الماتىدا قار بارىسىن تۇسىرەتىن فوتوتۇزاقتى ۇرلاپ كەتتى

الماتى. قازاقپارات - الماتى وبلىسى تاۋلارىن مەكەندەيتىن قار بارىسىن تۇسىرۋگە ارنالعان فوتوتۇزاقتى ۇرلاعان تۋريست كامەرانى قايتارىپ بەردى، دەپ حابارلايدى قازاقپارات ءتىلشىسى.

«بيىلعى جىلى قىزىق وقيعا بولدى. ءبىز Snow Leopard Foundation قورى جانە زوولوگيا ينستيتۋتىمەن بىرلەسىپ ىلە الاتاۋ ۇلتتىق پاركىندە قار بارىسىن تۇسىرەتىن فوتوتۇزاقتار ورناتتىق. ءبىز ەكى قۇرىلعىنى ءبىر جەرگە قويدىق. تاۋعا شىققان تۋريست بىرەۋىن وزىمەن الىپ كەتتى. ول ەكىنشىسىن كورمەگەن. سول ەكىنشى كامەرا تۋريستى قىرىنان ءتۇسىرىپ الىپتى. سول سۋرەت ارقىلى فوتوتۇزاقتى قولدى ەتكەن تۋريستى تاۋىپ الدىق» ، - دەيدى الماتى مەملەكەتتىك تابيعي قورىعىنىڭ اعا عىلىمي قىزمەتكەرى سالتورە ساپاربايەۆ.

ونىڭ ايتۋىنشا، كامەرا 1-2 كۇن ىشىندە قايتارىلدى. بۇل فوتوتۇزاقتا ەرەكشە كادرلار بولعان.

«كامەراعا تۇنگى الماتىنىڭ كورىنىسىندە قار بارىسى تاۋعا قاراي بەت الىپ بارا جاتقان سۋرەتى ءتۇسىپ قالعان. بۇل ەندى تاڭعاجايىپ سۋرەت» ، - دەپ قوستى ول.

سونداي- اق، ول وسى جىلدىڭ كوكتەمىندە فوتوتۇزاق ءۇش قار بارىسىن جاقىن قاشىقتىقتا ءتۇسىرىپ العانىن ايتتى.

«الماتى مەملەكەتتىك تابيعي قورىعىنىڭ اۋماعىندا ورنالاسقان تالعار شاتقالىندا مەن ەكى الاڭىن قاسىنا ەرتكەن قار بارىسىن كوردىم. باسىندا مەن ولاردى ءبىر شاقىرىم قاشىقتىقتا كوردىم، كەيىن ولارعا بىلدىرتپەي جاقىنداپ 10 مەتر قاشىقتىقتا باقىلادىم» ، - دەدى ساپاربايەۆ.

ونىڭ ايتۋىنشا، قازىر سيرەك كەزدەسەتىن قار بارىسى جوعالىپ كەتۋ قاۋپى تونگەن جانۋارلار تىزىمىنەن شىعارىلدى. بۇگىندە براكونەرلەرگە قارسى باعدارلاما مەن فوتوتۇزاق كامەرالارىنىڭ ارقاسىندا ولاردىڭ سانى ارتا باستادى.