ەربولات دوسايەۆ قارجى نارىعىنا جاڭا بانكتەردىڭ كىرۋىنە قاتىستى پىكىر ءبىلدىردى

نۇر-سۇلتان. قازاقپارات – ق ر ۇلتتىق بانك ءتوراعاسى ەربولات دوسايەۆ وتاندىق بانكتەر باسەكەلەستىككە دايىن ەكەنىن ءمالىم ەتتى، دەپ حابارلايدى قازاقپارات ءتىلشىسى.

«ماعان ۇنەمى رەسەيلىك ءىرى بانكتەرمەن باسەكەلەستىككە قاتىستى سۇراق قويىپ جاتادى. بۇگىندە ەنشىلىس بانك تۇرىندە بارلىق ءۇش ءىرى ينستيتۋت (سبەربانك، ۆ ت ب، الفا بانك) بىزدە جۇمىس ىستەپ جاتىر. سونىمەن قاتار، فيليال رەتىندە قىتايلىق بانكتەر دە قىزمەت كورسەتۋدە»، - دەپ توقتالدى ە. دوسايەۆ.

وسى ورايدا ول قازاقستاندىق بانكتەردىڭ باسەكەگە قابىلەتتىلىگىنە الاڭداۋدىڭ سەبەبى جوق ەكەنىن اتاپ ءوتتى.

«الداعى جىلدىڭ جەلتوقسان ايىنان باستاپ تىكەلەي فيليالىن قۇراتىن باس ينستيتۋتتىڭ نەگىزگى كاپيتالى 20 ميلليارد ا ق ش دوللارىن قۇراۋى ءتيىس. بۇل ءوز كەزەگىندە تەك ءىرى ينستيتۋتتاردىڭ كىرۋىن عانا قامتاماسىز ەتەدى. وسى ورايدا ءبىزدىڭ نارىققا ولاردىڭ كەلۋىنەن ەشقانداي پروبلەمانى بايقاپ تۇرعانىم جوق. كەرىسىنشە، تىكەلەي كاپيتالمەن جانە بىرلەسكەن كاپيتال تۇرىندەگى 14 شەتەل بانكىنىڭ جۇمىسى كەزەڭىندە ءبىزدىڭ بانكتىك ينستيتۋتتار وزدەرىنىڭ جۇمىستارىن بەلسەندى ەتىپ، تاريفتەرىن تومەندەتتى، سونداي-اق جاڭا ونىمدەردى ەنگىزدى»، - دەپ توقتالدى ە. دوسايەۆ پارلامەنت ماجىلىسىندە تىلشىلەر ساۋالىنا جاۋاپ بەرە وتىرىپ.