بولات باقاۋوۆ: ەرتىس وزەنى ءتۇبىن تەرەڭدەتۋ بويىنشا كوميسسيا قۇرىلادى

نۇر- سۇلتان. قازاقپارات -  ەرتىس وزەنىنىڭ ءتۇبىن تەرەڭدەتۋ ماسەلەسى ۇكىمەتتىك دەڭگەيدە شەشىلەدى. بۇل تۋرالى پاۆلودار وبلىسىنىڭ اكىمى بولات باقاۋوۆ ايتتى، دەپ حابارلايدى قازاقپارات ءتىلشىسى.

«جاقىندا وتكەن قازاقستان مەن رەسەيدىڭ وڭىرلىك ىنتىماقتاستىق فورۋمىندا ومبى قالاسىنىڭ گۋبەرناتورىمەن بىرگە ەرتىس وزەنىنىڭ ءتۇبىن تەرەڭدەتۋ ماسەلەسىن كوتەردىك. بۇل - جان- جاقتى زەرتتەۋدى قاجەت ەتەتىن ماسەلە. ەڭ باستىسى، مامىر مەن شىلدە ارالىعىندا وزەن تولى بولعاندا جۇك تاسىمالداي الامىز. شىلدە، تامىز، قازان ايلارىندا ماسەلە قيىنداي تۇسەدى»، - دەدى ب. باقاۋوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

اكىمنىڭ ايتۋىنشا، وزەن ءتۇبىن تەرەڭدەتۋ ماسەلەسىن زەرتتەۋ ءۇشىن ارنايى كوميسسيا قۇرىلادى.

«ءبىز ارنايى كوميسسيا قۇرامىز. بىزگە كەمەنىڭ باتىپ تۇرۋى ءتيىس سۋ كولەمى كەرەك. سوندا وزەن ارقىلى جانار- جاعارماي تاسي الامىز. ەڭ باستىسى، بۇل ماسەلە ەكونوميكالىق تۇرعىدا ومبى وبلىسىن عانا ەمەس، قورعان قالاسىن دا قىزىقتىرىپ وتىر. ياعني، جالپى قازاقستان مەن رەسەي ءۇشىن قىزىق تاقىرىپ بولىپ وتىر. مۇنىمەن ۇكىمەتتىك دەڭگەيدە اينالىسامىز»، - دەدى ءوڭىر باسشىسى.

ايتا كەتەيىك، پاۆلودار وبلىسىنىڭ اكىمى بولات باقاۋوۆ ەلوردادا 2019 -جىلدىڭ 10 ايىنداعى ءوڭىردىڭ الەۋمەتتىك- ەكونوميكالىق دامۋى تۋرالى ەسەپ بەردى.

اۆتور: ايجان سەرىكجان قىزى