اقشا اۋدارىمدارىنا سالىق سالىنبايدى - ءاليحان سمايىلوۆ
«اقشا اۋدارىمدارى بويىنشا كوميسسيا بولماعاندىقتان، پايدالانۋدىڭ ىڭعايلىلىعىنا بايلانىستى Kaspi سياقتى جەدەل اۋدارىم جۇيەلەرىنىڭ تۇرعىندار اراسىندا جانە بيزنەستە تانىمالدىعى ارتىپ كەلەدى. ارينە، قولما-قول اقشاسىز تولەمدەردىڭ ءوسىمى كولەڭكەلى ەكونوميكانىڭ تومەندەۋىنە ىقپال ەتەتىنىن ءتۇسىنىپ وتىرمىز. قارجى مينيسترلىگى مۇنداي اۋدارىمداردان ەشقانداي قوسىمشا تولەم نەمەسە سالىق الۋدى جوسپارلاپ وتىرعان جوق. اسىرەسە جەكە تۇلعالاردىڭ قولما-قول اقشاسىز اۋدارىمدارىن تەكسەرۋ - ەشقانداي جوسپاردا جوق»، - دەيدى پرەمەر-ءمينيستردىڭ ءبىرىنشى ورىنباسارى.
ءاليحان سمايىلوۆتىڭ ايتۋىنشا، مينيسترلىك بانكتەرمەن بىرلەسىپ، قولما-قول اقشاسىز ەسەپ ايىرىسۋ ءۇشىن ىڭعايلى جانە زامانعا ينفراقۇرىلىمدى دامىتۋ جۇمىستارىن جۇرگىزىپ كەلەدى.
«ال كاسىپكەرلىك سالا اشىق بولۋى كەرەك. زاڭعا سايكەس كاسىپكەرلەر فيسكالدى تۇبىرتەك بەرىپ، 2020-جىلدىڭ 1- قاڭتارىنان باستاپ ونلاين-كاسسالىق ماشينالاردى پايدالانۋى ءتيىس. Kaspi- ءدى كاسىپكەرلىك ماقساتتا پايدالانۋ -كاسىپكەرلەردى وسى مىندەتتەمەلەردەن بوساتپايدى. تۇتىنۋشىنىڭ قۇقىعىن قورعاۋ ءۇشىن تەكسەرۋدىڭ ماڭىزدى ەكەنىن ۇعىنۋ كەرەك»، - دەيدى ول.
پرەمەر-ءمينيستردىڭ ءبىرىنشى ورىنباسارى قازىرگى تاڭدا قارجى مينيسترلىگى جەدەل قىزمەت كورسەتۋ جۇيەسىن پايدالانىپ كاسىپكەرلەردىڭ كىرىستەرىن اكىمشىلەندىرۋ ماسەلەسى پىسىقتالىپ جاتقانىن حابارلايدى.
«مىسالى، بۇل ونلاين-كاسسالىق ماشينالار مەن POS- تەرمينالداردى اۆتوماتتى تۇردە تولتىرۋ جانە سالىق ەسەپتىلىگىن جىبەرۋ فۋنكتسيونالدىلىعىمەن بىرىكتىرۋ ارقىلى جۇرگىزىلەدى. مۇنداي پيلوت كەلەسى جىلى Kaspi Bank-پەن بىرگە وتكىزىلەدى. سونىمەن قاتار، مەملەكەت باسشىسىنىڭ 2020-جىلعى 1- قاڭتارداعى تاپسىرماسىنا سايكەس، ارنايى سالىق رەجىمدەرىن قولداناتىن ميكرو جانە شاعىن بيزنەس سۋبەكتىلەرى، مىسالى، پاتەنت نەمەسە جەڭىلدەتىلگەن دەكلاراتسيا 3 جىلعا سالىقتار مەن تەكسەرۋلەردەن بوساتىلاتىندىعىن اتاپ وتكىم كەلەدى. وسىعان بايلانىستى تۇرعىندار الاڭدايتىنداي ەشقانداي نەگىز جوق»، - دەپ ءتۇيدى ءاليحان سمايىلوۆ.
ەسكە سالا كەتسەك، كۇنى كەشە ق ر ۇلتتىق بانك ءتوراعاسى ەربولات دوسايەۆ ق ر قارجى مينيسترلىگىنىڭ ەل تۇرعىندارىنىڭ قولما-قول اقشاسىز تولەمدەرىن تەكسەرۋگە قاتىستى ۇسىنىسىنا تۇسىنىك بەرگەن بولاتىن.