ۇلتتىق بانك كوشىپ كەتسە دە، الماتى قارجىلىق ورتالىق بولىپ قالادى - ەربولات دوسايەۆ

الماتى. قازاقپارات – ق ر ۇلتتىق بانكىنىڭ ءتوراعاسى ەربولات دوسايەۆ ۇلتتىق بانكتىڭ استاناعا كوشۋىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ءبىزدىڭ ستراتەگيالىق ماقساتىمىز - باسەكەگە قابىلەتتى جانە كۇشتى قارجىلىق سەكتور قۇرۋ، قارجىلىق ۇيىمداردىڭ جۇمىسىنىڭ تيىمدىلىگىن ارتتىرۋ. وسى ماقساتتاردى جۇزەگە اسىرۋ ماقساتىندا 2020 -جىلدىڭ 1 -قاڭتارىنان باستاپ ق ر ۇلتتىق بانكى قارجىلىق نارىقتى رەتتەۋ بويىنشا مانداتىن تاۋەلسىز ورگان - قارجىلىق نارىقتى دامىتۋ جانە رەتتەۋ اگەنتتىگىنە بەرەدى. بۇل اگەنتتىكتى قۇرۋ بويىنشا مەملەكەت باسشىسىنىڭ ەكى جارلىعى جاريالانىپ، قول قويىلدى. جاقىندا تىركەۋ اياقتالىپ، جاريالاناتىن بولادى. بۇل اگەنتتىك مەملەكەت باسشىسىنا ەسەپ بەرۋگە مىندەتتى بولادى. اگەنتتىك، ۇكىمەت، ۇلتتىق بانك قارجىلىق تۇراقتىلىق كەڭەسى ارقىلى بايلانىستا بولادى»، - دەدى ۇلتتىق بانكتىڭ ءتوراعاسى ەربولات دوسايەۆ.

ونىڭ ايتۋىنشا، اتالعان اگەنتتىك الماتىدا قالادى. سايكەسىنشە بۇل الماتىنىڭ قارجىلىق ورتالىق رەتىندەگى مارتەبەسىن نىعايتۋعا سەپتەسپەك.

«الماتىدا بانكارالىق شوتتار ورتالىعى، دەپوزيتتەردى كەپىلدەندىرۋ قورى، قازاقستان قور بيرجاسى، قۇندى قاعازداردىڭ ورتالىق دەپوزيتاريى، مەملەكەتتىك نەسيە بيۋروسى، بارلىق قارجىلىق ۇيىمداردىڭ باس ءوفيسى ورنالاساتىن بولادى. حالىقارالىق ۆاليۋتا قورى دا جاقىندا الماتىدا ورتالىق ازيانىڭ 9 مەملەكەتى مەن كاۆكاز، موڭعوليا ەلدەرى ءۇشىن تەحنيكالىق ورتالىق قۇرۋ تۋرالى شەشىم قابىلداعان بولاتىن. بۇل ورتالىق 2020 -جىلى اشىلادى. جاقىندا مينسك قالاسىندا بولدىم. وندا 2025 -جىلى ەۆرازيا ەكونوميكالىق قاۋىمداستىعى ەلدەرىنىڭ قارجىلىق نارىقتارىن رەتتەۋ بويىنشا ۇلتتىق قۇرىلىم ءۇستى ورگان الماتىدا اشىلاتىنىنا تاعى كوز جەتكىزىپ قايتتىق. ودان بولەك ۇلتتىق بانك نۇر- سۇلتان قالاسىنا كوشكەن كۇننىڭ وزىندە الماتىدا وكىلدىگى قالادى. البەتتە بۇل وزگەرىستىڭ بارلىعى الماتىنىڭ قارجىلىق ورتالىق رەتىندەگى مارتەبەسىنىڭ بەكي تۇسەتىنىن بىلدىرەدى»، - دەدى باس بانكير.

اۆتور: گۇلميرا عوسمانالي