پرەزيدەنت تاپسىرماسى: نۇر-سۇلتان اكىمدىگى ءبىرىڭعاي قابىلداۋ كۇنىن وتكىزەدى

نۇر-سۇلتان. قازاقپارات – 21- قاراشا كۇنى نۇر-سۇلتان قالاسىنىڭ بيلىك وكىلدەرى ازاماتتاردى جەكە ماسەلەلەرى بويىنشا قابىلدايدى، دەپ حابارلايدى قازاقپارات.

«ەلوردادا ازاماتتاردى قابىلداۋدىڭ ءبىرىڭعاي كۇنى وتەدى. 21- قاراشادا پرەزيدەنتتىڭ «حالىق ۇنىنە قۇلاق اساتىن مەملەكەت» تۇجىرىمداماسىنا كوشۋدەگى مىندەتتەردى جۇزەگە اسىرۋ اياسىندا ەل بويىنشا «ازاماتتاردى قابىلداۋدىڭ ءبىرىڭعاي كۇنى«جالپى رەسپۋبليكالىق شاراسى وتەدى. ونىڭ اياسىندا قالا اكىمى، قالا اكىمىنىڭ ورىنباسارلارى، باسقارما باسشىلارى مەن اۋدان اكىمدەرى ازاماتتاردى قابىلدايدى. قابىلداۋعا الدىن الا جازىلۋ 20- قاراشا ساعات 18:30 عا دەيىن كورسەتىلگەن تەلەفوندار ارقىلى جۇرگىزىلەدى: 557256، 556483، 556482، 556486»، - دەلىنگەن نۇر-سۇلتان اكىمدىگى تاراتقان اقپاراتتا.