د د س ۇ: جۋىق ارادا باعاسى قولجەتىمدى ينسۋلين پايدا بولۋى مۇمكىن

جەنەۆا. قازاقپارات - دۇنيەجۇزىلىك دەنساۋلىق ساقتاۋ ۇيىمى (د د س ۇ) ينسۋلين ءوندىرىسىن ءارتاراپتاندىرۋدىڭ پيلوتتىق جوباسى تۋرالى جاريالادى.

جۋىق ارادا باعاسى ارزانداۋ ينسۋلين پايدا بولۋى مۇمكىن، دەپ حابارلايدى «قازاقپارات» ح ا ا ب ۇ ۇ جاڭالىقتار سايتىنا سىلتەمە جاساپ.

د د س ۇ دۇنيەجۇزىلىك ديابەتكە قارسى كۇرەس كۇنىنىڭ قارساڭىندا وسىنداي مالىمدەمە جاساپ وتىر. اتاۋلى كۇن 1922-جىلى چارلز بەستپەن بىرگە ديابەتكە قارسى ءينسۋليننىڭ ويلاپ تابىلۋىندا شەشۋشى ءرول اتقارعان فرەدەريك بانتينگتىڭ تۋعان كۇنىنە وراي، جىل سايىن 14- قاراشادا تويلانادى.

ديابەت - قانداعى قانت مولشەرىنىڭ ارتۋىنان تۋىندايتىن، ۋاقىت وتە كەلە كۇشەيەتىن سوزىلمالى اۋرۋ. 1980-جىلدان بەرى ديابەتپەن اۋىراتىن ادامداردىڭ سانى 4 ەسەگە دەيىن ارتقان. بۇگىنگى تاڭدا الەمدە 420 ميلليون ادام ديابەتتەن زارداپ شەگەدى.

ءبىرىنشى تيپتەگى ديابەتپەن اۋىراتىن ادامدار ينسۋلينسىز ءومىر سۇرە المايدى. ال ديابەتتىڭ ەكىنشى ءتيپى پايدا بولعان ادامدار ءۇشىن ينسۋلين قانت مولشەرىن باقىلاۋ جانە اۋرۋدىڭ كۇشەيۋىنىڭ الدىن الۋ ءۇشىن قاجەت. قازىرگى تاڭدا ديابەتتىڭ ەكىنشى تيپىنەن زارداپ شەگەتىن 65 ميلليون ادام ينسۋلينگە مۇقتاج. سونىمەن قاتار كوپشىلىك ءۇشىن ونىڭ باعاسى قولجەتىمسىز.

بۇگىندە الەم بويىنشا ينسۋلين نارىعىنىڭ باسىم بولىگىن ءۇش ءوندىرۋشى قولىندا ۇستاپ وتىر. 13- قاراشادا جەنيەۆادا وتكەن بريفينگتە د د س ۇ وكىلدەرى باسقا فارماتسيەۆتيكا كومپانيالارى دا ينسۋلين شىعارۋعا ءازىر ەكەنىن جەتكىزدى. ءتىپتى ولاردىڭ كەيبىرى ۇيىمعا وزدەرى شىعارعان ينسۋليننىڭ ۇلگىسىن دە جىبەرىپ ۇلگەرگەن.

«د د س ۇ- نىڭ ينسۋلين ءوندىرىسىن ءارتاراپتاندىرۋ باستاماسى — مۇقتاج جانداردىڭ ءومىرى ءۇشىن اسا قاجەت پرەپاراتتى قولجەتىمدى ەتۋگە قويىلعان اسا ماڭىزدى قادام»، — دەيدى د د س ۇ باس ديرەكتورى تەدروس گەبرەيەسۋس.

د د س ۇ وكىلدەرى وسى شارانىڭ نارىقتىڭ بارلىق قاتىسۋشىلارى ءۇشىن تەڭدەي جاعداي جاسايتىنىنا ءۇمىت ارتىپ وتىر.