زاڭ جوباسى: مال ۇرلىعىمەن اينالىساتىنداردى قانداي جازا كۇتىپ تۇر؟

نۇر-سۇلتان. قازاقپارات - مال ۇرلىعىنا قامقورشىلىق جاسايتىن شەنەۋنىكتەر مەن قۇقىق قورعاۋ ورگاندارىنىڭ قىزمەتكەرلەرى دە بار.

بۇل تۋرالى پارلامەنت ءماجىلىسىنىڭ جالپى وتىرىسىندا ق ر باس پروكۋرورىنىڭ ورىنباسارى مارات احمەتجانوۆ ايتتى، دەپ حابارلايدى قازاقپارات ءتىلشىسى.

بۇگىن جالپى وتىرىستا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قىلمىستىق جانە قىلمىستىق-پروتسەستىك زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تالقىلانىپ جاتىر.

«مال ۇرلىعىنا ەرەكشە نازار اۋدارىلۋدا. قىلمىستىڭ بۇل ءتۇرىن جەكە قۇرام ەتىپ شىعارۋ پىكىرتالاس تۋدىردى. ءبىز بۇل ماسەلە بويىنشا حالىقارالىق تاجىريبەنى زەرتتەدىك. كوپتەگەن ەلدەردە قوعام مەن ەكونوميكا ءۇشىن ماڭىزى زور نىساندارعا قول سۇعۋ قىلمىستىق كودەكستە جەكە باپ رەتىندە ءبولىپ شىعارىلعان. ولار ءۇشىن جازا دا باسقا»، - دەپ توقتالدى م. احمەتجانوۆ.

وسى ورايدا بۇگىندە ەلىمىزدە مال ۇرلىعى قىلمىستىق كاسىپكە اينالعانىن اتاپ ءوتتى.

«ەندى مال ۇرلىعىنا توقتالساق، نە سەبەپتى مۇنداي قادامعا بارىپ وتىرمىز؟ اۋىل دەسە بارلىعىمىز ەلەڭ ەتە قالامىز. سەبەبى، اۋىل - ەل بەسىگى. جاقىن تۋىستارىمىز تۇرىپ جاتىر، حالقىمىزدىڭ 42 پايىزعا جۋىعى اۋىلدا تۇرادى. ال اۋىل ءومىرى مالمەن بايلانىستى، ويتكەنى ەلدىڭ تۇرمىس- تىرشىلىگى ءتورت تۇلىكتە. قازىر مال ۇرلىعى ەلدىڭ بەرەكەسىن كەتىرۋدە. ۇرلانعان ءۇيىر-ءۇيىر جىلقى مەن تابىن-تابىن ءىرى قارا ەلدىڭ جانىنا اۋىر باتادى. بۇل پروبلەما بارشاعا ءمالىم. تەرگەۋ پراكتيكاسىن زەردەلەۋ مال ۇرلىعىنىڭ قىلمىستىق كاسىپكە اينالعانىن كورسەتىپ وتىر. ونى ۇيىمداستىراتىن، ورىندايتىن، ساتىپ الاتىن، جۇك تاسيتىن، بازاردا وتكىزەتىن قىلمىستىق توپتار قالىپتاسقان. بۇل قىلمىستارعا قامقورشىلىق جاسايتىن شەنەۋنىكتەر مەن قۇقىق قورعاۋ ورگاندارىنىڭ قىزمەتكەرلەرى دە بار. بۇل ارەكەت ناقتى ۇيىمداسقان قىلمىستىق توپ بەلگىسى بار قىلمىستار بولىپ سانالادى. قازىر مال ۇرلاعان ادام زالالىن وتەسە، قىلمىستىق ءىس قىسقارتىلىپ، تۇبەگەيلى تەرگەۋ جۇرگىزىلمەيدى. قىلمىستى نەگىزگى ۇيىمداستىرۋشى، باسقا قاتىسۋشىلار انىقتالمايدى، قىلمىستىق بايلانىس اشىلماي قالادى»، - دەدى ول.

وسى ورايدا، ول ستاتيستيكا بويىنشا ۇرلىق بويىنشا ىستەردىڭ كوبىسى تاتۋلاسۋمەن اياقتالىپ جاتقانىن اتاپ ءوتتى.

«باستى سەبەبى - ۇرلاعان مالدى قايتارىپ، كەشىرىم كەلىپ جاتادى. سوندىقتان وسى قىلمىس تۇرىمەن كۇرەستى كۇشەيتىپ، جاۋاپتىلىقتى قاتاڭداتۋ كەرەك. ەندى زاڭ جوباسىنا توقتالساق، جاي قۇرام ءۇشىن 5 جىل ەسكەرىلگەن. ەگەر ادام توبىمەن الدىن الا ءسوز بايلاسۋمەن ءىرى مولشەردە ۇرلىق بولسا، 7 جىلعا دەيىن. بىرنەشە رەت بۇزىپ كىرگەنى ءۇشىن - 10 جىل. اسا ءىرى كولەمدە جانە قىلمىستىق توپ بولىپ ۇرلىق جاساسا، 12 جىل باس بوستاندىعىنان ايىرۋ كوزدەلگەن. بۇل شارا ەلدىڭ مالىن قورعاۋ ءۇشىن، حالىقتىڭ بەرەكەسىن ساقتاۋ ءۇشىن كەرەك»، - دەدى باس پروكۋروردىڭ ورىنباسارى.