جەتى تىلدە سۋداي اعىپ تۇرعان قازاق جىگىتى قازنەتتى تاڭ- تاماشا ەتتى

نۇر- سۇلتان. قازاقپارات - جەتى تىلدە سويلەگەن قازاق جىگىتى جەلى قولدانۋشىلارىن تاڭعالدىردى. ۆيدەو الەۋمەتتىك جەلىدە تاراپ كەتكەن.

 ۆيدەو كەيىپكەرى - 23 جاستاعى مەيىرجان تاشتاي. شىمكەنتتىك جىگىت الەمنىڭ جەتى ءتىلىن 4  جىلدا مەڭگەرگەن. بۇگىندە ول - جەكە كاسىپكەر.

مەيىرجان Tengrinews.kz تىلشىسىنە ءتىل مەڭگەرۋدىڭ قىر- سىرىن ايتىپ بەردى. مەيىرجان - قازاق، ورىس، اراب، تۇرىك، اعىلشىن جانە فرانسۋز تىلدەرىندە ەركىن سويلەيدى. بۇگىندە ونىڭ قورجىنى تاعى ءبىر تىلمەن - سۋاحيلي تىلىمەن تولىعىپ جاتىر. مەيىرجاننىڭ سوزىنشە، ول ءتىل مەڭگەرۋدە ارنايى ماقسات، جوسپار قويىپ ۇيرەنبەگەن. العاش مەڭگەرگەن شەت ءتىلى - اراب ءتىلى. ال جەلىدە تاراپ كەتكەن ۆيدەوسى شامامەن ءبىر اي بۇرىن شىمكەنتتە تۇسىرىلگەن ەكەن. ۆيدەونى كورگەن جەلى قولدانۋشىلارى تاڭعالىسىن جاسىرماي، ماقتاۋىن اسىرىپ جاتىر. «شەت تىلدەرگە دەگەن قىزىعۋشىلىعىم ۋنيۆەرسيتەت قابىرعاسىندا وقىپ جۇرگەن كەزدە وياندى دەسەم بولادى. وعان دەيىن اسا قىزىقپاعانمىن. ول كەزدە جاي، ەشقانداي ماقساتسىز ۇيرەنە باستادىم. جالپى تيم دونەر دەگەن پوليگلوت بار. ول 18 جاسىندا 22 ءتىل بىلگەن. سول كىسىنىڭ ۆيدەولارىن كورىپ، اسەر الدىم. سودان باستالدى. باستاپقىدا ەكى ءتىل - اراب جانە تۇرىك تىلدەرىن ۇيرەنە باستادىم»، - دەيدى مەيىرجان.

پوليگلوتتىڭ سوزىنشە، ءتىل ۇيرەنۋ - قيىن ەمەس. تەك وقىپ، زەرتتەي كەلە بەلگىلى ءبىر ءادىس پايدا بولادى ەكەن. «ءتىل مەڭگەرۋ بارىسىندا بەلگىلى ءبىر ءادىس پايدا بولادى. سوندىقتان ماعان ءتىل ۇيرەنۋ قيىنعا سوقپادى. العاشىندا اراب ءتىلىن ۇيرەنە باستادىم. كەيىن تۇرىك تىلىنە كوشتىم. قازىر سۋاحيلي ءتىلىن ۇيرەنىپ جاتىرمىن»، - دەيدى كەيىپكەرىمىز.

 ايتا كەتەيىك، سۋاحيلي - تانزانيا، موزامبيك، كونگو دەموكراتيالىق رەسپۋبليكاسى اۋماعىندا تۇراتىن، بانتۋ توبىنا جاتاتىن حالىقتىڭ ءتىلى. سويلەۋشىلەردىڭ جالپى سانى شامامەن 3 ميلليون ادام. جازۋى لاتىن الىپبيىنە نەگىزدەلگەن. پوليگلوتتىڭ «بەلگىلى ءبىر ءادىس» دەگەنى - تىلدەر اراسىنداعى ۇقساستىق ەكەن. ۇقساس تىلدەردىڭ اراسىنان بايلانىس تاپقان كەزدە ءتىل ۇيرەنۋدە بەلگىلى ءبىر لوگيكا قالىپتاسادى ەكەن.

«اراب جانە تۇرىك تىلدەرىنىڭ اراسىندا بىلاي قاراپ تۇرساڭىز بايلانىس بار. اراب ءتىلىن باستاعاننان كەيىن اقىرىنداپ تۇرىك تىلىنە كوشتىم. مەن جالپى كاتار مەملەكەتىندەگى كاتار ۋنيۆەرسيتەتىندە وقىدىم. ول جەردە تۇرىكتەر كوپ بولاتىنىن ءبىلدىم. ءبىر جىل ۋاقىتىم سول جاقتا وتەتىنىن بىلگەندىكتەن تۇرىك ءتىلىن قاتار الىپ ءجۇردىم. تىلدەردى زەرتتەگەن كەزدە ادامدا بەلگىلى ءبىر لوگيكا قالىپتاسادى. ءسويتىپ اراب جانە تۇرىك تىلدەرىنىڭ ۇقساس ەكەنىن بايقاعاننان كەيىن ءبىر ۋاقىتتا ۇيرەندىم»، - دەيدى مەيىرجان.

