اۋىزسۋ ماسەلەسى مەملەكەتتىڭ قاۋىپسىزدىك دەڭگەيىنە دەيىن تەڭەستىرىلەدى – ب ۇ ۇ
بۇل تۋرالى ب ۇ ۇ ۇيىندە تۇراقتى دامۋ ماقساتتارىن قارجىلاندىرۋ ماسەلەلەرى بويىنشا ءبىرىنشى ايماقتىق سامميتتە ايتىلدى.
قازاقستان بۇكىل الەمدىك بانكتىڭ باعالاۋى بويىنشا جاھاندىق كليماتتىق وزگەرىستەرگە بەيىم ەلدەر قاتارىنا جاتقىزىلدى.
زەرتتەۋ جۇمىستارىنا سايكەس، قازاقستان 20 ميلليارد تەكشە مەتر سۋ جۇمسايتىنى انىقتالدى. ونىڭ 14 ميلليارد تەكشە مەترى (%68) اۋىلشارۋاشىلىعى ونىمدەرىن سۋارۋعا باعىتتالادى. 2 ميلليارد تەكشە مەترى وندىرىسكە جۇمسالادى. 1 ميلليارد تەكشە مەتر سۋ كوممۋنالدىق ماقساتقا پايدالانىلادى.
سۋ رەسۋرستارىنىڭ ازايۋىنا بايلانىستى 2030 -جىلعا تامان سۋ تاپشىلىعى - 14 ميلليارد تەكشە مەترگە (!%70)، 2050 -جىلى 20 ميلليارد تەكشە مەترگە جەتەدى. وعان كليماتتىق وزگەرىستەرگە بايلانىستى سۋ رەسۋرستارىنىڭ ازايۋىن تاعى قوسۋعا بولادى. ەگەر، تۇتىنۋدىڭ وسى سحەماسى وزگەرمەسە، اۋىزسۋ ماسەلەسى - ۇلتتىق قاۋىپسىزدىك دەڭگەيىنە دەيىن تەڭەستىرىلەدى.
ەگەر سەناري وسى قالىپتان وزگەرمەسە 2030 -جىلعا تامان جىلىنا 7-8 ميلليارد دوللار شىعىن كەلەدى.
ب ۇ ۇ باستاماسىمەن قۇرىلعان تۇراقتى دامۋ ماقساتتارىندا وسى باعىتتا بىرنەشە مىندەت مەجەلەنگەن.
قۇجاتتا كورسەتىلگەن 12 ماقسات، 169 مىندەت، 300 ۇساق ينديكاتوردى كەز- كەلگەن مەملەكەت جاۋاپكەرشىلىكپەن ورىنداۋى ءتيىس.
تۇراقتى دامۋ ماقساتتارى حالىقارالىق دەڭگەيدە بەكىتىلگەن كونتسەپتسيالاردا جاريالانعان. بۇل تۇجىرىمدامالار جەر بەتىندەگى ورتاق ەكولوگيالىق، الەۋمەتتىك- ەكونوميكالىق پروبلەمالاردى شەشۋگە باعىتتالعان. ەكى كۇنگە سوزىلاتىن سامميت وسى ماسەلەنىڭ شەشۋ جولدارىن قاراستىرماق.
قازاقستاننىڭ جەكەلەگەن دامۋ كورسەتكىشتەرىنىڭ تالداۋىنا سۇيەنسەك، وتكەن جىلدارمەن سالىستىرعاندا كوپ كورسەتكىشتە ىلگەرىلەۋ بار. ماسەلەن كەدەيلىك كورسەتكىشى 1996 -جىلى %34,6 بولسا، 2018 -جىلى %4,7 بولعان. ادامنىڭ دامۋ يندەكسىندە قازاقستان الەمنىڭ 189 مەملەكەتىنىڭ ىشىندە 58-ورىندا تۇر. 2019 -جىلى قازاقستان «Doing Business» رەيتينگىسىنىڭ بيزنەستى جۇرگىزۋ جەڭىلدىگى كورسەتكىشى بويىنشا 190 ەلدىڭ ىشىنەن 25-ورىنعا تابان تىرەدى.
اۆتور: گۇلميرا عوسمانالي