دۋبايدا پەتروپاۆلدىق دومبىراشىلار باس جۇلدەنى جەڭىپ الدى

نۇر- سۇلتان. قازاقپارات - دۋبايدا وتكەن حالىقارالىق بايقاۋدا پەتروپاۆلدىق جەتكىنشەكتەر باس جۇلدە جەڭىپ الدى، دەپ حابارلايدى قازاقپارات.

تاياۋ شىعىستىڭ مادەني ءىنجۋ- مارجانى دۋباي قالاسىندا وتكەن «Jumeirah Sounds» ІІІ حالىقارالىق جاستار بايقاۋىنان پەتروپاۆلدىق جەتكىنشەكتەر باس جۇلدە جانە ءبىرىنشى ورىنمەن ورالدى.

جەڭىمپازدار - پەتروپاۆل قالاسىنداعى «كۇدەر» دومبىراشىلار ءانسامبلىنىڭ ونەرپازدارى.

قازاق كۇيىنىڭ قۇدىرەتىن اراب الەمىنە تانىتقان جاس كۇيشىلەردىڭ اراسىندا راسۋل ءومىرزاقوۆ گران- پري جۇلدەسىن جەڭىپ السا، كاميلا ماقپوز جەكە ورىنداۋدا ءبىرىنشى ورىندى يەلەندى. «كۇدەر» دومبىراشىلار ءانسامبلى كورەرمەندەرگە م. اۋباكىروۆتىڭ «تالاس» ، ت. مومبەكوۆتىڭ «سالتانات» ، ەسىر ايشۋاق ۇلىنىڭ «يرەڭ» كۇيلەر ۇسىنعان بولاتىن.

«كۇدەر» ءانسامبلىن تويكەن كۇدەروۆا 1995 -جىلى قۇرعان بولاتىن. سودان بەرى ۇلاعاتتى ۇستاز تالاي جەتكىنشەكتىڭ ساۋساقتارىن دومبىرانىڭ قوس شەگىندە جۇگىرتىپ، ونەردىڭ بيىك شىڭىنا كوتەرە ءبىلدى. تويكەن كۇدەروۆانىڭ قازاقتىڭ قاسيەتتى ونەرىنە جاستاردى تارتۋ ارەكەتى ۇلتتىق مادەنيەتىمىزدى دامىتۋ ىسىنە قوسىپ وتىرعان تەڭدەسسىز ۇلەسى. قازاقستاندىق ونەرسۇيەر قاۋىمنىڭ نازارىن وزىنە اۋدارا بىلگەن ونىڭ شاكىرتتەرى بۇگىندە شەتەلدىك تىڭدارمانداردىڭ دا جۇرەك تۇكپىرىنە قازاقتىڭ ءۇنىن جەتكىزە باستادى. انسامبل مۇشەلەرى جاقىندا عانا ەلىمىزدىڭ جاس دومبىراشىلارى باس قوسقان ۇلكەن دودادا جەڭىس تۇعىرىنان كورىنگەن بولاتىن.

ولار قازان ايىندا وتكەن «جاڭا فورمات» اتتى حالىقارالىق دومبىراشىلار فەستيۆالىنە قاتىسىپ، ءتۇرلى اتالىمدار بويىنشا ەكى گران- پري جانە ءۇش 2-ورىن يەلەندى.

«الدا تاعى ءبىر حالىقارالىق بايقاۋ كۇتىپ تۇر. ول فرانسيادا وتەدى. جەڭىسكە جەتۋ ماقساتىمىز!» ، - دەيدى «كۇدەر» ءانسامبلىنىڭ جەتەكشىسى، ق ر مادەنيەت قايراتكەرى تويكەن كۇدەروۆا.