سەرىك بەردىمۇرات ۇلى سامبودان الەم چەمپيوناتىنىڭ قولا جۇلدەگەرى اتاندى - شەتەلدەگى قازاق ءتىلدى ب ا ق- قا شولۋ
سەرىك بەردىمۇرات ۇلى سامبودان الەم چەمپيوناتىنىڭ قولا جۇلدەگەرى اتاندى - kaznews.mn
سامبودان وڭتۇستىك كورەيانىڭ چونجۋ قالاسىندا وتكەن الەم چەمپيوناتىندا سەرىك بەردىمۇرات ۇلى قولا جۇلدەگەر اتاندى، دەپ جازادى موڭعوليانىڭ KAZNEWS اقپاراتتىق پورتالى.
اتالعان ب ا ق- تىڭ جازۋىنشا، 100 كەلى سالماقتا كۇرەسكەن سەرىك بەردىمۇرات ۇلى العاشقى كەزدەسۋىندە تۇرىكمەنستاندىق رۋسلان ەسگەروۆتى ۇتقان. ەكىنشى كەزدەسۋىندە ۋكرايندىق سپورتشى الەكسەي مويسيەۆتى جەڭىپ، جارتىلاي فينالعا جولداما العان. ءبىراق، جارتىلاي فينالدا رەسەيلىك رۋسلان كيسەليەۆتەن ۇتىلىپ، قولا جۇلدەنى قاناعات تۇتقان.
ەستەرىڭىزگە سالا كەتەيىك، سەرىك بەردىمۇرات ۇلى بايان- ولگەي ايماعىندا تسەنگەل اۋىلىندا دۇنيەگە كەلگەن. ول سپورتپەن ون جاسىنان بەرى شۇعىلدانادى. سۋمو، سامبو، موڭعول كۇرەسى جانە دزيۋدومەن اينالىسادى. كوپتەگەن جارىستاردىڭ جەڭىمپازى.
قازاقستان مەن قىتاي بىرلەسىپ تۇسىرگەن «كومپوزيتور» فيلمى ا ق ش-تا 4 نوميناتسيا بويىنشا ماراپاتتالدى - «جەنمين جيباو» (People Daily)
قازاقستان مەن قىتاي بىرلەسىپ تۇسىرگەن «كومپوزيتور» فيلمى لوس-انجەلەس قالاسىندا وتكەن 4- كەزەكتى «Golden screen awards» كينوفەستيۆالندە 4 نوميناتسيا بويىنشا ماراپاتتالدى، دەپ حابارلايدى kazakh.people.com.cn سايتى.
اتالعان ب ا ق- تىڭ جازۋىنشا، ا ق ش-تا وتكەن كينوفەستيۆالندە «كومپوزيتور» ءفيلمى جىلدىڭ «ەڭ ۇزدىك كينوسى»، «ەڭ ۇزدىك مۋزىكا»، «ەڭ ۇزدىك ەر ادام ءرولى» جانە «ەڭ ۇزدىك ايەل ءرولى» سىندى 4 نوميناتسيا بويىنشا ماراپاتتالعان. اتالعان فيلمدە باقىتجان بايقاداموۆتىڭ قارىنداسى داناشتى سومداعان قازاقستاندىق اكتريسا ارۋجان جازىلبەكوۆا «ەڭ ۇزدىك ايەل ءرولى» سىيلىعىن جەڭىپ الدى. ماراپاتتاۋ شاراسىنا گولليۆۋدتىڭ تانىمال رەجيسسەرلەرى مەن بەلگىلى ونەر قايراتكەرلەرى قاتىسقان. بۇل «Golden screen awards» كينوفەستيۆالن China Film Co Production كورپوراتسياسى، Hollywood Reporter جانە امەريكا كينو قاۋىمداستىعىنىڭ قولداۋىمەن 2016 -جىلدان بەرى وتكىزىلىپ كەلەدى. شارانىڭ باستى ماقساتى - قىتايلىق جانە شەتەلدىك كينو ستۋديانىڭ بىرىگىپ تۇسىرگەن ۇزدىك كينولارىن ماراپاتتاۋ.
ەسكە سالايىق، اتالعان فيلم الەمدىك ونەرگە ەلەۋلى ۇلەس قوسقان قىتايدىڭ تانىمال كومپوزيتورى سي سينحايدىڭ ءومىرى مەن ونەر جولىنا ارنالعان. ەكىنشى دۇنيەجۇزىلىك سوعىس جىلدارىندا (1941-1943 -جىلدار ارالىعىندا) كومپوزيتور قازاقستاندا تۇرىپ، قازاقتىڭ تالانتتى كومپوزيتورى باقىتجان بايقاداموۆپەن دوس بولعان. فيلمدى ش. ايمانوۆ اتىنداعى «قازاق فيلم» كينوستۋدياسى جانە قىتايلىق «Shineworks Pictures»، «China film coproduction corporation» كومپانيالارى بىرگە تۇسىرگەن.
