+7 (701) 759 90 19
-3 °С : نۇر-سۇلتان
-1 °С : الماتى
USD 384.97 EUR 427.12
RUB 6.04 CNY 54.75
جاڭالىقتار

ەلوردا تۇرعىندارى تۇرىك كينولارىن تەگىن تاماشالاي الادى

19 قاراشا 10:12
:ءبولىسۋ
ەلوردا تۇرعىندارى تۇرىك كينولارىن تەگىن تاماشالاي الادى

نۇر-سۇلتان. قازاقپارات - ەلوردادا تۇرىك فيلمدەرىنىڭ اپتالىعى باستالدى، دەپ حابارلايدى قازاقپارات ءتىلشىسى.

اپتالىق نۇر- سۇلتان قالاسىندا 2016 -جىلدان بەرى ۇيىمداستىرىلىپ كەلەدى. شارانى يۋنۋس ەمرە تۇرىك مادەنيەت ورتالىعى مەن تۇركيا رەسپۋبليكاسى مادەنيەت جانە تۋريزم مينيسترلىگىنە قاراستى كينەماتوگرافيا ديرەكتسياسىمەن بىرگە ۇيىمداستىرعان.

«بيىلعى اپتالىققا ءتۇرلى جانرداعى 8 تۇرىك فيلمىن اكەلدىك. ولاردىڭ ءارقايسىسى - ءوز جانرىنىڭ ۇزدىگى. ماسەلەن تاريحي جانردا «ەرتۇعىرىل» ءفيلمىن تاڭداپ الدىق. ونداعى ستسەنارييدى جازعاندار دجەميلە ناز، كۆانىچ ءبارۋونۋ سىندى ءوز ءىسىنىڭ حاس ماماندارى. تۇركيانىڭ كينەماتوگرافيا سالاسى قازىر گولليۆۋدتان كەيىنگى ورىندا تۇر. ولار پروكاتقا وتە كوپ فيلم شىعارادى. بيىل قازاقستاندا تۇڭعىش رەت كورسەتىلەتىن ەكى فيلم بار، ولار - «سيقىرشى» جانە «قىشقىل المالار». ال تانىمال جازۋشى شىڭعىس ايتماتوۆتىڭ شىعارماسىنا نەگىزدەلگەن «قىزىل ورامالدى شىنارىم» فيلمى اپتالىقتىڭ شىمىلدىعىن جابادى»، - دەدى يۋنۋس ەمرە اتىنداعى تۇرىك مادەنيەت ورتالىعى باسشىسىنىڭ مىندەتىن اتقارۋشى الماگۇل يسينا.

اتاپ ايتقاندا، ەلوردالىقتاردىڭ نازارىنا «ۇزىن حيكايا» ، «كوبەلەكتىڭ ءتۇسى»، «ۇمىتسام سىبىرلا»، «ەرتۇعىرىل 1890»، «باستىق ءىستىڭ ءساتتى اياقتالعانىن قالايدى»، «سيقىرشى»، «قىشقىل المالار»، « قىزىل ورامالدى شىنارىم» اتتى 8 تۇرىك كينوسى ۇسىنىلادى.

«ۇزىن حيكايا» فيلمىنىڭ باستى ءرولىن قازاقستاندىقتارعا جاقىننان تانىس، كورەرمەننىڭ كوڭىلىنەن شىققان كەنان يميرزالىوگلۋ سومدايدى. بالا كەزىندە جەتىم قالعان بولگارلىق ءاليدى اتاسى سۇلەيمەن بولگاريادان تۇركياعا الىپ كەلگەن. ءالي سۇيىكتىسى مۋنيرامەن، قىزدىڭ اتا- اناسىنىڭ قارسىلىعىنا قاراماستان ۇيلەنەدى. ءالي قىزدى الىپ قاشادى جانە ولاردىڭ ءومىرى تەمىرجول ۆوكزالدارىنىڭ ستانتسيالارىنىڭ اراسىندا ۇنەمى كوشۋمەن وتەدى.

چاگان ىرماك ستسەنارييىن جازعان «ۇمىتسام سىبىرلا» فيلمى - كورەرمەننىڭ كوزايىمىنا اينالعان تۋىندى. مەديتسينالىق كوللەدجدى ءبىتىرىپ، اۋدان ورتالىعىنداعى دارىگەرلىك پۋنكتكە مەدبيكە بولىپ جۇمىسقا جاڭا كىرگەن حانيفە مەن ءسىڭلىسى حاتيجە شاعىن اۋدان ورتالىعىندا تۇرادى. حانيفە - وتە ۇيالشاق، تۇيىق قىز، ال حاتيجە ەركە، ەركىن وسكەن. حانيفە ادەبيەتكە اۋەس، حاتيدجە - ءان سالۋعا قۇشتار. ءبىر كۇنى جاڭا تاعايىندالعان اكىمنىڭ ۇلى تارىك اۋدان ورتالىعىنا كەلەدى. سول كۇننەن باستاپ اپالى- سىڭلىلەردىڭ ءومىرى تۇبەگەيلى وزگەرەدى.

