ەلوردانى اينالا قورشاپ جاتقان اقمولانىڭ ستراتەگيالىق ماڭىزى جوعارى - پرەزيدەنت
«بۇگىن وزدەرىڭىزبەن كوكشە تورىندە جۇزدەسىپ وتىرمىز. ارقانىڭ ايرىقشا سۇلۋ ايماعى - بۇكىل ەلىمىزدىڭ مەرەيى ءارى ماقتانىشى. بۇل - تاريحى تەرەڭ، تابيعاتى عاجايىپ كيەلى ولكە. تۇعىرى بيىك تۇلعالار شىققان قاستەرلى ءوڭىر. ەلوردانى اينالا قورشاپ جاتقان اقمولانىڭ ستراتەگيالىق ماڭىزى جوعارى. وسى جەردىڭ تۇرعىندارى ەل ەكونوميكاسىن وركەندەتۋگە ەلەۋلى ۇلەس قوسىپ كەلەدى»، - دەپ اتاپ ءوتتى جيىندا مەملەكەت باسشىسى.
قاسىم-جومارت توقايەۆ وبلىستىڭ بۇگىنگى تىنىس-تىرشىلىگىمەن قاتار، دامۋ كەلەشەگى - ەلىمىز ءۇشىن وتە ماڭىزدى مىندەتتەر قاتارىندا ەكەنىن تىلگە تيەك ەتتى.
«مەن جولداۋدا ايتىپ ءوتتىم: ەكونوميكالىق ءوسىمدى جانە تىڭ وزگەرىستەردى ەلىمىزدىڭ ءاربىر تۇرعىنى سەزىنۋى قاجەت. ءبىز حالىقتىڭ ءال-اۋقاتىن ارتتىرۋدى ءاردايىم باستى نازاردا ۇستاۋىمىز كەرەك. وڭىردە تۇراتىن ازاماتتارىمىزدىڭ تۇرمىس ساپاسى جوعارى ستاندارتتارعا ساي بولۋى ءتيىس. بۇل، ەڭ الدىمەن، جەرگىلىكتى حالىق تۇرعىن-ءۇي، الەۋمەتتىك قولداۋ، ينفراقۇرىلىم سياقتى يگىلىكتەردى كورۋى ءتيىس دەگەن ءسوز. سول سەبەپتى بارلىق دەڭگەيدەگى اكىمدەر جۇمىستى جاڭا تالاپقا ساي، ءتيىمدى ۇيىمداستىرۋى قاجەت. وسىعان وراي، بۇگىنگى جيىندا اقمولا وبلىسىن دامىتۋ ماسەلەلەرىن قاراستىرامىز»، - دەدى پرەزيدەنت.