نۇرلان ونەربايەۆ «اباي جولى» اۋديوكىتابىن دىبىستايدى

نۇر-سۇلتان. قازاقپارات - قازاقستاننىڭ ۇلتتىق اۋدارما بيۋروسى قازاق تىلىندەگى اۋديوكىتاپتار توپتاماسىن ازىرلەپ جاتىر، دەپ حابارلايدى قازاقپارات.

بۇل تۋرالى ۇلتتىق اۋدارما بيۋروسىنىڭ اتقارۋشى ديرەكتورى راۋان كەنجەحان ۇلى مالىمدەدى.

«نۇرلان ونەربايەۆ اعاممەن AudioKitap جوباسىن تالقىلاپ وتىرمىز. نۇرەكەڭ قازىر «اباي جولىن» دىبىستاۋ ۇستىندە. كەلەسى كەزەكتە ءىلياس ەسەنبەرلين، مۇحتار ماعاۋيننىڭ تاريحي شىعارمالارىن دىبىستاۋدى باستايمىز دەپ كەلىستىك»، - دەپ جازدى بيۋرو باسشىسى Facebook جەلىسىندە.

قازاق تىلىندەگى اۋديوكىتاپتار توپتاماسىن AppStore, PalyMarket-تەگى AudioKitap قوسىمشاسىنان تابۋعا بولادى. مۇندا قازىردىڭ وزىندە 500 دەن اسا شىعارمانىڭ دىبىستالعان نۇسقاسى بار.

«اۋديو-كىتاپ قاتارى تولىعىپ، جاڭارا بەرەدى. دىبىستاۋعا كىتاپ/شىعارما ۇسىنىڭىزدار. ەڭ ءجيى اتالعان كىتاپتاردى ءبىرىنشى كەزەكتە جازىپ، سالامىز»، - دەدى ر. كەنجەحان ۇلى.

اۆتور: ايجان سەرىكجان قىزى