باستى رولدە تانىمال تۇرىك اكتەرى كىۆانچ تاتلىتۋگ وينايتىن «كوبەلەكتىڭ ءتۇسى» فيلمى 1940 -جىلداردا ءومىر سۇرگەن ەكى اقىننىڭ ءومىرىن باياندايدى. كينو ءرۇشتۋ ونۋر مەن مۋزاففەر تاييپ ۋسلۋ اتتى ەكى جاس اقىننىڭ ءومىرى مەن زونگۋلداكتىق شاحتەرلاردىڭ ءومىرىن سۋرەتتەۋمەن باستالادى.

اتاقتى اتىف يىلماز تۇسىرگەن « قىزىل ورامالدى شىنارىم» فيلمىنىڭ باستى ءرولىن تۇركان شوراي سومداعان. كينوتۋىندى شىڭعىس ايتماتوۆتىڭ «قىزىل ورامالدى شىنارىم» شىعارماسىنىڭ جەلىسىمەن تۇسىرىلگەن.

جاپونيا مەن تۇركيا بىرلەسىپ تۇسىرگەن «ەرتۇعىرىل 1890» فيلمىنىڭ رەجيسسەرى - ميتسۋتوشي تاناكا، ستسەناريسى - ەريكو كوماتسۋ. 1890 -جىلى وسمانلى مەملەكەتىنىڭ كەمەسى «ەرتۇعىرىل» جاپون تەڭىزىندە اپاتقا ۇشىرايدى. جاپوندىقتار كومەككە كەلىپ، ەكيپاج بەن كەمەنى قۇتقارۋعا تىرىسادى. ال 100 -جىلدان كەيىن 1985 -جىلى تۇرىكتەر تەگەراننان جاپونيانىڭ 215 ازاماتىن قۇتقارادى.

«باستىق ءىستىڭ ءساتتى اياقتالعانىن قالايدى» تۋىندىسىنىڭ جەلىسى كاپپادوكيادا وتەدى. باستىعى يسفەنديار سيناندى كومەديا فيلمنىڭ حيكاياسىن جازۋ ءۇشىن كاپپادوكياعا جىبەرەدى. حيكايانىڭ جالعىز عانا شارتى بار: «باستىق ءىستىڭ ءساتتى اياقتالعانىن قالايدى». الايدا يسفەنديار سونشا كۇتكەن ءىستىڭ «ءساتتى اياقتالا» قويارى بەلگىسىز.

«سيقىرشى» ءفيلمىن تانىمال تۇرىك رەجيسسەرى جانە اكتەر جەم يىلماز تۇسىرگەن. سيقىر الەمىنە ەرەكشە قىزىعۋشىلىق تانىتاتىن يسكەندەردى دوسى مارادونادان باسقا ەشكىم مويىنداي قويمايدى. اسىرەسە وفيتسەر اكەسى ونىڭ سيقىرشىلىققا دەگەن اۋەسقويلىعىنا قارسى بولادى. ءبىراق وقيعا جەلىسى اكە مەن بالانىڭ بىرگە گاسترولگە شىعۋىنا بايلانىستى وزگەرۋى مۇمكىن.

«قىشقىل المالار» فيلمىنىڭ ستسەنارييىن يىلماز ەردوگان جازعان. مىنەزى وتە قاتال اكىم ازيز وزايدىڭ ەكى ەرەكشەلىگى بار، ءبىرى ادەمى باقشاسى، سونداي- اق بويجەتكەن ادەمى ءۇش قىزى. قىزدارى ەلدەن وقشاۋ، بولەك وسكەن. وقيعا 1970 -جىلدارى حاككاريدە وتەدى. باستى رولدەردى قازاق كورەرمەن جاقىننان تانيتىن فاراح زەينەپ ابدۋللاح، شۇكران وۆالى، سونگۇل ودەن وينايدى. اكە ءرولىن يىلماز ەردوگان سومداعان.

18-25 -قاراشا كۇندەرى ساعات 19:00-دە «كەرۋەن» ساۋدا جانە ويىن-ساۋىق ورتالىعىندا نۇر- سۇلتان قالاسىنىڭ تۇرعىندارى مەن قوناقتارى تۇركيالىق فيلمدەردى تەگىن تاماشالاي الادى. كينوتۋىندىلار ورىس تىلىندەگى سۋبتيترمەن بەرىلەدى.

اۆتور: ايجان سەرىكجان قىزى


باستى سوزدەر: مادةنيةت,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات