جەكەلەگەن ازاماتتاردىڭ «مەنىڭ ءالىپبيىم قابىلدانادى» دەۋى قاتە پىكىر - ۆيتسە-مينيستر
بۇل تۋرالى ق ر مادەنيەت جانە سپورت ۆيتسە-ءمينيسترى نۇرعيسا داۋەشوۆ ايتتى، دەپ حابارلايدى قازاقپارات ءتىلشىسى.
«قازاق ءتىلى ءالىپبيىن لاتىن گرافيكاسىنا كوشىرۋ جۇمىستارى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جاريالانىپ، قارقىندى جۇمىستار جۇرگىزىلگەن بولاتىن. وزدەرىڭىزگە بەلگىلى، سول ۋاقىتتان بەرى لاتىن گرافيكاسىنا كوشىرۋ بويىنشا ءبىرقاتار جۇمىستار اتقارىلدى. ق ر ۇكىمەتىنىڭ جانىنان ۇلتتىق كوميسسيا، ءتيىستى ۆەدومستۆولاردىڭ جانىنان ولاردىڭ جۇمىس توپتارى قۇرىلىپ، جاڭا ءالىپبي مەن ەملە ەرەجەلەرى زەردەلەنۋدە. جاڭا الىپبيگە كوشۋ ماسەلەسىنىڭ جالپى جۇرتشىلىق تاراپىنان قىزۋ تالقىعا ءتۇسۋى دە ماسەلەنىڭ وزەكتىلىگىن ايقىنداپ وتىر» ، - دەدى «جاڭا ءالىپبي: ەملە، ادىستەمە جانە حالىقارالىق تاجىريبە» تاقىرىبىنداعى رەسپۋبليكالىق كونفەرەنتسيا جۇمىسىن اشقان ۆيتسە-مينيستر.
ونىڭ اتاپ وتۋىنشە، بۇگىنگى ۇيىمداستىرىلىپ وتىرعان كونفەرەنتسيا وسى جۇمىستاردى ورتاعا سالىپ زەردەلەۋگە، الداعى ۋاقىتتا اتقارىلۋى ءتيىس مىندەتتەردى تالقىلاۋعا مۇمكىندىك بەرەتىن الاڭ سانالادى.
«وسى رەتتە ق ر پرەزيدەنتى قاسىم-جومارت توقايەۆتىڭ وسى جىلعى 21 -قاراشادا قولدانىستاعى لاتىن گرافيكاسىنداعى ءالىپبيدى جەتىلدىرۋدىڭ قاجەتتىگى جونىندەگى تاپسىرماسىن ەستەرىڭىزگە سالا كەتكىم كەلەدى. بۇگىنگى شارا بارىسىندا دا وسى تاپسىرمالاردى باسشىلىققا الىپ، جۇمىس جۇرگىزۋلەرىڭىزدى سۇرايمىز. مەملەكەت باسشىسىنىڭ بەرگەن تاپسىرماسىنا سايكەس، قازىرگى تاڭدا قازاق ءتىلىن لاتىن الىپبيىنە كوشىرۋ ماسەلەسىندە وسىنداي القالى ماجىلىستەردىڭ ءوتۋى زاڭدى جانە بۇل تۇرعىدا سىزدەردەن مينيسترلىك تاراپىنان ۇلكەن وتىنىشپەن سۇرالاتىن ماسەلە ۇلكەن اقيقاتپەن قاراۋىمىز كەرەك»، - دەدى ول.
وسى رەتتە ۆيتسە-مينيستر مۇنداي شارالار بارىسىندا جاڭا الىپبيگە قاتىستى تەحنيكالىق جاعىنان، جازۋ جاعىنان ءارتۇرلى ماسەلەلەر جان-جاقتى تالقىلاناتىندىعىن اتاپ ءوتتى. قازاقستانداعى جەكەلەگەن ازاماتتاردىڭ ءوز الىپبيلەرىن ۇسىنۋىنا بايلانىستى ولاردى قوعامدىق پىكىرگە سالىپ، عالىمداردىڭ اراسىندا تالقىلاۋ بويىنشا جۇمىستار جۇرگىزىلىپ جاتقانىن ەسكە سالدى.
«ءبىز ۇلكەن تاريحي كەزەڭدە تۇرىز. ءتىلىمىزدىڭ، ۇلتىمىزدىڭ تاريحي كەزەڭىندە تۇرعاننان كەيىن بۇل ماسەلەگە وسى ەلدىڭ ازاماتى رەتىندە ۇلكەن جاۋاپكەرشىلىكەن قاراۋىمىز كەرەك دەپ ويلايمىن. ءاربىر ۇسىنىلعان جاڭا الىپبيگە عالىمدار تاراپىنان ناقتى، ايقىن، شىنايى باعا بەرىلگەن جاعدايدا بولاشاعىمىزدىڭ جارقىن بولاتىندىعىنا تولىق سەنەمىن. كەيبىر ب ا ق-تا جەكەلەگەن ءالىپبي قۇرعان ازاماتتار: «مەنىڭ ءالىپبيىمدى قولدادى، بەكىتەدى» دەگەندى ايتۋدا.
بۇل قاتە پىكىر. بىزگە لاتىن الىپبيىنە كوشۋگە بايلانىستى قانشا ۋاقىت قاجەت بولسا، سونشا ۋاقىت بولىنەدى»، - دەدى نۇرعيسا داۋەشوۆ.
اۆتور: مارلان جيەمباي