تەڭگە بيىل نەگە نىعايمادى - ۇلتتىق بانك تۇسىنىك بەردى

None
None
نۇر-سۇلتان. قازاقپارات - وسى جىلدىڭ باسىندا مۇناي قىمباتتاپ، رەسەيلىك رۋبل نىعايا تۇسكەندىكتەن، ارتىنشا تەڭگە دە كۇشەيەدى دەپ بولجانعان.

الايدا ۋاقىت تۇسپالدى جوققا شىعارىپ وتىر. مۇنىڭ سەبەبىن ۇلتتىق بانكتىڭ مونەتارلىق وپەراتسيالار دەپارتامەنتىنىڭ ديرەكتورى ءاليا مولدابەكوۆا ءتۇسىندىرىپ بەردى، دەپ حابارلايدى قازاقپارات ءتىلشىسى.

«تەڭگەنىڭ بيىلعى ايىرباس باعامى شەتەل ۆاليۋتاسىنداعى بارلىق اعىمداردىڭ سۇرانىستارى مەن ۇسىنىستارىنىڭ ۇيلەسىمىن كورسەتەدى. ۇلتتىق بانك تەڭگە باعامىنىڭ قۇبىلمالى سيپاتىن قولداي بەرەدى. وسى باعىت تەڭگەنىڭ ىشكى جانە سىرتقى فاكتورلارعا كۇن سايىنعى رەاكسياسىن كورسەتىپ وتىرادى»، - دەدى ءاليا مولدابەكوۆا.

ۇلتتىق بانك وكىلىنىڭ ايتۋىنا قاراعاندا، جىل باسىندا مۇناي باعاسى قىمباتتاپ، رەسەيلىك رۋبل دە نىعايا تۇسكەن. وسىعان وراي، قارجى نارىعىنىڭ كەيبىر قاتىسۋشىلارى بيىل تەڭگە كۇشەيەتىنىنە سەنىم ءبىلدىرىپتى.

«ءبىراق، بۇل رەتتە ءبىر ماسەلەنى اتاپ وتكىم كەلەدى: تەڭگە باعامىنا مۇناي باعاسىنىڭ ديناميكاسى عانا ىقپال ەتپەيدى. سول سەكىلدى، بەلگىلى ءبىر كەزەڭدەگى مۇنايدىڭ ورتاشا باعاسى اسەر ەتەدى. 2019-جىلى مۇنايدىڭ ورتاشا باعاسى باررەلىنە 64 ا ق ش دوللارىن قۇرادى. ال 2018-جىلى مۇناي باررەلى 72 ا ق ش دوللارى بولعان ەدى»، - دەدى ول.

ءاليا مولدابەكوۆا ۇسىنعان مالىمەتكە قاراساق، رەسەيلىك رۋبلدىڭ نىعايۋىنا دامىپ كەلە جاتقان نارىقتارداعى تاۋەكەلدى اكتيۆتەرگە دەگەن ينۆەستورلاردىڭ «تابەتى» سەبەپ بولعان. ناقتى، رەسەيگە كەلگەندە ينۆەستورلار فەدەرالدى قارىز وبليگاتسيالارىنا (ف ق و) زور قىزىعۋشىلىق تانىتقان كورىنەدى.

«دامىعان ەلدەردە مەملەكەتتىك قۇندى قاعازدار بويىنشا كىرىستىڭ جاھاندىق دەڭگەيدە تومەندەۋى اياسىندا ينۆەستورلار جوعارى ديففەرەنتسيالدى ستاۆكالاردى ەسكەرە وتىرىپ، رۋبلدىك قۇندى قاعازدارعا قىزىعا ءتۇستى. سانكسيالارعا قاراماستان، وسىناۋ قىزىعۋشىلىق رەسەي نارىعىنا شەتەلدىك ۆاليۋتالاردىڭ تۇراقتى تۇردە كەلىپ تۇرۋىنا مۇرىندىق بولىپ وتىر»، - دەيدى ءاليا مولدابەكوۆا.

Bloomberg اگەنتتىگىنىڭ مالىمەتىنە سۇيەنسەك، جىل باسىنان بەرى شەتەل ينۆەستورلارى فەدەرالدى قارىز وبليگاتسيالارىنا 12 ميلليارد ا ق ش دوللارىن الىپ كەلگەن.

«ەكىنشىدەن، ىشكى فۋندامەنتالدى فاكتورلاردى ەسەپكە الايىق. ەكونوميكانىڭ يمپورتقا تاۋەلدىلىگىن ەسكەرە وتىرىپ، ءبىزدىڭ ەلدە يمپورتتى تاۋارلاردى، قۇرىلعىلاردى ارى قاراي الا بەرۋ ءۇشىن شەتەل ۆاليۋتاسىن ساتىپ الۋ ماجبۇرلىگى تۋادى»، - دەدى ۇلتتىق بانك وكىلى.

الدىن الا مالىمەت بويىنشا، وسى جىلدىڭ 9 ايىندا تاۋار يمپورتى 12,2 پايىزعا - 25,1 ميلليارد دوللاردان 28,2 ميلليارد دوللارعا وسكەن. يمپورتتىڭ ءوسىمى نەگىزىنەن ءىرى شيكىزاتتىق جانە ينفراقۇرىلىمدىق جوبالاردى جۇزەگە اسىرۋ ءۇشىن قۇرىلعىلاردى، تەحنيكا مەن ماتەريالداردى الۋ قاجەتتىلىگىنەن تۋىندايدى.

«مىنە، وسىلايشا، ەكسپورتەرلەر تاراپىنان دوللاردى ساتۋ كولەمى ازايىپ، مۇناي باعاسى وتكەن جىلعا قاراعاندا تومەندەگەندىكتەن، تەڭگە نىعايمادى. ال يمپورت وسىمىنە بايلانىستى دوللاردى ساتىپ العىسى كەلەتىندەردىڭ سانى ارتا ءتۇستى»، - دەدى ءاليا مولدابەكوۆا.

سوڭعى جاڭالىقتار