قازاقستاندا بالالارعا قاتىستى جىنىستىق قىلمىستارعا ءومىر بويى بوستاندىعىنان ايىرۋ جازاسى ەنگىزىلەدى
بۇل تۋرالى پارلامەنت ءماجىلىسىنىڭ جالپى وتىرىسىندا ق ر باس پروكۋرورىنىڭ ورىنباسارى مارات احمەتجانوۆ ءمالىم ەتتى، دەپ حابارلايدى قازاقپارات ءتىلشىسى.
بۇگىن جالپى وتىرىستا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جانە قىلمىستىق-پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانىپ جاتىر. قۇجاتتىڭ ەكىنشى بولىگى جىنىستىق قاتىناستاعى قىلمىستارعا قاتىستى بولىپ وتىر. زورلاۋ مەن سەكسۋالدى سيپاتتاعى زورلىق-زومبىلىق ارەكەتتەر ءۇشىن جازا قاتايادى.
«اتاپ ايتساق، زورلاۋ، ياعني جابىرلەنۋشىگە نەمەسە باسقا ادامدارعا كۇش قولدانىپ، ونىڭ دارمەنسىز كۇيىن پايدالانىپ، جىنىستىق قاتىناس جاساۋ اۋىرلىعى ورتاشا قىلمىستان اۋىر قىلمىس ساناتىنا كوشەدى. بۇل جەردە دە تاتۋلاسۋ بولمايدى. ال بالالارعا قارسى جاسالعان وسىنداي قىلمىستار ءۇشىن جازا تىپتەن قاتال بولماق. بۇل اسا اۋىر قىلمىستار ساناتىنا جاتادى. 14 جاسقا تولماعان بالالارعا قارسى جىنىستىق سيپاتتاعى قىلمىستار ءۇشىن تەك قانا 20 جىل باس بوستاندىعىنان ايىرۋ نەمەسە ءومىر بويىنا باس بوستاندىعىنان ايىرۋ جازاسى ۇسىنىلىپ وتىر»، - دەدى م. احمەتجانوۆ.
سونىمەن قاتار، پەدوفيليا بويىنشا ايعاقتاردى بۇرمالاعانى ءۇشىن، تەك قانا بۇرمالاپ جانە جاسىرىپ قويماي، ءبىلىپ تۇرىپ، حابارلاماعانى ءۇشىن دە جاۋاپكەرشىلىك كوزدەلگەن.
«بۇل ارەكەتتەر اۋىر قىلمىستار ساناتىنا كىرەتىن بولادى. مىسالى، ينتەرناتتا تاربيەلەنىپ جاتقان بالالارعا قارسى قىلمىستاردى تاربيەشى جاسىرعان بولسا، ءتيىستى جاۋاپكەرشىلىك ەسكەرىلگەن»، - دەدى باس پروكۋروردىڭ ورىنباسارى.