ماسكەۋدە قازاقستاندىق اۋعان سوعىسى ارداگەرلەرى ماراپاتتالدى
«ادامزات تاريحىندا كەز كەلگەن سوعىس - ۇلكەن قاسىرەت. بۇل ورنى تولماس قايعى، ءبىراق، سونىمەن بىرگە ءار سوعىستا باتىرلىق، باتىلدىق پەن ەرلىككە ورىن بار. بۇگىن بۇل ماراپات ءوز قاھارماندارىن تاپتى»، - دەدى قازاقستاننىڭ رەسەيدەگى ەلشىسى يمانعالي تاسماعامبەتوۆ ءىس-شاراعا قاتىسۋشىلاردى قۇتتىقتاي وتىرىپ.
بۇگىن باۋىرجان مۇحامەتجاروۆ وسى كۇنگە جەتە الماعان اتاسى قايىربولاتقا ءتيىستى ناگرادانى الدى.
«قازاقستاننىڭ رەسەيدەگى ەلشىلىگىنىڭ، اۋعانستان ارداگەرلەرىنىڭ وداعىنىڭ كۇشىمەن ءبىز كوپتەن كۇتكەن ماراپاتقا يە بولدىق. بۇل بىرلەسە اتقارعان جۇامىستاردىڭ جەمىسى. ەندى بۇل مەدال ءبىزدىڭ وتباسىمىز ءۇشىن قاستەرلى بولادى. اكەمدى كورمەدىم، ءبىراق ونىڭ ەرلىگى ماعان ءارقاشان ۇلگى بولدى. مەن ونى ماقتان تۇتامىن»، - دەدى باۋىرجان ءوز ەموتسياسىمەن ءبولىسىپ.
ماراپاتتاۋ راسىمىنە كەڭەس وداعىنىڭ باتىرى، ينگۋشەتيانىڭ تۇڭعىش پرەزيدەنتى گەنەرال-لەيتەنانت رۋسلان اۋشيەۆ قاتىستى. ول كوپتەگەن جىلدار بويى اۋعان سوعىسىنىڭ شىندىعى ۇمىتىلماۋى ءۇشىن كوپتەگەن جىلدار بويى ايانباي ەڭبەك ەتىپ كەلەدى.
راسىمگە سونداي-اق قازاقستان رەسپۋبليكاسى پارلامەنتى ءماجىلىسىنىڭ دەپۋتاتى باقىتبەك سماعۇل، قازاقستانداعى اۋعانستان ارداگەرلەرى وداعىنىڭ ءتوراعاسى ءشارىپباي وتەگەنوۆ، سونىمەن قاتار اۋعان سوعىسىنىڭ ارداگەرلەرى قاتىستى. شارا بارىسىندا قازاقستاندىق ارداگەرلەر «بەلگىسىز سولدات قابىرىنە» گۇل شوقتارىن قويدى، جەڭىس مۋزەيلەرىن ارالاپ، قارۋلاس سەرىكتەرىمەن كەزدەستى.
بۇگىن الەكساندر كاشين، بەرىكبول كۋلوۆ، كوشكەلدى وماروۆ، تالعات ساحوۆ، جۇماحان شوڭعارايەۆ، ءالىم جۇماتايەۆ، باۋىرجان مۇحامەتجاروۆ تيەسىلى ماراپاتتارىن قابىلداپ الدى.
سونىمەن قاتار، ماسكەۋگە ساپار بارىسىندا بىرنەشە قازاقستاندىق ارداگەرگە ەمدەۋ شارالارى ۇيىمداستىرىلدى. وسى قولداۋدىڭ ارقاسىندا ولاردىڭ كورۋ قابىلەتى جاقساردى.