ەندى گازبەن جۇرەتىن كولىكتەر پاركينگكە قويىلمايدى
جىل سوڭىنا دەيىن وسىنداي شەشىم قابىلدانباق. بۇل تۋرالى ەلىمىزدىڭ توتەنشە جاعدايلار كوميتەتىنىڭ ءتوراعاسى ۆلاديمير بەككەر مالىمدەدى. ونىڭ ايتۋىنشا، سوڭعى ۋاقىتتا گاز باللون ورناتقان كولىكتەردىڭ جارىلۋى جيىلەپ كەتكەن.
مۇنداي كولىكتەر قازىر تۇرعىن ۇيلەردىڭ جەر استى تۇراقتارىنا دا، ساۋدا- ويىن- ساۋىق ورتالىقتارىنا دا ەمىن- ەركىن كىرىپ ءجۇر. جۇرگىزۋشىلەردىڭ كوبى ارزان باعاسىنا قىزىعىپ، ءداستۇرلى وتىننان گازعا كوشە باستاعان. ساپاسىز باللون ورناتىپ العاندا، قاۋىپ تۋرالى ويلامايدى دەيدى. جالپى كۇن سۋىتقالى بەرى اۆتوكولىكتەردىڭ وتقا ورانۋى جيىلەگەن. تەك وتكەن اپتادا عانا اۆتوكولىكتەردىڭ ورتەنۋىنىڭ 68 جاعدايى تىركەلدى.
ۆلاديمير بەككەر، ق ر ءى ءى م توتەنشە جاعدايلار كوميتەتىنىڭ ءتوراعاسى:
- گازدان بولاتىن قاۋىپتىڭ الدىن الۋ ماقساتىندا ءبىز ەرەجەلەردىڭ، سونىڭ ىشىندە قۇرىلىس ەرەجەلەرىنىڭ تالاپتارىنا ءتيىستى وزگەرىستەر ەنگىزۋ قاجەتتىگىن ويلاستىردىق. سەبەبى گاز بەنزينگە قاراعاندا قاۋىپتى. اسىرەسە، كولىك جەر استى تۇراعىندا تۇرسا، قاۋىپ ۇلعايا تۇسەدى.
جارىلىس بولعان جاعدايدا سالدارى وتە اۋىر بولادى. ۇلكەن عيمارات قيراۋى مۇمكىن. گاز جابدىعى بار اۆتوموبيلدەردىڭ جەر استى پاركينگتەرىنە كىرۋىنە تىيىم سالۋ تۋرالى ۇسىنىس جاساپ جاتىرمىز.