مەملەكەت باسشىسى بىرىككەن اراب امىرلىكتەرىنىڭ پرەزيدەنتىنە كوڭىل ايتتى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆ بىرىككەن اراب امىرلىكتەرىنىڭ مەملەكەتتىك قايراتكەرى شەيح سۇلتان بەن زايد ءال ناھاياننىڭ دۇنيەدەن وزعانى تۋرالى سۋىت حاباردى تەرەڭ كۇيزەلىسپەن قابىل الىپ، ونىڭ باۋىرى، بىرىككەن اراب امىرلىكتەرىنىڭ پرەزيدەنتى شەيح حاليفا بەن زايد ءال ناھايانعا كوڭىل ايتۋ جەدەلحاتىن جولدادى، دەپ حابارلايدى قازاقپارات اقورداعا سىلتەمە جاساپ.

جەدەلحاتتا شەيح سۇلتان ءوز ءومىرىن امىرلىكتەردىڭ، ونىڭ حالقىنىڭ مۇددەسىن قورعاۋعا جانە قىزمەت ەتۋگە رياسىز ارناعانى باياندالعان. سونىمەن قاتار قازاقستان حالقى شەيح سۇلتان ءال ناھاياندى پاراساتتى ازامات، جوعارى بەدەلدى ساياساتكەر، ەكىجاقتى ىنتىماقتاستىقتى نىعايتۋعا وراسان زور ەڭبەك سىڭىرگەن تاريحي تۇلعا رەتىندە ءاردايىم جادىندا ساقتايتىنى ايتىلعان.

- وسىنداي سىن ساعاتتا ورنى تولماس اۋىر قايعى- قاسىرەتتەرىڭىزگە ورتاقتاسىپ، بارشا قازاقستان حالقىنىڭ اتىنان جانە جەكە ءوز تاراپىمنان، سىزگە جانە بۇكىل امىرلىكتەر حالقىنا قايعىرا كوڭىل ايتامىن، - دەلىنگەن جەدەلحاتتا.