پۋتين: زەلەنسكيدى ەشقاشان كورمەگەنمىن
پۋتيننىڭ ايتۋىنشا، ونىڭ ۋكراينا باسشىسى ۆلاديمير زەلەنسكيمەن ەشقانداي قارىم-قاتىناسى جوق. تەلەفون ارقىلى سويلەسكەندەرى بولماسا، جەكە وزىمەن تانىس ەمەس ەكەن.
«مەنىڭ زەلەنسكيمەن قارىم-قاتىناسىم قانداي؟ ەشقانداي! مەن ونى ەشقاشان كورگەن جوقپىن، مەن ونىمەن تانىس ەمەسپىن، تەك تەلەفون ارقىلى سويلەسكەنبىز. مەنىڭ ويىمشا ول تارتىمدى ءارى شىنايى ادام»، - دەدى پۋتين «روسسيا زوۆەت!» فورۋمى بارىسىندا.
ايتا كەتەيىك، بۇعان دەيىن قازاقستاننىڭ تۇڭعىش پرەزيدەنتى نۇرسۇلتان نازاربايەۆ ۆلاديمير پۋتين مەن ۆلاديمير زەلەنسكيدىڭ كەزدەسۋىن قازاقستاندا وتكىزۋ تۋرالى ۇسىنىس بىلدىرگەن بولاتىن.
ەلباسىنىڭ پىكىرىنشە، ءبىزدىڭ ەلدىڭ اۋماعى بۇل ماسەلەگە قاتىستى نەيترالدى بولىپ كەلەدى.
سول سەبەپتى، ەكى باسشىنىڭ بەتپە-بەت كەزدەسىپ، ماڭىزدى ماسەلەلەردى تالقىعا سالۋى ءۇشىن تاپتىرماس مۇمكىندىك بولماق.
وعان قوسا، نازاربايەۆ اتالمىش ۇسىنىستى ۋكراينالىق پرەزيدەنتكە جاساعانىن ايتتى. ول ءوز كەزەگىندە قازاقستاننىڭ تۇڭعىش پرەزيدەنتىنىڭ باستاماسىنا كەلىسىمىن بەرگەن.
ۆلاديمير پۋتين دە ەلباسىنىڭ جاساعان ۇسىنىسىنا جاۋاپ بەرگەن ەدى.