مەيىرجاننىڭ سوزىنشە، ءتىل مەڭگەرىپ، ەركىن سويلەي الاتىنداي دەڭگەيگە جەتۋ ءۇشىن ادامعا 3-4 اي جەتكىلىكتى. «نەگىزى ماعان ۇستازدارىم »ءتىلدى تەز ۇيرەنەسىڭ« دەپ ايتاتىن. مەن ءۇشىن ءتىل ۇيرەنۋدىڭ باستاپقى دەڭگەيىندە ادامدارمەن سۇحبات جاساپ، اڭگىمە- دۇكەن قۇرۋ قيىن ەمەس. ونىڭ ءبارىن از ۋاقىتتا جاساي الامىن. ەكى گوللانديالىق جىگىت تاجىريبە جاساعان ەكەن. ولار ءبىر ءتىلدى جەتى كۇندە ۇيرەنۋگە بولاتىنىن انىقتاعان. مەن ءۇشىن ەركىن، اۋقىمدى تاقىرىپتاردا سويلەۋ دەڭگەيىنە جەتۋ ءۇشىن 3-4 اي جەتكىلىكتى. ءبىراق ىشتەي ەكى ايدا سويلەپ كەتە الامىن دەگەن قاعيدام بار»، - دەيدى مەيىرجان.

 4 جىلدىڭ ىشىندە 7 ءتىلدى مەڭگەرگەن مەيىرجان مۇنىمەن توقتاپ قالماق ەمەس. «كەزىندە ءال- فارابي اتامىز 70 تىلدە ەركىن سويلەگەن ەكەن. 70 ءتىلدى مەڭگەرمەسەم دە 15 تىلدە ەركىن سويلەگىم كەلەدى. تىلدەردىڭ ىشىندە اراب ءتىلىن ۇيرەنۋ كەزىندە كىشكەنە قيىندىق تۋدى. الايدا كەيىننەن لوگيكاسىن، تابيعاتىن تۇسىنگەننەن كەيىن ەڭ وڭاي تىلدەردىڭ بىرىنە اينالدى. ازىرشە سۋاحيليدەن باسقاسىندا ەركىن سويلەيمىن دەپ سەنىممەن ايتا الامىن. ول ءتىلدى ءالى ۇيرەنىپ جاتىرمىن. ءتىل ۇيرەنۋ ءۇشىن ارنايى كۋرستارعا بارعان جوقپىن. تەك اراب ءتىلىن كاتار ۋنيۆەرسيتەتىندە ۇيرەندىم. ءالى قىتاي، جاپون، كورەي جانە يسپان تىلدەرىن ۇيرەنگىم كەلەدى»، - دەيدى جاس پوليگلوت.

كوپ ءتىل ءبىلۋدىڭ پايداسى كوپ ەكەنى بەلگىلى. كەيىپكەرىمىز مەيىرجان دا كوپ ءتىل مەڭگەرۋدىڭ ءبىراز ارتىقشىلىعى بار ەكەنىن ايتا كەتتى. «الەمنىڭ قاي تۇكپىرىنە بارسام دا، مەن سويلەسەتىن ادامداردى تابا الامىن. ولارمەن ەركىن اڭگىمە- دۇكەن قۇرا الامىن. ال ەگەر ءسىز سول كىسىنىڭ تىلىندە سويلەيتىن بولساڭىز ونىڭ جۇرەگىنە جەتە الاسىز. ودان بولەك، قازىر اقپارات زامانى بولعاندىقتان ءتىل - ۇلكەن اقپارات كوزىنە جەتۋگە مۇمكىندىك بەرەدى. كەز كەلگەن حابار اگەنتتىكتەرىنەن تىكەلەي سول تىلدە اقپارات الا الامىن»، - دەيدى مەيىرجان. جاس پوليگلوت ءتىل ۇيرەنگىسى كەلەتىن ءبىراق ۋاقىت تاپپاي نە باسقا ماسەلەلەرگە بايلانىستى كەيىنگە قالدىرىپ جۇرگەن ادامدارعا ءوز كەڭەس بەردى: «مارك فابي كۆينتيليان »بىزگە ۋاقىت جەتىسپەيدى ەمەس، ءبىز ۋاقىتتى دۇرىس جۇمساي المايمىز«، - دەيدى.

 كەز كەلگەن ادام ءتىل مەڭگەرۋگە كۇنىنە 30 مينۋت جۇمسايتىن بولسا، بەلگىلى ءبىر ۋاقىت ىشىندە ناتيجەگە جەتەدى. ەڭ باستىسى - جۇيەلى وقۋ كەرەك. بۇگىندە بارىمىزدە قۇلاققاپ بار. كۇندەلىكتى جۇمىسقا بارا جاتساڭىز دا، ىدىس جۋىپ جاتساڭىز دا مەڭگەرگىڭىز كەلگەن تىلدە ءان، پودكاست، قىزىقتى جاڭالىق تىڭداڭىز. ءتىلدى ۇيرەنۋ ءۇشىن سول تىلمەن بىرگە ءومىر ءسۇرۋ كەرەك دەپ ويلايمىن».

Tengrinews.kz