17:48, 18 - قاراشا 2019 | GMT +6
يتاليادا تاۋدان قۇلاعان كوشكىن پويىزدى رەلستەن شىعارىپ جىبەردى
نۇر- سۇلتان. قازاقپارات - يتاليانىڭ سولتۇستىگىندە لاي كوشكىنى ءجۇرىپ بارا جاتقان پويىزدى رەلستەن شىعارىپ جىبەردى. بۇل تۋرالى جەرگىلىكتى باسىلىمدار جازدى، دەپ حابارلايدى «قازاقپارات» ح ا ا.
Тgcom24 تەلەارناسىنىڭ حابارلاۋىنشا، دۇيسەنبىنىڭ تاڭىندا فورتەتستسا قالاسىنان برۋنيكوعا بارا جاتقان پويىز بولتسانو پروۆينتسياسىندا تاۋدان قۇلاعان لاي كوشكىنىنىڭ ەكپىنىنەن رەلستەن شىعىپ كەتكەن.
بولتسانو پروۆينتسياسى باسپا ءسوز جانە بايلانىس اگەنتتىگى Twitter پاراقشاسىندا وقىس وقيعادان ەشكىم زارداپ شەكپەگەنىن مالىمدەدى. شۇعىل جەتكەن قۇتقارۋشىلار جولاۋشىلاردى ءقاۋىپسىز جەرگە ءدىن امان جەتكىزگەن.
ايتا كەتەيىك، قازىر يتاليانىڭ سولتۇستىگىندە اۋا رايى قولايسىز بولىپ تۇر. وتكەن اپتادا ترەنتينو- التو- اديدجە وبلىسىندا جاۋعان قالىڭ قار ەلەكتر جەلىلەرى مەن كولىك بايلانىسىنا ايتارلىقتاي زيان كەلتىرگەن. وڭىردە تەمىرجول قوزعالىسى ۋاقىتشا توقتاتىلدى.