قازاقستاننىڭ ەۋرازيا ۋنيۆەرسيتەتى زاريفكە «قۇرمەتتى پروفەسسور» اتاعىن بەردى - «فارس» اقپارات اگەنتتىگى
«قازاقستانعا ساپارمەن بارعان يران سىرتقى ىستەر ءمينيسترى مۇحامماد دجاۆاد زاريف قازاقستان استاناسى نۇر- سۇلتانداعى ەۋرازيا ۇلتتىق ۋنيۆەرسيتەتىنىڭ مۇراجايىن ارالاپ، ەستەلىك داپتەرىنە پىكىر قالدىردى. زاريف بۇل جوعارى وقۋ ورنىنىڭ ۇستازدارى مەن ستۋدەنتتەرىنىڭ ورتاسىندا «قازىرگى الەمدەگى جاڭا پاراديگمالار مەن ديسكۋرستار» تاقىرىبىنا ءسوز سويلەپ، ستۋدەنتتەردىڭ سۇراقتارىنا جاۋاپ بەردى. سونداي- اق، ەۋرازيا ۇلتتىق ۋنيۆەرسيتەتى يران سىرتقى ىستەر مينيسترىنە «قۇرمەتتى پروفەسسور» اتاعىن تابىستادى. يران سىرتقى ىستەر ءمينيسترى «استانا كلۋبىنىڭ» بەسىنشى وتىرىسىنا قاتىسۋ ءۇشىن قازاقستانعا بارعان بولاتىن»، - دەپ جازادى parstoday.
كوكتوعايدا «التاي اتبەگى كۋبوگى» الامان بايگەسى ءوتتى - «التاي اقپارات» سايتى
«التاي اتبەگى كۋبوگى» الامان ات بايگەسى قىتايدىڭ التاي ايماعىنىڭ كوكتوعاي اۋدانىندا ءوتتى، دەپ حابارلايدى altxw.com سايتى.
«التاي اتبەگى كۋبوگى» الامان ات بايگەسى التاي ايماقتىق اۋىل شارۋاشىلعى باسقارماسى مەن سپورت جانە مادەنيەت باسقارماسىنىڭ جانە كوكتوعاي اۋدانى اكىمدىگىنىڭ قولداۋىمەن ءوتتى. اتالعان جارىستا 3 شاقىرىمدىق قۇنان بايگە، 25 شاقىرىمدىق الامان بايگە، 5 شاقىرىمدىق جورعا جارىسى وزدىرىلدى. سونداي-اق، تەڭگە ءىلۋ، كوكپار تارتۋ سەكىلدى قازاقتىڭ ءداستۇرلى ات سپورتى ويىندارى دا ۇيىمداستىرىلدى. جەرگىلىكتى ورىن وسىنداي ات سپورتى شارالارىن ءجيى وتكىزۋ ارقىلى جەرگىلىكتى «التاي جىلقىسىنىڭ» قاسيەتىن جۇرتقا ناسيحاتتاپ، جىلقى شارۋاشىلىعىن دامىتۋدى جولعا قويماق. سونىمەن بىرگە، ۇلتتىق مادەنيەتتى دارىپتەي وتىرىپ التاي جەرىنە كەلەتىن تۋريستەردىڭ قىزعۋشىلىعىن ارتتىرۋدى كوزدەپ وتىر»، - دەپ جازادى «التاي اقپارات» سايتى.
تۇرىك كەڭەسىنىڭ باس حاتشىسى اتاتۇرىكتى ەسكە الدى - TRT
تۇرىك كەڭەسىنىڭ باس حاتشىسى باعدات امىرەيەۆ مۇستافا كەمال اتاتۇرىكتىڭ ومىرگە كوز جۇمعاندىعىنىڭ 81 جىلدىعىنا وراي ەسكە الۋ ۇندەۋىن جاريالادى، دەپ جازادى تۇركيا راديو تەلەۆيزيا پورتالى.
تۇرىك كەڭەسىنىڭ باس حاتشىسى باعدات امىرەيەۆ تۇركيا رەسپۋبليكاسىنىڭ قۇرۋشىسى گازي مۇستافا كەمال اتاتۇرىكتىڭ ومىرگە كوز جۇمعاندىعىنىڭ 81 جىلدىعىنا وراي ەسكە الۋ ۇندەۋىن جاريالادى.
