قازىرگى زامان قاھارمانى: قىزدى قۇتقارىپ كوز جۇمعان پوليتسەيدىڭ اناسى ماراپاتتالدى
اقتوبەگە نۇر -سۇلتان، الماتى، شىمكەنت قالالارى مەن اتىراۋ، اقمولا، پاۆلودار، تۇركىستان ، سولتۇستىك قازاقستان وبلىستارىنان پوليتسيا قىزمەتكەرلەرى شاقىرىلدى. ولار ءوز ءومىرىن قاۋىپ- قاتەرگە تىگىپ، ازاماتتاردى اجالدان امان الىپ قالعان بۇگىنگى كۇننىڭ باتىرلارى. بارلىع 15 قىزمەتكەر وبلىس اكىمى وڭداسىن ورازالين مەن ق ر ءى ءى م كادر ساياساتى دەپارتامەنتى باستىعىنىڭ ورىنباسارى باقىتجان بەيسەيەۆتىڭ ىشكى ىستەر ءمينيسترى اتىنان العىس حات تاپسىرىلدى.
«ەرلىك ەش ۋاقىتتا ۇمتىلمايدى. بۇگىنگى اكتسيانىڭ ماقساتى ەرلىك پەن باتىرلىقتى ناسيحاتتاۋ. وسكەلەڭ جاس ۇرپاققا وتانسۇيگىشتىك سەزىم مەن پاتريوتتىق رۋحتى بەرۋ. دامۋ - تۇراقتىلىق پەن تىنىشتىق كەزىندە عانا بولادى. قوعامداعى ۇيلەسىمدىلىكتىڭ ماڭىزى زور. مارتەبەلى ءىس جاساپ جۇرگەن پوليتسيانىڭ قىزمەتى قاۋىپ پەن قاتەرگە تولى ەكەنى جاسىرىن ەمەس. قوعامنىڭ تىنىشتىعى جولىندا وزدەرىن قۇربان ەتكەن باتىرلارىمىز از ەمەس»، - دەپ اتاپ ءوتتى وبلىس باسشىسى وڭداسىن ورازالين.
اكسيا كەزىندە ماڭعىستاۋ وبلىسىندا ءوز- وزىنە قول جۇمساماق بولعان قىزدى قۇتقارماق بولعان پوليتسيا قىزمەتكەرلەرى شالقار اقىمعالييەۆتىڭ اناسى دا ماراپاتتالدى.
ەسكە سالا كەتسەك، اتىراۋدا پوليتسيا سۋعا باتقان ايەلدى قۇتقارام دەپ مەرت بولعان ەدى.
«بالامنىڭ ارمانى پوليتسيا قىزمەتكەرى بولۋ ەدى. ول سول سالادا ءبىلىم الىپ، انتىنا بەرىك بولدى. ادام ءومىرىن قۇتقارامىن دەپ ءوز ءومىرىن قيدى. بالام قازىر ارامىزدا جوق. ۇلىم جوق بولسا دا «باتىر انا» دەپ شاقىرعاندارىڭىزعا العىس ايتامىن. باتىر ۇلدارىمىز كوبەيە بەرسىن»، - دەدى اناسى ءلاززات ماجەن قىزى.
قازاقستان پوليتسياسىنىڭ تاريحىندا ەلدەگى بەيبىتشىلىك پەن تىنىشتىق ءۇشىن ءومىرىن قيعان ارىپتەستەرىمىزدىڭ ەرلىك ۇلگىلەرى از ەمەس. ەلىمىز تاۋەلسىزدىك العاننان بەرى قىزمەت بابىندا 790 قۇقىق قورعاۋ سالاسىنىڭ قىزمەتكەرى ەرلىكپەن قازا تاپسا، سونىڭ توعىزى اقتوبە وبلىسىنان.
«قازىرگى جاعدايدا مەملەكەت پەن قوعام پوليتسيا قىزمەتكەرلەرىنە جاڭا تالاپتار قويادى. بۇل رەتتە باستى نازار اۋداراتىن نارسە حالىقتىڭ ىشكى ىستەر ورگاندارىنا دەگەن سەنىمى بولىپ تابىلادى. وسىنى ەسكەرە وتىرىپ، ءبىز ۋاقىت تالاپتارىنا جاۋاپ بەرەتىن قازاقستاندىق پوليتسيا قىزمەتكەرىنىڭ جاڭا كەلبەتىن قالىپتاستىرۋ بويىنشا جۇمىستى تۇبەگەيلى قايتا قۇرۋعا نيەتتىمىز»، - دەدى پوليتسيا پولكوۆنيگى باقىتجان بەيسەيەۆ.
اۆتور: التىناي ساعىندىقوۆا