ەلوردادا ساباقتاردىڭ وتكىزىلمەيتىنىن قايدان بىلۋگە بولادى

نۇر-سۇلتان. قازاقپارات - قولايسىز اۋا رايىنا بايلانىستى ساباقتار بولمايتىنى جونىندە اقپاراتتى نۇر-سۇلتان قالاسى اكىمدىگى مەن ءبىلىم باسقارماسىنىڭ رەسمي دەرەككوزدەرى تاراتادى، دەپ حابارلايدى قازاقپارات.

«قازىرگى اۋا رايىنىڭ جاعدايىن ەسكەرە وتىرىپ، ساباقتار بولمايتىن جاعدايدا اقپارات نۇر- سۇلتان قالاسى اكىمدىگى مەن ءبىلىم باسقارماسىنىڭ رەسمي دەرەككوزدەرى ارقىلى تاراتىلاتىنىن ەسكە سالامىز»، دەلىنگەن باسقارمانىڭ سايتىندا.

اتا-انالارعا اۋا-رايى تۋرالى دەرەكتەردى انىقتاۋ ماقساتىندا ينتەرنەت-قوسىمشالار مەن باسقا دا راستالماعان دەرەككوزدەردى پايدالانۋ ۇسىنىلمايدى.

اقپارات تومەندەگى دەرەككوزدەر ارقىلى تاراتىلادى:

1) نۇر-سۇلتان قالاسى توتەنشە جاعدايلار دەپارتامەنتى قىزمەتىنەن كەلىپ تۇسكەن SMS حابارلاما؛ 2) iKOMEK109 قالالىق ورتالىعى (109 نومىرىنە قوڭىراۋ سوعۋ، نەمەسە موبيلدى قوسىمشا مەن چاتتارىنا تىركەلىپ، حابارلاما الۋ)؛ 3) قالالىق ءبىلىم باسقارماسىنىڭ رەسمي سايتى. 4) نۇر-سۇلتان قالاسى ءبىلىم باسقارماسىنىڭ رەسمي Facebook-تەگى پاراقشاسى. 5) نۇر-سۇلتان قالاسى اكىمدىگىنىڭ رەسمي سايتى. 6) Smart Astana قوسىمشاسى (موبيلدى قوسىمشاسىنا تىركەلىپ، حابارلاما الۋ).