ورالدىق ءورت ءسوندىرۋشى كوپىردەن سەكىرمەك بولعان ەر ادامدى قۇتقاردى

ورال. قازاقپارات -  ورالدا ەر ادام كوپىردەن سەكىرمەك بولدى، دەپ حابارلايدى قازاقپارات ءتىلشىسى.

باتىس قازاقستان وبلىستىق توتەنشە جاعدايلار دەپارتامەنتىنىڭ باسپا ءسوز حاتشىسى جادىگەر قۇسايىنوۆتىڭ ايتۋىنشا، وقيعا 10 -قاراشا كۇنى ساعات 04.00 شاماسىندا بولدى. ەر ادامدى №7 -قالالىق ءورت ءسوندىرۋ ءبولىمىنىڭ قىزمەتكەرى، ازاماتتىق قورعاۋ سەرجانتى دياس دەمەشەۆ قۇتقارىپ قالدى. ول سول ۋاقىتتا ايەلىمەن جانە دوستارىمەن بىرگە تاكسيمەن ۇيگە قايتىپ كەلە جاتقان. دەپو كوپىرى تۇسىندا دياس پەن جۇرگىزۋشى كوپىر قورشاۋىنىڭ ارعى بەتىنە جارتىلاي ءوتىپ العان جاس ادامدى بايقاعان.

ماشينانى توقتاتۋدى وتىنگەن ءورت ءسوندىرۋشى جۇگىرىپ بارىپ قورشاۋدان ءوتىپ، سەكىرگەلى تۇرعان ەر ادامدى كەيىن تارتىپ الادى. كەيىن «102» تەلەفونىنا قوڭىراۋ شالىپ، پوليتسياعا بولعان جايدى حابارلايدى. جەدەل جاردەم كولىگى دە كەلىپ جەتەدى.

«دياستىڭ تانىستارى ەكى تاۋلىك وتكەننەن كەيىن حابارلاماسا، بۇل وقيعا جونىندە ەشكىم بىلمەس ەدى. ءبىزدىڭ قىزمەتكەردىڭ جەدەل دە ساۋاتتى ارەكەتى ارقاسىندا ءبىر ادام امان قالدى»، - دەدى قازاقپارات تىلشىسىنە ج. قۇسايىنوۆ.

اۆتور: ەلجان ەرالى