مەملەكەت باسشىسى ازيا دامۋ بانكىنىڭ پرەزيدەنتىن قابىلدادى
قاسىم- جومارت توقايەۆ تاكەحيكو ناكاوعا ءىلتيپات ءبىلدىرىپ، قازاقستان مەن ازيا دامۋ بانكىنىڭ اراسىنداعى ارىپتەستىكتىڭ 25 جىلدىعىمەن قۇتتىقتادى.
«قازاقستان ۇكىمەتى مەن ازيا دامۋ بانكى اراسىنداعى ىنتىماقتاستىقتى دامىتۋعا قوسقان ۇلەسىڭىز ءۇشىن ريزاشىلىق بىلدىرەمىز. بانكتىڭ ەل ەكونوميكاسىنىڭ وركەندەۋىنە اتسالىسۋى وتە ماڭىزدى. ءبىز مۇنى جوعارى باعالايمىز» ، - دەدى پرەزيدەنت.
ازيا دامۋ بانكىنىڭ پرەزيدەنتى مەملەكەت باسشىسىنىڭ قازاقستان حالقىنا ارناعان جولداۋىمەن تانىس ەكەنىن جەتكىزىپ، اتالعان ستراتەگيالىق قۇجاتتىڭ نەگىزگى بولىمدەرىنە، اسىرەسە، ونىڭ الەۋمەتتىك ماڭىزىنا وڭ باعاسىن بەردى. ونىڭ ايتۋىنشا، جولداۋدىڭ ماقساتى مەن مىندەتى ازيا دامۋ بانكىنىڭ دامۋ باسىمدىقتارىمەن ۇيلەسەدى.
«ءسىز جولداۋىڭىزدا ادامداردىڭ تۇرمىس ساپاسىن جاقسارتۋعا جانە مۇعالىمدەردىڭ جالاقىسىن ارتتىرۋعا زور كوڭىل ءبولدىڭىز. بۇل - ادام كاپيتالى دامۋىنىڭ ماڭىزدى بولىگى. ءبىز بۇل باعىتتاعى جۇمىستاردى ءارقاشان قولدايمىز» ، - دەدى تاكەحيكو ناكاو.
