قازاق بالەتى لوندون تورىندە ونەر كورسەتتى
كونسەرت وتكەن «كوليزەي» كونسەرتتىك زالىندا ينە شانشار ورىن بولمادى، دەپ حابارلايدى قازاقپارات ءتىلشىسى.
تەاتر كوپشىلىك نازارىنا «شوپەنيانا» جانە «شەحەرەزادا» اتتى ءبىر اكتىلى كلاسسيكالىق شىعارمالاردى ۇسىندى. ونەر ۇجىمىنىڭ گاسترولى قازاقستاننىڭ ۇلى بريتانياداعى ەلشىلىگىنىڭ جانە ق ر مادەنيەت جانە سپورت مينيسترلىگىنىڭ قولداۋىمەن جاستار جىلى جانە «رۋحاني جاڭعىرۋ» باعدارلاماسى اياسىندا ۇيىمداستىرىلدى.
ەكى مىڭنان استام كورەرمەننىڭ قاتارىندا بريتانيالىق ساياسي جانە بيزنەس- يستەبليشمەنت، ديپلوماتيالىق كورپۋس وكىلدەرى جانە بەدەلدى ونەرتانۋشىلار بار. ولار قازاقستاندىق بيشىلەردىڭ شەبەرلىگىن جوعارى باعالادى.
«مەن ومىرىمدە ءبىرىنشى رەت قازاق بالەتىن كورىپ، وتە ەرەكشە اسەرگە بولەندىم. ءبيدىڭ جوعارى ستاندارتى جانە ورىنداۋشىلاردىڭ كاسىبيلىگى تاڭداي قاقتىردى. بۇل شىنىمەن دە كەرەمەت دەمالىس ءارى توسىن سىي بولدى»، - دەدى قوناقتاردىڭ ءبىرى سارا مەيدان. تاعى ءبىر مەيمان لۋيس رودريگەس دە لا سەررا: «ءبارى ادەمى بولدى، قويىلىم تاماشا ءوتتى. قازاق بالەتى وتە كوركەم، ماعان تەحنيكادان باستاپ ءبارى ۇنادى! كونسەرتتىڭ كەرەمەت وتۋىمەن قۇتتىقتايمىن!»، دەدى.
ايتا كەتۋ كەرەك، «شەحەرەزادانى» «كوليزەي» قوناقتارى ءۇشىن يتاليالىق حورەوگراف توني كاندەلورو جاڭاشا ارلەگەن. اۆتور- سيۋريح وپەراسى، كۋبا ۇلتتىق بالەتىندە جانە پاريجدىك «شاتلە» تەاترىندا شىڭدالىپ، الەمگە تانىلعان ونەر جۇلدىزى.
«شوپەنيانا» مەن «شەحەرازادانىڭ» باستى رولدەرىن اباي اتىنداعى قازاق مەملەكەتتىك وپەرا جانە بالەت اكادەميالىق تەاترىنىڭ جەتەكشى سوليستەرى جانەل توكەيەۆا، ماليكا ەلشىبايەۆا، اريسا حاسيموتو، راقىم دايروۆ، دينارا ەسەنتايەۆا جانە ازامات اسقاروۆتار سومدادى.
اۆتور: عالىمجان قارامان ۇلى