«تۇركيا رەسپۋبليكاسىنىڭ قۇرۋشىسى جانە تۇڭعىش پرەزيدەنتى مۇستافا كەمال اتاتۇرىك قۇرعان تۇركيا رەسپۋبليكاسى الەم بەيبىتشىلىگىنە جانە ساياسي تارتىپكە قوسقان يدەولوگيالىق ۇلەستەرى، توڭكەرىسشىل وي- پىكىرلەرى جانە وسكەلەڭ ليدەرلىك ەرەكشەلىكتەرىمەن 20- عاسىرعا تاڭبا باستى، كۇللى الەم ەلدەرى ءۇشىن تەرەڭ شابىت قاينارى بولدى جانە مۇنى جالعاستىرىپ كەلەدى. اتاتۇرىكتىڭ رەفورماشىل وي- پىكىرلەرى نازارعا الىنىپ، ەسكە تۇسىرۋگە وراي بۇگىن تۇرىك كەڭەسىندەگى بارلىق جولداستارمەن بىرگە تۇرىك ۇلتىنىڭ اتاسىن قۇرمەت كورسەتىپ جانە بورىشتىلىقپەن ەسكە الامىن»، - دەيدى ءوز ۇندەۋىندە باعدات امىرەيەۆ.
بايان- ولگەي ايماعىنىڭ حالىق سانى 2045 -جىلى 162 مىڭعا جەتەدى
سوڭعى ستاتيستيكالىق مالىمەت بويىنشا بايان- ولگەي ايماعىنىڭ جەرگىلىكتى حالقىنىڭ سانى 105590 ادامعا جەتكەن، دەپ جازادى موڭعوليانىڭ KAZNEWS اقپاراتتىق پورتالى.
اتالعان ب ا ق- تىڭ جازۋىنشا، موڭعوليا ەلىندەگى قانداستارىمىز شوعىرلى قونىستانعان بايان- ولگەي ايماعىنىڭ جەرگىلىكتى حالقىنىڭ سانى بولجام بويىنشا 2025 -جىلى 105753، 2030 -جىلى 122200، 2035 -جىلى 133361، 2040 -جىلى 145126، 2045 -جىلى 162421 گە جەتىپ، حالىق سانى بويىنشا ۇلانباتىر قالاسى مەن حوۆسگول ايماعىنان كەيىن ءۇشىنشى ورىننان كورىنگەن.
«ۇلتتىق ستاتيستيكا كوميتەتىنىڭ مالىمەتتەرىنە سۇيەنە وتىرىپ زەرتتەپ كورسەك، 1991 -جىلى حالىق سانى 99063 ادامعا جەتسە، 1994 -جىلى 76163 ادام بولعان. بۇل جىلدارى حالىق سانى 22 مىڭ 900 ادامعا ازايعان. 2001-2016 -جىلدارى بايان- ولگەي ايماعىنىڭ حالىق سانى 828 ادامعا عانا وزگەرەدى. ال، بۇل جىلدارى 20 مىڭعا جۋىق ادام وزگە ولكەلەرگە قونىس اۋدارعان. 2001 -جىلى حالىق سانى 3,1 پايىزعا ءوسىپ 96 مىڭ 988 ادامعا جەتسە، 2004 -جىلى 99 مىڭ 111 گە جەتكەن. 2005 -جىلى بايان- ولگەيدەن قونىس اۋدارعان ادام سانى 3068 بولا تۇرا، كوشىپ كەلگەن ادام سانى 5 عانا. بۇل 99,1 مىڭ ادامنان 95,8 مىڭعا كەمۋىنە تىكەلەي اسەر ەتكەن. 2013 -جىلدان باستاپ حالىق ءوسىمىنىڭ وڭ قارقىنى ساقتالىپ كەلەدى. سوڭعى جىلدارى ءوسىم قارقىنى 2,5 پايىزدى قۇرادى»، - دەپ جازادى KAZNEWS.
قازاقستان جانە وزبەكستان ۇلتتىق گۆارديا قولباسشىلارى كەزدەستى - «ءوزا» اقپاراتتىق اگەنتتىگى
قازاقستان رەسپۋبليكاسى ۇلتتىق گۆارديا باس قولباسشىسى، گەنەرال- لەيتەنانت رۋسلان جاقسىلىقوۆ باستاعان دەلەگاتسيا مۇشەلەرى وزبەكستانعا ساپارمەن كەلدى، دەپ جازادى وزبەكستاننىڭ «ءوزا» مەملەكەتتىك اقپاراتتىق اگەنتتىگى.
«ساپار اياسىندا وزبەكستان رەسپۋبليكاسى ۇلتتىق گۆارديا قولباسشىسى باحودير تاشماتوۆ قازاقستان رەسپۋبليكاسى ۇلتتىق گۆارديا باس قولباسشىسى رۋسلان جاقسىلىقوۆپەن ەكى جاقتىق كەزدەسۋ وتكىزدى. كەزدەسۋ بارىسىندا ەكىجاقتى ىنتىماقتاستىقتى ودان ءارى دامىتۋ، ءوزارا تاجىريبە الماسۋ اياسىندا بىرلەسكەن وقۋ- تاجىريبەلىك ساباقتار وتكىزۋ ماسەلەلەرى تالقىلاندى»، - دەپ حابارلايدى «ءوزا».
اۆتور: باقىتجول كاكەش