مينيستر قازاقستاندا قانشا قىتاي ازاماتى جۇمىس ىستەپ جۇرگەنىن ايتتى
بۇل تۋرالى قازاقستاننىڭ ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ مالىمدەدى دەپ حابارلايدى Sputnik قازاقستان.
بۇل تۋرالى مينيستر ۇكىمەت كۋلۋارىندا ايتتى.
«بۇگىندە 21300 شەتەلدىك مامان جۇمىس ىستەپ جۇرسە، سونىڭ 4300 ءى- قىتايلىقتار. ءيا، ۇلەسى باسقالارعا قاراعاندا كوبىرەك. ءبىراق ەگەر سوڭعى ءتورت جىلمەن سالىستىرساق، 2016-جىلى 12-13 مىڭداي قىتايلىق ەڭبەك ەتتى، ودان كەيىن 9 مىڭ، 6 مىڭ بولدى. قازىر - 4300. سوندىقتان رەسمي رۇقساتتاما بويىنشا ىستەپ جاتقان قىتايلىق جۇمىسشىلار سانى ازايىپ كەلەدى»، - دەدى نۇرىمبەتوۆ.
ول شەتەلدىك جۇمىسشىلار ەڭ كوپ قۇرىلىس جانە تاۋ-كەن ءوندىرۋ سالاسىنا تارتىلعانىن جەتكىزدى.
باسىلىم دەرەگىنشە، مينيسترلىك باس پروكۋراتۋرانىڭ باستاماسىمەن شەتەلدىك جۇمىسشىلار تارتىلعان ءىرى كاسىپورىنداردى تەكسەرىپ شىققان.
«ءبىرىنشى كەزەڭدە 50 دەن اسا شەتەلدىك جۇمىس كۇشىن تارتاتىن 63 ءىرى كومپانيانى تەكسەردىك. ناتيجەسىندە، ەڭبەك زاڭناماسىن بۇزۋدىڭ 700 گە جۋىق فاكتىسى انىقتالدى. وكىنىشكە قاراي، 24 كومپانيادا شەتەلدىك جانە وتاندىق مامانداردىڭ جالاقىسى مەن تۇرمىستىق جاعدايىندا ايىرماشىلىق ايقىندالدى. وسىنداي 400 فاكتى تىركەلدى»، - دەدى مينيستر.
ەكىنشى كەزەڭدە وتىزدان اسا شەتەلدىك جۇمىسشى ىستەيتىن 34 مەكەمە تەكسەرىلىپ جاتقانى بەلگىلى بولدى.
ۆەدومستۆو باسشىسىنىڭ مالىمەتىنشە، 14 كومپانيانىڭ تەكسەرىسى اياقتالعان.
ناتيجەسىندە ءتورت كاسىپورىندا قازاقستاندىق ماماندار شەتەلدىكتەردەن از جالاقى العانى انىقتالدى.
مينيستر تەكسەرۋ جۇمىستارى جالعاسىپ جاتقانىن ايتتى.