تۇركىستان وبلىسىندا ينسۋلت العان ايەلدەر وڭالتۋدان اقىسىز وتەدى

سايرام. قازاقپارات - تۇركىستان وبلىسى سايرام اۋدانىندا ينسۋلت العان ايەلدەرگە ارنالعان «ۆوزروجدەنيە» ساۋىقتىرۋ كەشەنى ءوز جۇمىسىن باستادى.

اقسۋكەنت اۋىلىندا اشىلعان ورتالىقتا ناۋقاس نازىكجاندىلار دەنە جاراقاتىنان كەيىن وڭالتۋ جانە قوزعالىس قىزمەتىن قالپىنا كەلتىرۋدى قاجەت ەتەتىن كومەك الا الادى، دەپ حابارلايدى قازاقپارات ءتىلشىسى.

ساۋىقتىرۋ كەشەنىندە ەمدىك دەنە شىنىقتىرۋ ساباقتارى مەن تىرەك- قيمىل فۋنكسيالارىن قالپىنا كەلتىرۋ كۋرستارى جۇرگىزىلەدى. وڭالتۋ جانە قالپىنا كەلتىرەتىن ۋقالاۋ ەمدەرى جاسالادى. تاجىريبەلى، بىلىكتى ماماندار تىرەك- قيمىل فۋنكتسيالارىن دامىتۋ جانە قالپىنا كەلتىرۋ بويىنشا جۇمىس ىستەيدى، ديەتالاردىڭ، اۋىز سۋ ءىشۋ رەجيمىنىڭ ساقتالۋىن قاداعالايدى. تەگىن ماسساج قىزمەتتەرىن كورسەتەدى. ورتالىقتا بارلىق قاجەتتى ساۋىقتىرۋ قۇرالدارى، ماسساج جانە نەۆروپاتولوگ دارىگەردىڭ كونسۋلتاتسياسىن الۋعا بولاتىن كابينەتتەر بار.

«الەۋمەتتىك كاسىپكەرلىكتى دامىتۋ جونىندەگى «ارەكەت» جوباسىنىڭ ارقاسىندا وڭىرلەردە قوعامعا پايدا اكەلەتىن ءتۇرلى جوبالار اشىلاتىنى قۋانتادى. «ۆوزروجدەنيە» ساۋىقتىرۋ كەشەنى - بۇل ارەكەتتەگى الەۋمەتتىك كاسىپكەرلىكتىڭ ۇلگىسى. بىرىنشىدەن، ينسۋلت العان ايەلدەرگە كومەك كورسەتۋ ارقىلى الەۋمەتتىك پروبلەما شەشىلۋدە. ەكىنشىدەن، قوعامدىق بىرلەستىك اقىلى قىزمەت كورسەتۋ ارقىلى قارجىلىق تۇراقتىلىقتى قامتاماسىز ەتە الادى جانە ودان ءارى گرانتتار مەن الەۋمەتتىك تاپسىرىستارعا از تاۋەلدى بولادى»، - دەپ اتاپ ءوتتى «Samruk-Kazyna Trust» قورىنىڭ وكىلى جانار جاقسىلىقوۆا.

اتالعان جوبا «Samruk-Kazyna Trust»  الەۋمەتتىك جوبالاردى دامىتۋ قورى الەۋمەتتىك كاسىپكەرلىكتى دامىتۋعا باعىتتالعان «ارەكەت» جوباسى اياسىندا جۇزەگە اسىرىلۋدا. جوبانى جۇزەگە اسىرۋدىڭ 9-ايىندا ساۋىقتىرۋ كەشەنى ينسۋلت العان 30 دان استام ايەلدەردى قامتيدى دەپ جوسپارلانۋدا. ولارعا كومەك تەگىن كورسەتىلەدى، بۇل رەتتە حالىقتىڭ الەۋمەتتىك وسال توپتارىنىڭ وكىلدەرىنە ەرەكشە كوڭىل بولىنەدى. ورتالىقتا ساۋ ايەلدەر دە كومەك پەن كەڭەس الا الادى، ولار ءۇشىن اقىلى قىزمەت كورسەتىلەدى.

ايتا كەتۋ كەرەك، «ۆوزروجدەنيە» ساۋىقتىرۋ كەشەنى ءوز قىزمەتتەرىن نارىق باعاسىنان تومەن باعامەن ۇسىنادى جانە وڭالتۋ، ماسساج جانە سالاۋاتتى ءومىر سالتىن جۇرگىزۋ بويىنشا بىرنەشە باعىت ۇسىنادى.

وسىلايشا، «ۆوزروجدەنيە» ساۋىقتىرۋ كەشەنىنىڭ اشىلۋىنىڭ ارقاسىندا ينسۋلت العان ايەلدەردىڭ باسىم بولىگى ەندى ءوز وڭىرىندە وڭالتۋ قىزمەتتەرىن الا الادى. ستۋدەنت كەزىندە ينسۋلت العان «ۆوزروجدەنيە» جوباسىنىڭ ۇيلەستىرۋشىسى ناسيبا حالحودجايەۆانىڭ جەكە تاريحى «Generation» قوعامدىق بىرلەستىگىمەن بىرگە سايرام اۋدانىندا ساۋىقتىرۋ كەشەنىن قۇرۋعا نەگىز بولدى. وسىلايشا، ول بۇل فاكتور ساۋىقتىرۋ كەشەنىن قۇرۋدىڭ نەگىزى بولعانىن ايتادى.

«مەن اۋىرىپ، ونىمەن كۇرەسكەن كۇندەر مەن ايلار ومىرىمدەگى ەڭ قورقىنىشتى ءسات بولدى. ءبىراق بۇل كۇردەلى جولدان ءوتىپ، كەيىننەن انا اتانىپ، قۋانىشقا كەنەلدىم، ەڭ باستىسى - وسىنداي ومىرلىك جاعدايعا تاپ بولعان ايەلدەرگە كومەسكىم كەلەتىنىن جانە كومەكتەسە الاتىنىمدى ءتۇسىندىم. ءبىزدىڭ «ۆوزروجدەنيە» جوباسى وسىلاي دۇنيەگە كەلدى»، - دەيدى ناسيبا حالحودجايەۆا.

ناۋقاس كەلىنشەكتەر قوسىمشا اقپارات الۋ ءۇشىن كەلەسى نومىرلەر ارقىلى حابارلاسۋعا بولادى: 77785560699+

اۆتور: اينۇر اقبايەۆا