+7 (701) 759 90 19
-3 °С : نۇر-سۇلتان
-1 °С : الماتى
USD 384.97 EUR 427.12
RUB 6.04 CNY 54.75
جاڭالىقتار

سەناتور كوكشەتاۋ ماڭىنداعى «نۇرلى كوش» تۇرعىندارىنىڭ پروبلەماسىن ايتتى

21 قاراشا 15:04
:ءبولىسۋ
سەناتور كوكشەتاۋ ماڭىنداعى «نۇرلى كوش» تۇرعىندارىنىڭ پروبلەماسىن ايتتى

نۇر- سۇلتان. قازاقپارات - كوكشەتاۋ قالاسى كراسنىي يار اۋىلدىق وكرۋگىندەگى «نۇرلى كوش» باعدارلاماسى بويىنشا ۇيلەر ساپاسىز سالىنعان.

بۇل تۋرالى سەناتور مۇرات باقتيار ۇلى ۇكىمەت باسشىسى اسقار ءماميننىڭ اتىنا جولداعان دەپۋتاتتىق ساۋالىندا ءمالىم ەتتى، دەپ حابارلايدى قازاقپارات ءتىلشىسى.


دەپۋتاتتىڭ ساۋال جولداۋىنا كوكشەتاۋ قالاسى كراسنىي يار اۋىلدىق وكرۋگىندەگى «نۇرلى كوش» باعدارلاماسى بويىنشا قىس ايلارىندا مۇلدەم تۇرۋعا جارامسىز، ساپاسىز سالىنعان ۇيلەردىڭ تۇرعىندارىنىڭ شاعىمدارى مەن وسى ماسەلەگە قاتىستى دۇنيەجۇزىلىك قازاقتاردىڭ قاۋىمداستىعىنان كوميتەتتىڭ اتىنا كەلىپ تۇسكەن حاتى نەگىز بولعان.


سەناتوردىڭ ايتۋىنشا، كراسنىي يار اۋىلدىق وكرۋگىنە قاراستى «نۇرلى كوش» تۇرعىندارىنىڭ مۇڭ- مۇقتاجىن ەستۋ ءۇشىن ءبىر توپ سەناتور وندا بيىلعى 14 - قاراشادا ارنايى ساپارمەن بارىپ قايتقان.


«ۇكىمەت 2009 -جىلى «نۇرلى كوش» باعدارلاماسىن ىسكە اسىرۋ ماقساتىندا تۇرعىن ۇيلەر سالۋ ءۇشىن رەسپۋبليكالىق بيۋدجەتتەن 1 ميلليارد 200 ميلليون تەڭگە، ياعني ءاربىر ەكى پاتەرلى ۇيگە سول كەزدەگى دوللار باعامىمەن 59 مىڭ دوللار ءبولدى. وسى قاراجاتقا 2010 -جىلى كراسنىي يار اۋىلدىق وكرۋگىندە 276 وتباسى ءۇشىن 138 ەكى پاتەرلى تۇرعىن ءۇي سالىنىپ، شەتەلدەردەن كوشىپ كەلگەن قانداستارىمىزعا پايدالانۋعا بەرىلگەن. كەشەندەگى ۇيلەردىڭ قابىرعالارى جوعارىدا ايتىلعان قوماقتى قارجى بولىنە تۇرا سولتۇستىكتىڭ 40 گرادۋس قىسىنا مۇلدەم شىداس بەرمەيتىن گيپسوكارتون، پەنوپلەكس، پانەلدەن، پەسكوبلوكتان سالىنعان»، - دەدى دەپۋتات سەناتتىڭ جالپى وتىرىسىندا.


