ەلوردادا فاريزا وڭعارسىنوۆا كوشەسى اشىلدى

نۇر-سۇلتان. قازاقپارات - ەلوردادا فاريزا وڭعارسىنوۆا اتىنداعى جاڭا كوشە اشىلدى، دەپ حابارلايدى قازاقپارات ءتىلشىسى.

اقىن ەسىمى ەكسپو-2017 ماڭىندا «ۆەنا ورامى» تۇرعىن ءۇي كەشەنى جانىنداعى جاڭا كوشەگە بەرىلدى. سالتاناتتى اشىلۋعا قوعام قايراتكەرلەرى، دەپۋتاتتار جانە اقىننىڭ وقىرماندارى جينالدى.

«قازاقتىڭ ۇلى اقىنى، دارا قىزى فاريزا اپامىزدىڭ كوشەسىنە كەلگەندەرىڭىز ءۇشىن راحمەت. وتكەندى ۇمىتپاي، ەسكە الىپ، جاڭا كوشەلەردىڭ بىرىنە فاريزا اپامىزدىڭ ەسىمىن بەرىپ وتىرمىز. فاريزا وڭعارسىنوۆا وتكىر سوزدەرىمەن سوۆەت ادەبيەتىندە ءوز ورنىن قالدىردى. اپامىز پارلامەنت قابىرعاسىندا دا حالىقتىڭ مۇڭىن جوقتاپ، كوپ ەڭبەك ءسىڭىردى. سوندىقتان، قازاقتىڭ وسىنداي ۇلى قىزىنىڭ ەسىمىن كوشەگە بەرۋ كەلەسى ۇرپاققا دا تاربيەلىك ماڭىزىن بەرەدى دەپ ويلايمىن. اپامىزدىڭ اتى ماڭگى وشپەسىن. بۇگىن تۇستە فاريزانىڭ رۋحىنا اس بەرەمىز، قازىر زيراتىنا بارىپ قۇران باعىشتايمىز. وسى كوشە اپامىزدىڭ ەسىمىمەن داڭعىل جولعا اينالسىن»، - دەدى نۇر-سۇلتان قالاسى اكىمىنىڭ ورىنباسارى باقتيار ماكەن سالتاناتتى اشىلۋ راسىمىندە.

سونىمەن بىرگە، اشىلۋعا كەلگەن جازۋشى جانە قوعام قايراتكەرى الدان سمايىل فاريزا وڭعارسىنوۆا تۋرالى ەستەلىكتەرىمەن ءبولىستى.

«اقىنىن سىيلاعان ەلگە ءارۋاق تا، اللا دا ريزا بولادى. فاريزا كەڭ ادام ەدى، مىنەزى قاتتىلاۋ بولعانىمەن، جان- جاعىنا جاقسىلىق جاساپ جۇرەتىن شالقار جان ەدى. مىنا كوشەنىڭ دە وزىندەي كەڭدىگىن كورىپ، قۋانىپ وتىرمىز. فاريزا اقيقاتتىڭ اقىنى بولدى، شىندىقتى ايتىپ ءوتتى. شىندىقتى ايتۋدىڭ ءوزى - ەرلىك. ەلدىڭ شىندىعىن، ەلدىڭ مۇڭىن ولە-ولگەنشە كۇيتتەپ كەتتى. ال قازىر فاريزاعا دەگەن حالىقتىڭ شەكسىز ماحابباتىن كورىپ ءجۇرمىز. فاريزا قازاقتىڭ قىزى بولا وتىرىپ، ۇلى دا بولا بىلگەن ادام. قازاق ءوزىنىڭ يگى جاقسىلارىنا ەشكىمدى تەڭگەرمەيدى. ءبىراق، فاريزانى ماحامبەتكە تەڭەدى. مەن ءدال سونداي ۇلىلارعا تەڭەگەن باسقا قايراتكەرلەردى بىلمەيمىن. فاريزا ءوز زامانىندا ماحامبەتتىڭ ورنىن جوقتاتپاعان، سونى تولتىرۋعا تىرىسقان ۇلى تۇلعالاردىڭ ءبىرى بولدى»، - دەدى الدان سمايىل.

جاڭا كوشەنى اقىننىڭ ۇلى الماس وڭعارسىنوۆ پەن نۇر-سۇلتان قالاسى اكىمىنىڭ ورىنباسارى باقتيار ماكەن سالتاناتتى تۇردە اشتى.

ايتا كەتەيىك، بۇگىن 16.00-دە ق ر ۇلتتىق اكادەميالىق كىتاپحاناسىندا فاريزا وڭعارسىنوۆانىڭ «شىلدە» جانە «پولدنيەۆنىي جار» كىتاپتارىنىڭ تۇساۋكەسەرى وتەدى.

كەشكى 19:00-دە جاستار تەاترى ساحناسىندا «فاريزا» سپەكتاكلى قويىلادى.

اۆتور: ايجان سەرىكجان قىزى