16:30, 20 - قاراشا 2019 | GMT +6
ناسا باسقا پلانەتالارداعى مۇحيتتاردان تىرشىلىك ىزدەيتىن روبوتتى سىناقتان وتكىزەدى
نۇر- سۇلتان. قازاقپارات - ناسا مۇز استىندا زەرتتەۋگە ارنالعان سۋاستى روبوتىن (BRUIE) ويلاپ تاپتى. ونى باسقا پلانەتالارداعى مۇحيتتاردان تىرشىلىك ىزدەۋگە جىبەرۋ ءۇشىن انتاركتيكادا سىناقتان وتكىزۋدى جوسپارلاپ وتىر، دەپ حابارلايدى قازاقپارات ناسا سايتىنا سىلتەمە جاساپ.
روبوتتىڭ ۇزىندىعى ءبىر مەتر، ەكى دوڭگەلەكتى. ونىڭ سۋرەتكە ءتۇسىرۋ مۇمكىندىگى بار جانە بۇل روبوت سۋدىڭ مۇزبەن جاناساتىن جەرى تۋرالى مالىمەتتەر جيناي الادى. ونىڭ باستى ارتىقشىلىعى - سۋ استى اعىسىنا قارسى تۇرا الۋىندا.
ول كەلەسى ايدا اۆستراليانىڭ «كەيسي» انتاركتيكالىق عىلىمي- زەرتتەۋ ستانسياسىندا سىناقتان وتكىزىلەدى، سودان كەيىن باسقا پلانەتالارداعى مۇحيتتاردان تىرشىلىك ىزدەۋگە باعىتتالادى.
عالىمداردىڭ ايتۋىنشا، كۇن جۇيەسىندە جەر سەرىكتەر (مىسالى، يۋپيتەردىڭ جەر سەرىگى - ەۋروپا جانە ساتۋرن - ەنچەلادۋس) بار، ولار مۇحيتتى 10-19 شاقىرىم مۇزدى قاباتپەن جاۋىپ تۇرادى.