ەلباسىنىڭ كەڭەسشىسى رەسەي مەن ۋكراينا پرەزيدەنتتەرىن قازاقستاندا كەزدەستىرۋ باستاماسىنا قاتىستى پىكىر ءبىلدىردى

نۇر- سۇلتان. قازاقپارات – ق ر تۇڭعىش پرەزيدەنتى - ەلباسىنىڭ كەڭەسشىسى ءادىل تۇرسىنوۆ رەسەي مەن ۋكراينا پرەزيدەنتتەرىن قازاقستاندا كەزدەستىرۋ بويىنشا نۇرسۇلتان نازاربايەۆتىڭ باستاماسىنا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

 «شىنىندا دا، قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ رەسەي فەدەراتسياسىنىڭ پرەزيدەنتى ۆ. پۋتين مەن ۋكراينا پرەزيدەنتى ۆ. زەلەنسكيدى ەكىجاقتى كەزدەستىرۋ تۋرالى باستاماسى كەڭ اۋقىمدا حالىقارالىق رەزونانس تۋدىردى. بۇل ۇسىنىستى نۇرسۇلتان نازاربايەۆ وسى جىلدىڭ 12 - قاراشاسىندا وتكەن «استانا كلۋبىنىڭ» V وتىرىسىندا ايتقان ەدى. ۋكرايناداعى داعدارىس تۋرالى فورۋم مودەراتورىنىڭ سۇراعىنا جاۋاپ بەرە وتىرىپ، تۇڭعىش پرەزيدەنت باۋىرلاس رەسەي مەن ۋكراينا اراسىندا بولىپ جاتقان وقيعالارعا الاڭداۋشىلىعىن ءبىلدىردى. پرەزيدەنت ءوز سوزىندە 2014 -جىلى جۇرگىزگەن باستامالارى جايلى - 2014 -جىلى قازاقستان، فرانسيا، گەرمانيا، رەسەي مەن ۋكراينا كوشباسشىلارىنىڭ تالپىنىسى، وسىنىڭ ارقاسىندا ۆ. پۋتين مەن پ. پوروشەنكونىڭ كەزدەسكەنى، مينسك كەلىسىمىنە جول اشىلعانى تۋرالى ءسوز ەتتى. ونىڭ ۇستىنە تۇڭعىش پرەزيدەنت «استانا كلۋبىنىڭ» ابىرويلى قاتىسۋشىلارىنان «رەسەي مەن ۋكراينا قارىم- قاتىناسىن جاقسارتۋ ءۇشىن كۇش سالۋدى» سۇرادى»، - دەيدى ءادىل تۇرسىنوۆ.

ونىڭ ايتۋىنشا، نۇرسۇلتان نازاربايەۆتىڭ رەسەي- ۋكراينا  سامميتىن وتكىزۋ يدەياسىنىڭ تاقىرىبىنا قايتا ورالا وتىرىپ، بىرنەشە ماڭىزدى تۇستارعا نازار اۋدارۋعا بولادى.

«بىرىنشىدەن، ەلباسى ءوز سوزىندە اتاپ وتكەندەي، ول بۇل باستامانى ۋكراينا پرەزيدەنتى ۆ. زەلەنسكيمەن دە، رەسەي پرەزيدەنتى ۆ. پۋتينمەن دە تالقىلاعان. ياعني، كەلىسسوزدەر كەلىسىلگەن جاعدايدا تاراپتار وعان دايىندالۋى كەرەكتىگى ايقىن شارۋا. ءبىز كەزدەسۋ ءۇشىن كەزدەسۋ ۇيىمداستىرۋدىڭ بولاشاعى جوق دەگەن پىكىردى قولدايمىز. ەكىنشىدەن، نۇرسۇلتان نازاربايەۆ جوعارىدا اتالعان سۇراققا جاۋاپ بەرە وتىرىپ، «نورماند فورماتى» اياسىندا قاتىسۋشى تاراپتاردىڭ ماسەلەنى العا جىلجىتۋ ءىسىن قولدادى. ياعني، بۇل ءتورت جاقتى فورماتتاعى كەزدەسۋدى «تەت- ا- تەت» كەلىسسوزدەرمەن الماستىرۋ نەمەسە ءبىرىنشى كەزدەسۋگە دەيىن وتكىزۋ تۋرالى اڭگىمە جوق. باسقاشا ايتقاندا، «نورماند فورماتى»، مينسك پلاتفورماسى جانە تىكەلەي رەسەي- ۋكراينا كەلىسسوزدەرى ءبىر- بىرىنە ۇقسامايدى، جالپى پروتسەستىڭ قۇرامداس بولىگى بولا الادى»، - دەيدى ول.

ءادىل تۇرسىنوۆ استانا كلۋبىنداعى سويلەگەن سوزىندە ەلباسى «ەگەر وسى كەلىسسوزدەر ءۇشىن بەيتاراپ الاڭ قاجەت بولسا، مەن قازاقستاندى ۇسىنامىن» دەپ اتاپ وتكەنىن ەسكە سالدى.

«سونىمەن قاتار، تۇڭعىش پرەزيدەنت بىرنەشە رەت قازاقستان تاراپى ءۇشىن مۇنداي كەلىسسوزدەردى قاي استانادا جۇرگىزۋگە بولاتىندىعى - قاعيداتتى ۇستانىم ەمەس ەكەنىن ايتقان بولاتىن. تورتىنشىدەن، كورىپ وتىرعانىمىزداي، نۇرسۇلتان نازاربايەۆتىڭ «رەسەي جانە ۋكراينا پرەزيدەنتتەرىنىڭ جەكە كەزدەسۋى» تۋرالى باستاماسىن كوپتەگەن الەمدىك ساياساتكەرى مەن ساراپشىسى قولدايدى»، - دەدى ول.

ەلباسىنىڭ كەڭەسشىسى رەسەي- ۋكراينا كۇن تارتىبىندە «نورمان فورماتىنىڭ» نەگىزگى تاقىرىپتارىنا كىرمەيتىن، ماسكەۋ مەن كيەۆتىڭ تىكەلەي ديالوگى ارقىلى شەشىلەتىن ءبىرقاتار ماڭىزدى ماسەلەلەردىڭ بارىن دا تىلگە تيەك ەتتى.

«قورىتىندىلاي كەلە، تۇڭعىش پرەزيدەنتتىڭ جوعارىدا اتالعان ۇسىنىسى ونىڭ ءساتتى، ۇزاق مەرزىمدى جانە جان- جاقتى بىتىمگەرشىلىك ساياساتىنىڭ جالپى باعىتى دەپ ءتۇسىنۋ كەرەك. بۇل جولى ۋكراينا باعىتى ماڭىزدى بولىپ وتىر. حالىقارالىق قاۋىمداستىق ەلباسىنىڭ ۇستانىمىن بىلەدى: ياعني، داعدارىستى بەيبىت جولمەن شەشۋدىڭ بالاما ءادىسى جوق، تەك ديالوگ پەن كەلىسسوزدەر قاقتىعىستاردى شەشە الادى»، - دەپ ءتۇيدى كەڭەسشى.

اۆتور: ايان بەكەن ۇلى