التىن ادام افينا جۇرتشىلىعىنا كورسەتىلدى

None
None
نۇر-سۇلتان. قازاقپارات - گرەكيا استاناسى افينادا «ۇلى دالا: تاريح جانە مادەنيەت» كورمەسى اشىلدى، دەپ حابارلايدى قازاقپارات ۇلتتىق مۋزەيگە سىلتەمە جاساپ.

كورمە «التىن ادامنىڭ الەم مۋزەيلەرىنە شەرۋى» حالىقارالىق كورمە جوباسى اياسىندا 2019 -جىلعى 11 -قاراشادان 11 -جەلتوقسانعا دەيىن جالعاسادى.

كورمەنىڭ ماقساتى - قازاقستاننىڭ تاريحي- مادەني باي مۇراسىمەن شەتەلدىك كورەرمەندى تانىستىرۋ. كورمەگە قازاقستان رەسپۋبليكاسىنىڭ سيمۆولى سانالاتىن «التىن ادام» قويىلدى.

كورمەنىڭ اشىلۋى قارساڭىندا افينا قالاسىنداعى ەپيگرافيالىق مۋزەيىندە جەرگىلىكتى بۇقارالىق اقپارات قۇرالدارى وكىلدەرىمەن ءباسپاسوز ءماسليحاتى ءوتتى. شاراعا قازاقستاننىڭ گرەكيا رەسپۋبليكاسىنداعى ەلشىسى الەكسەي ۆولكوۆ، ەجەلگى جانە مادەني مۇرانىڭ باس ديرەكتورى پوليكسەني ادام- ۆەلەني، افيناداعى ەپيگرافيالىق مۋزەيدىڭ ديرەكتورى اتاناسسيوس تەموس، ق ر ۇلتتىق مۋزەي ديرەكتورىنىڭ ورىنباسارى الماز شايكەن ۇلى نۇرازحان، ت. ع. د.، پروفەسسور زاينوللا ساماش ۇلى ساماشەۆ قاتىستى.

سونىمەن قاتار شارا بارىسىندا بەلگىلى ارحەولوگ، ت. ع. د.، پروفەسسور، ق ر عىلىمىنا ەڭبەگى سىڭگەن قايراتكەر، جالپىۇلتتىق تاۋەلسىز «پلاتينالى تارلان» سىيلىعىنىڭ يەگەرى، گەرمان ارحەولوگيا ينستيتۋتىنىڭ كوررەسپوندەنت مۇشەسى زاينوللا ساماشەۆ «ەجەلگى ساقتاردىڭ قازاقستانداعى مادەني كەشەنى» اتتى ءدارىس وقىدى.

«التىن ادامنىڭ» الەم مۋزەيلەرىنە شەرۋى» كورمەلىك جوباسى الەمدى ارالاپ كەلەدى. گرەكيا - قازاقستاننىڭ تاريحي - تانىمدىق كورمەسىن تاماشالاپ وتىرعان ون ەكىنشى مەملەكەت. ەلىمىزدى الەمگە تانىتۋ ماقساتىندا وسى كورمە جوباسى بويىنشا باعدارلاما ۇسىنعان ەلباسى ن. نازاربايەۆقا العىسىمدى بىلدىرەمىن. بۇگىنگە دەيىن قازاقستاننىڭ وڭىرىنەن تابىلعان التىن ادامدار ءبىزدىڭ ەلىمىزدىڭ ەرتە داۋىردەگى مادەنيەتىن، تاريحىن ايقىندايتىن ۇلتتىق قۇندىلىقتار بولىپ تابىلادى. كورمە جۇمىستارىنا قولداۋ بىلدىرگەنى ءۇشىن گرەكيانىڭ مادەنيەت مينيسترلىگىنە، افينا قالاسىنىڭ ەپيگرافيالىق مۋزەيىنىڭ باسشىلىعى مەن قىزمەتكەرلەرىنە العىسىمدى بىلدىرۋگە رۇقسات ەتىڭىزدەر»، - دەدى ق ر ۇلتتىق مۋزەيى ديرەكتورىنىڭ ورىنباسارى الماز نۇرازحان.

1960-جىلداردىڭ سوڭى مەن 1970-جىلداردىڭ باسىندا الماتىنىڭ ماڭايىندا تانىمال ارحەولوگ كەمال اقىشيەۆ زەرتتەپ جۇرگەن ەسىك قورعانىنان، كەيىن قازاقستاننىڭ سيمۆولىنا اينالعان، ساق پاتشاسى - «التىن ادامنىڭ» سۇيەگى تابىلعان ارحەولوگيالىق سەنساتسيا ورىن الدى.

باعا جەتپەس ولجاعا «قازاق تۋتانحامونى» دەگەن ات بەرىلىپ، «عاسىر جاڭالىعى» دەپ تانىلدى. ەجەلگى دالا بيلەۋشىسىنىڭ تاجىندەگى قاناتتى التىن پىراق اشەكەيلەرى قازاقستان رەسپۋبليكاسى ەلتاڭباسىنىڭ بولشەگىنە اينالدى، ال التىن ادامنىڭ ءمۇسىنى الماتىداعى تاۋەلسىزدىك الاڭىنا ورناتىلدى.

جارتى عاسىرعا جۋىق ۋاقىت وتكەننەن كەيىن قازاقستان رەسپۋبليكاسى ۇلتتىق مۋزەيى حالىقارالىق «التىن ادامنىڭ الەم مۋزەيلەرىنە شەرۋى» جوباسىن جاريالادى. اۋقىمدى شارا شەڭبەرىندە بەلارۋس، رەسەي، ازەربايجان، قىتاي، پولشا جانە وڭتۇستىك كورەيا، وزبەكستان مۋزەيلەرىندە كورمەلەر ۇلكەن جەتىستىكپەن ءوتتى.

افينا ەپيگرافيالىق مۋزەيىندەگى كورمەدەن كيىمى التىن جاپسىرمالى جانە جەبە، قار بارىسى، ارقار، جىلقى جانە قۇس تۇرىندەگى التىن تىلىمشەلەر اشەكەيلەپ تۇرعان كونۋس ءپىشىندى ەرەكشە باس كيىمدى التىن ادامنىڭ رەكونسترۋكسياسىن جانە وسى جاس اق سۇيەك ساق جاۋىنگەرىمەن (ارحەولوگتاردىڭ پىكىرلەرى بويىنشا 17-18 جاستار شاماسىندا) بىرگە جەرلەنگەن ەرتە تەمىر عاسىرىنىڭ (ب. د. د V- IV ع ع. ) ارحەولوگيالىق ولجالارىنىڭ كوللەكتسياسىن تاماشالاۋعا بولادى.

كورمەگە قازاقستان رەسپۋبليكاسى ۇلتتىق مۋزەيىنىڭ قورلارىنان بارلىعى 144 زات ۇسىنىلدى. كورمەگە قويىلعان قازاقستاننىڭ ەجەلگى جانە ورتاعاسىرلىق ونەرىنىڭ جاۋھارلارى - بۇل ەۋرازيا دالا مادەنيەتى مۇراسىنىڭ وزىندىك ەرەكشەلىگىن كورسەتەتىن بۇرىنعىنىڭ اتاۋسىز شەبەرلەرى تۋىندىلارىنىڭ از عانا بولىگى.

سوڭعى جاڭالىقتار