توقايەۆ اۋىل حالقىنىڭ مال جاياتىن جەر تاپپاي وتىرعانىنا الاڭداۋشىلىق ءبىلدىردى
«ەلدە اۋىل شارۋاشىلىعى تەحنيكاسىنا قاجەتتىلىك زور. سول سەبەپتى، اۋىل شارۋاشىلىعى مينيسترلىگى قازاگرو جۇيەسى ارقىلى اۋىل شارۋاشىلىعى تاۋار وندىرۋشىلەرى ءۇشىن قاجەتتى تەحنيكانى ءوندىرىپ، ساتۋ بويىنشا قارجىلاندىرۋ مەحانيزمىن جولعا قويۋى كەرەك»، - دەدى قاسىم-جومارت توقايەۆ اقمولا وبلىسىن دامىتۋ ماسەلەلەرى جونىندەگى كەڭەستە.
قاسىم-جومارت توقايەۆ سونىمەن قاتار، قازىرگى تاڭدا قازاقستاندا اگرارلىق سەكتوردى دامىتۋعا - تۇقىم ءوسىرۋ شارۋاشىلىعىنا، سۇرىپتاردى جاڭارتۋعا، مينەرالدى تىڭايتقىشتارعا جىل سايىن قىرۋار قاراجات ءبولىنىپ جاتقانىن ەسكە سالدى. پرەزيدەنتتىڭ ايتۋىنشا، وسىعان قاراماستان، ءبيدايدىڭ ورتاشا ونىمدىلىگى گەكتارىنا 12 تسەنتنەردەن اسپاي تۇر .
«اۋىل شارۋاشىلىعى مينيسترلىگى اگرارلى وڭىرلەردىڭ اكىمدىكتەرىمەن بىرگە ا و ك سالاسىنداعى ەڭبەك ونىمدىلىگىن ارتتىرۋ بويىنشا ناقتى شارالاردى قابىلداۋى كەرەك»، - دەدى پرەزيدەنت.
قاسىم-جومارت توقايەۆ سونىمەن قاتار، اقمولا وبلىسىنداعى جايىلىم جەرلەرىنىڭ كولەمى شامامەن 4,5 ميلليون گەكتار ەكەنىن، سونىڭ 88 پايىزى پايدالانىلىپ وتىرعانىن اتاپ ءوتتى.
«اۋىلدىق ەلدى مەكەندەردە تۇرعىندار مال جاياتىن جەر تاپپاي قينالۋدا. ۇكىمەت بەرىلگەن جەرلەردى باقىلاۋعا الىپ، جەكە ازاماتتار مال جايۋعا مۇمكىندىك الۋ ءۇشىن قاجەتتى نورماتيۆتى ۇستانۋى كەرەك»، - دەدى مەملەكەت باسشىسى.