ديماش قۇدايبەرگەن جاپونيا تەلەارناسىنا قازاقشا سۇحبات بەردى
بۇل تۋرالى ءانشىنىڭ ءوزى Іnstagram پاراقشاسىنا جازدى، دەپ حابارلايدى قازاقپارات ءتىلشىسى.
«تاريحى تەرەڭ وسىناۋ ەلگە قوناق بولىپ كەلگەنىمە وتە قۋانىشتىمىن»، - دەدى ديماش.
ول ءار ەلدە ونەر كورسەتىپ، وسى دەڭگەيگە جەتىپ وتىرعانى ەڭ الدىمەن ۇستازدارىنىڭ ارقاسى ەكەنىن ايتتى.
«قازاقستاندا تۋىپ، دۇنيە ەسىگىن اشقانىما ەرەكشە قۋانامىن، ماقتان ەتەمىن. الەمنىڭ قاي تۇكپىرىنە بارسام دا، قازاقتىڭ ونەرىن كورىپ وسكەن، قازاقتىڭ سۋىن ءىشىپ، بالىن جەگەن بالا ەكەندىگىمدى ەرەكشە ماقتان تۇتامىن»، - دەدى ديماش.
جاپون جۋرناليستەرى قازاقتىڭ دومبىراسىنا دەگەن تاڭعالىسىن جاسىرا الماي، ديماشتان دومبىرانىڭ سيقىرى نەدە ەكەنىن سۇرادى.
«دومبىرا - قازاقتىڭ جانى، قازاقتىڭ رۋحى. ول جاي اسپاپتان دا ۇلكەن دۇنيە»، - دەدى ديماش.
ءارى رەتى كەلسە، جاپونيادا ۇلكەن كونسەرتىن وتكىزىپ، دومبىرا ۇنىنەن سۋسىنداتۋعا ۋادە بەردى.
اۆتور: نۇرلان تۇياقوۆ