تارباعاتايدا قاسقىر اتۋعا رۇقسات بەرىلدى

نۇر-سۇلتان. قازاقپارات - تارباعاتايلىقتار تالاي جىلدان بەرى ءتۇز تاعىسىمەن الىسىپ كەلەدى. وسى ۋاقىتقا دەيىن تۇرعىنداردىڭ قارۋى بولسا دا، قاسقىر اتۋعا رۇقساتى بولمادى. سول سەبەپتى ءيت- قۇس قوراعا ءجيى ءتۇستى.

ماسەلەن، وسى جىلى ەكى مىڭعا جۋىق مالدى قاسقىر تارتىپ كەتكەن، دەپ حابارلايدى التاي نيۋس.

 تاعىلاردىڭ شابۋىلى تولاستار ەمەس. ماسەلەن، بيىل وسىنداي 1696 وقيعا تىركەلگەن ەكەن. 506 جىلقى، 454 باس ءىرى قارا مەن 736 قويدى قاسقىر تارتىپ كەتكەن. 2017 جانە 2018 -جىلدارداعى جاعداي دا وسىعان ۇقساس. بۇل تۋرالى تارباعاتاي اۋدانىنىڭ كاسىپكەرلىك جانە اۋىل شارۋاشىلىعى ءبولىمى مالىمدەدى.

ەسكە سالايىق، قازان ايىندا اتالمىش اۋدانعا قارايتىن احمەتبۇلاق اۋىلىندا ءبىر ءۇيدىڭ 70 باس قويىن قاسقىر قىرىپ كەتكەندىگىن جازعان ەدىك. وسى وقيعادان كەيىن تارباعاتاي اكىمى وبلىس ورتالىعىندا وتكەن بريفينگى بارىسىندا تۇعىنداردىڭ ارىز- شاعىمدارىن قاناعاتتاندىرارلىق جاڭالىق ايتتى.

- اۋدانداعى پروكۋراتۋرا، پوليتسيا، ۇلتتىق قاۋىپسىزدىك كوميتەتى جانە شەكارا قىزمەتكەرلەرىمەن كەلىسىمگە كەلدىك. كەلىسىم بويىنشا، شەكارالى اۋىلدارداعى مىلتىعى بار 15 شاقتى ادامعا قاسقىر اتۋعا رۇقسات بەرىلدى. ولاردىڭ ىشىندە جاڭااۋىل اۋىلدىق وكرۋگىنە قارايتىن جاڭاتالاپتان 8، احمەتبۇلاقتان 2 قارۋى بار ادام رۇقسات الدى. البەتتە، ولار ءتۇز تاعىسىن بەيبەرەكەت اتا بەرمەيدى. وزىندىك شارتتارى بار، ولارعا تۇسىندىرىلگەن. ماسەلەن، قاسقىر شەكارادان بەرى وتكەندە عانا قارۋ كەزەنۋ كەرەك، - دەگەن ەدى سەرىكقازى ءسادۋاقاسوۆ.

ال اۋداندىق كاسىپكەرلىك جانە اۋىل شارۋاشىلىعى ءبولىمىنىڭ مالىمدەۋىنشە، تۇعىل اۋىلىندا تاعى 10 اڭشى قاسقىر اۋلاۋعا دايىن ەكەندىكتەرىن ايتقان. الايدا جوعارى بيلىك ولاردى جانارمايمەن نەمەسە وقپەن قامتاماسىز ەتپەيدى.

www.24.kz