بالا ەكپەدەن قورىقپاۋى ءۇشىن

نۇر-سۇلتان. قازاقپارات - بالا كەزىڭىزدە ءسىزدىڭ دە اتا- اناڭىز دارىگەر كابينەتىنىڭ الدىندا: «شىدا، ۋكولدى اۋىرتپاي سالادى، تەك ماسا شاققان سياقتى شىم ەتەدى، بولدى» دەپ الداۋسىراتتى ما؟

ءبىراق ءسىز بىرنەشە مينۋتتان كەيىن الدانعانىڭىزدى ءبىلىپ، ءبىراز ۋاقىت بويى اق حالاتتى ادامدى، پىسپەنى كورسەڭىز قورقىپ قاشىپ ءجۇردىڭىز، سولاي ما؟ ءتىپتى بالالىق شاقتان قالعان قورقىنىشتى ەسەيگەندە دە جەڭە الماعان ادامدار بار.

بالاعا ءتۇسىندىرۋ

 ءتىپتى ەكى جاسار بالا بولسا دا، ونى «ماسامەن» الداماي، شىندىقتى ايتىپ تۇسىندىرۋگە بولادى. «بالام، قازىر ساعان ەكپە سالادى (ساۋساعىڭنان قان الادى) ، سوندا سەن ەشقانداي اۋرۋعا شالدىقپايسىڭ. ساعان جاقسىلىق ويلاعاندىقتان وسى جەرگە كەلدىك. مەن جانىڭدا بولامىن» ، «ءسال عانا اۋىرادى، جىلاماي شىداساڭ بىرنەشە سەكۋندتا اۋىرعانى بىردەن باسىلادى» دەگەن سەكىلدى سوزدەرمەن بالانى دايىنداۋعا بولادى. پروتسەستى رەت- رەتىمەن ايتىپ شىقساڭىز دا ارتىق ەتپەيدى. الدىمەن دارىگەرگە كىرەمىز، ول سەنىڭ قولىڭدى ۋقالايدى، سودان كەيىن ۋكول سالادى، ودان سوڭ اۋىرعانى باسىلسىن دەپ قىزىل داكە جابىستىرادى، بولدى، شىقاننان كەيىن ەكەۋمىز وينايمىز دەگەن سەكىلدى سوزدەردى ايتىپ قويساڭىز ول الدىن الا قورىقپاي، تىنىشتالادى.

دەم بەرۋ

«جارايسىڭ، جاقسى شىدادىڭ» ، «نە دەگەن باتىل بالا ەدىڭ» ، «ازداپ قورىقساڭ دا ۋكولدان قاشپاي سالعىزۋدىڭ ءوزى ەرلىك» ، «قانداي باتىل ەكەنىڭدى مىندەتتى تۇردە اكەڭە ايتامىز» - دەگەن سەكىلدى ماقتاۋ سوزدەردىڭ ءوزى قۇشاقتاۋ سەكىلدى بىردەن جانىن تىنىشتاندىرادى.

 باتىلدىعى ءۇشىن ماراپاتتاۋ

 ۋكول سالعىزۋدان الدىن الا بالا جاقسى كورەتىن ءتاتتىنى نە جاڭا ويىنشىقتى الىپ قويىپ، ۋكول سالعاننان كەيىن بەرۋگە بولادى. كەي ەمحانالاردا بالا قان تاپسىرعاننان كەيىن وعان ۇرلەنەتىن شار نە پەچەنە بەرەدى. ال ءسىز باراتىن مەكەمەدە ونداي جاعداي قاراستىرىلماعان بولسا، بالاڭىزعا كورسەتپەي توسىن سىيىڭىزدى الدىن الا دارىگەرگە تاپسىرىپ قويۋعا بولادى.

 نازارىن باسقاعا اۋدارۋ

«اۋىردى ما؟ وتكەن جولى ەكەۋمىز كورگەن مۋلتفيلم ەسىڭدە مە؟ سوندا مىسىق قىزىق مياۋلاپ ەدى عوي» ، «ءماسساعان، قاراشى، شكافتان تىشقان قاشىپ شىقتى» - وسىلاي بالانىڭ نازارىن باسقاعا اۋدارۋعا تىرىسۋ ءتاسىلى جاقسى كومەكتەسەدى. ول ءۇشىن بالاڭىزدىڭ جاسى كىشى، ءالى تولىق ەسىن بىلمەيتىن بولۋى كەرەك.

پروتسەسكە قىزىقتىرۋ

كەي اتا- انا وبرازدى ەرتەگى قۇراستىرادى: ساۋساقتان قان الىپ جاتقاندا - «انە، پويىزدار كەتىپ بارا جاتىر، پۋ- ۋ- ۋپ» . بولماسا: «دارىگەر ۋكول سالعاندا سەنىڭ ىشىڭە ميكروروبوتتار كىرەدى، ولار سەنى ۇنەمى قورعاپ جۇرەدى، وسىلايشا سەن سۋپەر كۇشتى قاھارمانعا اينالاسىڭ» .

 پوزيتيۆكە شاقىرۋ

ال ەندى ءبىر اتا- انا بالاعا ۋكولدىڭ اۋىرتاتىنىن ايتىپ اۋرە بولمايدى. دارىگەرلەرگە بالانىڭ وڭ كوزقاراسىن قالىپتاستىرۋ ءۇشىن مەديتسينالىق قۇرالداردان قۇرالعان ويىنشىق ساتىپ الىپ، بالا ءوزى دارىگەر بولىپ ويناۋىنا مۇمكىندىك جاسايدى. ياعني قولىنا ويىنشىق ۋكولدى الىپ، اتا- اجەسىنە، اتا- اناسىنا، باۋىرلارىنا ەكپە جاساپ شىعادى.

Massaget.kz