۋاشىلىعى جەرلەرىنە مونيتورينگ جۇرگىزۋدە عارىش تۇسىرىلىملەرىن قولدانۋ ماسەلەسىن تالقىلادىق. جالپى العاندا ءبىز پايدالانىلمايتىن جەرلەردى انىقتاۋعا ارنالعان وزىق ادىستەردى قولدانۋدى قولدايمىز. وسى رەتتە ءىسىن ادال جۇرگىزەتىن جەر پايدالانۋشىلاردان جەردى تاركىلەۋدى بولدىرتپايتىن ولارعا كىناسىزدىگىن دالەلدەۋ ءۇشىن سوتقا جۇگىنۋگە ماجبۇرلەتپەيتىن مەحانيزمدى ازەرلەۋ قاجەت»، -  دەدى يۆان ساۋەر.

ۇلتتىق كاسىپكەرلەر پالاتاسى اۋىل شارۋاشىلىعى جەرلەرىن ءتيىمدى پايدالانۋ بويىنشا قولدانىستاعى كريتەريلەردى قاتاڭداتۋدى قاراستىراتىن جەكەلەگەن تۇزەتۋلەرگە رەتتەۋشىلىك اسەر تالداۋىن جۇرگىزۋدى تالاپ ەتتى. ونىڭ ءبىرى -  فەرمەردىڭ گەواقپاراتتىق پورتالدا القاپتار مەن جايىلىمداردىڭ كىتابىن جۇرگىزۋ مىندەتى، بۇل قىزمەت اقىلى تۇردە جۇرگىزىلەتىن بولادى. اۋىل شارۋاشىلىعى جەرلەرىنىڭ پايدالانۋىنا باقىلاۋ وكىلەتتى ورگاننىڭ تىكەلەي فۋنكتسياسى بولعاندىقتان «اتامەكەن» جەرلەردى پايدالانۋعا مونيتورينگ جۇرگىزۋ شەڭبەرىندە فەرمەرلەرگە پورتال سەرۆيستەرىن پايدالانۋ اقىسىز بولۋى كەرەك دەپ سانايدى. ءارتۇرلى ادىستەر مەن قۇرالداردى قولدانا وتىرىپ، جەر ۋچاسكەسىن پايدالانۋدىڭ كەشەندى تالداۋ قورىتىندىسى بويىنشا جەردى قايتارىپ الۋ تۋرالى شەشىم وبەكتيۆتى قابىلدانۋى كەرەك.

Massaget.kz