حالىقارالىق «قازاقپارات» اگەنتتىگىنىڭ ءتىلشىسى «شاڭىراق» بايقاۋىندا ءبىرىنشى ورىن الدى

None
None
نۇر- سۇلتان. قازاقپارات - «قازاقپارات» حالىقارالىق اقپارات اگەنتتىگىنىڭ ءتىلشىسى رۋسلان عابباسوۆ قازاقستان حالقى اسسامبلەياسى ۇيىمداستىرعان «شاڭىراق» بايقاۋىندا I ورىن يەلەندى، دەپ حابارلايدى قازاقپارات ءتىلشىسى.

«شاڭىراق» بايقاۋىنا بۇكىل وڭىردەن جۋرناليستەر قاتىسقان. اقتىق مارەدە تانىمال باق قۇرالدارىنىڭ تىلشىلەرى ۇزدىك اتاندى.

قازاقستاندىق كەلىسىم مەن جالپى حالىقتىق بىرلىكتىڭ قازاقستاندىق مودەلىنىڭ ءمانىن اشۋعا ارنالعان جانە «جاستار جىلى - داڭعىل جول» تاقىرىبىندا جانە الەۋمەتتىك جەلىلەردە جاريالانعان ۇزدىك تالدامالىق ماتەريال اۆتورلارىنا ءۇشىنشى ورىننان ۇشەۋ بەرىلدى. وسىلايشا، ول ورىندارعا «قازاق راديولارى» جاۋاپكەرشىلىگى شەكتەۋلى سەرىكتەستىگىنىڭ رەداكتور- جۇرگىزۋشىسى ءالميرا ەلىمسارى، «قازكونتەنت» اكسيونەرلىك قوعامى assembly.kz پورتالىنىڭ باس رەداكتورى رۋسلان بەگەن، tazael.kz سايتىنىڭ مەنشىكتى ءتىلشىسى بەيبىت وسپان لايىقتى دەپ تانىلدى.

سونداي- اق، قازاقستان حالقى اسسامبلەياسى قازاقستاندىق ەتنوستاردىڭ مادەنيەتى مەن سالت- داستۇرلەرىن دامىتۋعا جانە «قازاق تانۋ» جوباسىن ناسيحاتتاۋعا، اسسامبلەيانىڭ قۇرىلىمدارىنىڭ قىزمەتىن اشىپ كورسەتكەن ماقالا اۆتورلارىنا Ⅱورىننان ۇشەۋ تاپسىرىلدى. ول ورىندارعا حالىقارالىق «Túrkistan» گازەتىنىڭ ءتىلشىسى ەلدوس توقتارباي، «قازاقستان» ۇلتتىق ارناسى اقپارات ءبولىمىنىڭ ارنايى ءتىلشىسى اسيما بۇقاربايەۆا، «Kazakh TV» تەلەارناسىنىڭ ءتىلشىسى زارينا اسانوۆا زارينا يە بولدى.

مەملەكەتتىك ءتىلدى ناسيحاتتاۋ جانە ونىڭ قولدانۋ اياسىن كەڭەيتۋ ماسەلەلەرى مەن اسسامبلەيا مەن ونىڭ قۇرىلىمدارىنىڭ قىزمەتىن اشىپ كورسەتۋگە تىرىسقان ءۇش جۋرناليست I ورىننان كورىندى. جۇلدەلى ءبىرىنشى ورىندى قازاقپارات» حالىقارالىق اقپارات اگەنتتىگى قازاق رەداكسياسىنىڭ ساراپشىسى رۋسلان عابباسوۆ، «حابار-24» تەلەارناسى جاڭالىقتار ءبولىمىنىڭ ءتىلشىسى اقساۋلە بايمەنشينا، «كازاحستانسكايا پراۆدا» گازەتىنىڭ رەداكتورى يۋليا ماگەر يەلەندى.

سونىمەن بىرگە، «ەgemen Qazaqstan»  گازەتىنىڭ- 100  جىل تولۋىنا وراي قازاقستان حالقى اسسامبلەياسى اتالعان باسىلىمعا ارنايى جۇلدەنى تاپسىردى.

اۆتور: ايان بەكەن ۇلى

سوڭعى جاڭالىقتار