ونىڭ سوزىنە قاراعاندا، ۇيلەردىڭ قابىرعالارى وتە جۇقا، اراسى قۋىس. تۇرعىندار قىستا توڭىپ، ۇيلەرى سۋىق بولعاندىقتان تۋىستارىنىڭ ۇيىندە تۇرۋعا ءماجبۇر، كوبىسى ءارتۇرلى اۋرۋمەن اۋىرادى. ۇيلەردى قالپىنا كەلتىرۋ ءۇشىن تۇرعىندار ءوز قاراجاتىنان جىلدا جوندەۋ جۇمىستارىن جاسايدى ەكەن. سوڭعى ۋاقىتتا كەيبىر ۇيلەردىڭ توبەسى قۇلاپ، جوندەۋ جۇمىستارىن جاساۋعا مۇمكىندىكتەرىنىڭ جوقتىعى انىقتالدى. ۇيلەردىڭ كوبىسى دەرلىك اپاتتىق جاعدايدا.

«باستاپقىدا 276 وتباسى «سارى ارقا» الەۋمەتتىك- كاسىپكەرلىك كورپوراتسياسىمەن ءار ايعا 7 مىڭ تەڭگە جالعا الۋ قاراجاتىن تولەيتىن بولىپ كەلىسىمشارتقا وتىرعان. «سارى ارقا» الەۋمەتتىك- كاسىپكەرلىك كورپوراتسياسى بانكروت بولىپ، ودان كەيىن «كوكشەتاۋ قالاسىنىڭ تۇرعىن ءۇي- كوممۋنالدىق شارۋاشىلىق، جولاۋشىلار كولىگى جانە اۆتوموبيل جولدارى ءبولىم» مەكەمەسىنىڭ بالانسىنا بەكىتىلىپ، مەكەمە تۇرعىندارمەن جالعا الۋ كەلىسىمشارتىنا وتىرعانى بەلگىلى بولدى. كەشەندەگى تۇرعىن ءۇيدىڭ ورتاشا قۇنى 3 ميلليون 200 مىڭ تەڭگە بولىپ ەسەپتەلگەن. جەرگىلىكتى اكىمشىلىك پەن تۇرعىندارىنىڭ اراسىندا تۇرعىن ءۇيدى ساتىپ الۋ شارتى رەتىندە، بانكتەن نەسيە الىپ، اي سايىن 25 مىڭ تەڭگە كولەمىندە نەسيە تولەپ جانە 7 مىڭ تەڭگە جالعا الۋ قاراجاتىن تولەپ تۇرۋ كەلىسىمى دە جاسالعان. ءبىراق، تۇرعىنداردىڭ كوپشىلىگى ۇيلەرىنىڭ اپاتتىق جاعدايدا بولۋىنا بايلانىستى جانە الەۋمەتتىك جاعىنان ءالسىز توپتار قاتارىنا جاتقاندىقتان، تولەمنەن باس تارتقان. «قازاقستاننىڭ تۇرعىن ءۇي قۇرىلىس جيناق بانكى» ا ق مالىمەتىنە سايكەس، وسى كەزدە تۇرعىنداردىڭ بەرەشەگى 32 ميلليون تەڭگەنى قۇراعان»، - دەدى م. باقتيار ۇلى.

سونىمەن قاتار دەپۋتات وسى ۋاقىتقا دەيىن ولاردىڭ تۇرعىن ۇيلەرىن جەر ۋچاسكەلەرىمەن بىرگە تۇرعىنداردىڭ مەنشىگىنە بەرۋدىڭ جولدارى قاراستىرىلماعانىن ايتتى.

«سوندىقتان كەشەندەگى تۇرعىن ۇيلەردىڭ بۇگىنگى كۇنگى ناقتى باعاسىن انىقتاۋ ماقساتىندا جىلجىمايتىن مۇلىكتى باعالايتىن ارنايى كوميسسيا قۇرىپ، اپاتتىق جاعدايداعى تۇرعىن ۇيلەرگە جوندەۋ جۇمىستارىن جاساۋعا مۇمكىن ەمەس ۇيلەردىڭ تۇرعىندارىنا جەر ۋچاسكەلەرىمەن بىرگە جەكەمەنشىكتەرىنە بەرۋ جولدارىن قاراستىرۋ كەرەك. سوندا عانا بۇل ماسەلە تولىققاندى شەشىمىن تاپپاق»، - دەدى سەناتور.

اۆتور: رۋسلان عابباسوۆ


باستى سوزدەر: ايماق,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات