گازداندىرۋ كەزىندە ەسەپتەۋىش قۇرالدارى مەن گاز قۇبىرىن ءار ۇيگە جەتكىزۋ تەگىن بولادى
بۇل تۋرالى ق ر ۇكىمەتىنىڭ الاڭىندا وتكەن بريفينگتە نۇر- سۇلتان قالاسى اكىمدىگىنىڭ وتىن- ەنەرگەتيكا كەشەنى جانە كوممۋنالدىق شارۋاشىلىق باسقارماسىنىڭ باسشىسى ەرنات ءبازىل مالىمدەدى.
نۇر- سۇلتان قالاسىندا گاز جۇرگىزىلەتىن العاشقى شاعىن اۋدانداردىڭ ءبىرى كوكتال-1 جانە كوكتال-2، سونداي- اق ج ە و-1 جانە ج ە و-2. ولار ماگيسترالدى گاز قۇبىرىنا كەلەسى جىلۋ ماۋسىمى 2020 -جىلدىڭ كۇزىنە قوسىلادى.
ە. ءبازىل اتاپ وتكەندەي، تۇرعىندار تەك ءوز ۇيلەرىنە پەش ورناتۋ جۇمىستارىن جۇرگىزۋى كەرەك. ءاربىر ۇيگە گاز قۇبىرىن جەتكىزۋ جانە ەسەپتەۋىش قۇرالدارىن ورناتۋ ەلوردا اكىمدىگىنىڭ ەسەبىنەن جۇرگىزىلەدى.
«مىسالى، بىزدە ءبىرىنشى كەزەك بويىنشا وڭتۇستىك- شىعىس، كوكتال شاعىن اۋداندارى بويىنشا جوبادا تولىق گازداندىرۋ، ياعني جەكە تۇرعىن ءۇيدىڭ ءاربىرىنىڭ شارباعىنا دەيىن جەتكىزۋ قاراستىرىلعان. سونىمەن قاتار جوبادا ەسەپتەۋىش قۇرالدار دا ەسكەرىلگەن»، - دەدى باسقارما باسشىسى.
بۇل رەتتە ول اكىمدىكتىڭ «اقىلدى» ەسەپتەۋىش قۇرالدارىن ورناتاتىنىن اتاپ ءوتتى، ياعني گازبەن جابدىقتاۋ كومپانيالارى بۇل پريبورلاردىڭ كورسەتكىشتەرىن ديستانتسيالىق الادى.
«بىزدە نارىقتاعى باعاسى 15 مىڭ تەڭگەگە جۋىقتايتىن ەرەكشە ەسەپتەۋىش قۇرالدارىمەن قامتۋ ەسكەرىلگەن. سونىمەن قاتار كورسەتكىشتەردى ديستانتسيالىق بەرە الاتىن ەسەپتەۋىش قۇرالدارى بار. بۇل بىرىنشىدەن، تۇرعىنداردى قاجەتسىز باقىلاۋشىلارمەن ىعىر قىلمايدى. وسى ەسەپتەۋىش قۇرالدارىنىڭ كورسەتكىشتەرى ديستانتسيالىق بەرىلەدى»، - دەپ ءتۇسىندىردى ە. ءبازىل.
قۇرىلعىلار ءاربىر تۇتىنۋشىعا تەگىن بەرىلەدى. تەك تۇتىنۋشى ونىڭ بۇلىنبەۋىن قاداعالاۋى ءتيىس. اكىمدىكتە ەسەپتەۋىش قۇرالداردى جىلى جەردە، تىكەلەي پەشتەردىڭ جانىنا ورنالاستىرۋ كەرەك دەگەن شەشىمگە كەلدى.
«بىزدە باستاپقى جوبادا ەسەپتەۋىش قۇرالىن ورناتقان سوڭ ءاربىر جەكە تۇرعىن ءۇيدىڭ الدىندا ونى بۇزۋعا قارسى جاشىك ورناتۋ قاراستىرىلعان بولاتىن. ءبىراق سوڭعى كەڭەستە كليماتتىق جاعدايلارعا بايلانىستى ەسەپتەۋىش قۇرالدارىن ءۇيدىڭ ىشىنە ورناتۋ تۋرالى شەشىم قابىلداندى. ءبىز بىرنەشە يتالياندىق، رەسەيلىك، گەرمانيالىق جەتكىزۋشىلەرمەن كەزدەستىك. 25 گرادۋستان تومەن سۋىق بولعان جاعدايدا ەشقانداي جەتكىزۋشى مۇنداي ەسەپتەۋىش قۇرالدارىنىڭ كورسەتكىشتەرىنىڭ دالدىگىنە كەپىلدىك بەرمەيدى»، - دەدى ە. ءبازىل.
جوبادا اكىمدىكتىڭ گاز قۇبىرىن پايدالانۋعا بەرۋ اكتىسى بار جانە زاڭ ورگاندارىندا تىركەلگەن ءاربىر جەكە تۇرعىن ءۇيدىڭ شارباعىنا دەيىن جۇرگىزۋى قاراستىرىلعان. گاز قۇبىرىن ۇيگە دەيىن تارتۋ، پلومبالاۋ جانە ءۇيدى گاز قۇبىرىنا قوسۋ بويىنشا قالعان جۇمىستاردى تۇتىنۋشىنىڭ ءوزى اتقارادى. ول بۇل جۇمىستاردىڭ نەلىكتەن بيۋدجەت قاراجاتى ەسەبىنەن جۇرگىزىلە المايتىنىن ءتۇسىندىردى.
«ءبىز بيۋدجەت قاراجاتىن جەكە سەكتوردا پايدالانا المايمىز. ءبىز گازدى جەكەمەنشىك يەلىك اۋماعىنا دەيىن، ياعني ءبىزدىڭ دالىزگە جاتاتىن اۋماق بويىنشا عانا جەتكىزەمىز. ال جەكەمەنشىك سەكتور اۋماعىنا ءبىز بيۋدجەت قاراجاتىن جۇمساي المايمىز. ول جەرلەرگە ءۇي يەسىنىڭ شىعىندارى جۇمسالادى»، - دەدى ە. ءبازىل.
بۇدان وزگە، ەلوردالىق اكىمدىكتىڭ وكىلى تۇتىنۋشىلاردىڭ مۇنداي جۇمىستارعا جۇمسايتىن شىعىندارى ورتا ەسەپپەن 30 مىڭ تەڭگەدەن 60 مىڭ تەڭگەگە دەيىنگى ارالىقتا بولاتىنىن جەتكىزدى.
«ودان سوڭ قۇبىردىڭ ۇزىندىعىنا بايلانىستى. ءاربىر ءۇيدىڭ جەكە ەرەكشەلىكتەرى بار. مۇمكىن قورشاۋدان ۇيگە دەيىن نەبارى ءبىر مەتر شىعار، ءۇش مەتر، بەس مەتر بولۋى مۇمكىن، وسى ارالىقتى تۇتىنۋشىلار وزدەرى مونتاجدايدى، اتتەستاتى بار ارنايى ۇيىمدى جالدايدى. بۇل شارالاردىڭ بارلىعى جۇمىس قۇنىنا بايلانىستى. مىسالى، الماتىدا ورتا ەسەپپەن 30-35 مىڭ تەڭگە ارالىعىندا، 60 مىڭعا دەيىن جەتۋى مۇمكىن. ەگەر پەش قۇرامداستىرىلعان بولسا، سۇيىق جانە سۇيىتىلعان گازبەن جۇمىس ىستەيتىن بولسا، وندا پروبلەما جوق، ەشتەڭە وزگەرتىلمەيدى، تەك گازعا قوسىلدى. ەگەر كومىر جاعىلعان پەش بولسا، وندا اۋىستىرۋ كەرەك. بۇل ەندى تەك تۇتىنۋشىنىڭ ءوزىنىڭ شىعىندارى»، - دەدى ە. ءبازىل.
www.24.kz