جاپون قىزدارى جۇمىستا كوزىلدىرىك تاقپاۋى كەرەك پە؟

نۇر-سۇلتان.قازاقپارات - جاپونياداعى جاڭا ەرەجە جۇرتتىڭ قىزۋ تالقىسىنا تۇسۋدە. جەرگىلىكتى باسىلىمدار حابارلاعانداي، ەلدەگى ءبىرشاما كومپانيالار جۇمىستا قىزداردىڭ كوزىلدىرىك تاعۋىنا تىيىم سالعان.

سەبەبى قانداي؟ قانداي كومپانيالار بۇل ەرەجەنى ەنگىزىپ وتىر؟ كۇنشىعىس ەلى ونەرتابىسىمەن، جۇرت بىلە بەرمەيتىن جاڭالىقتارىمەن الەمدى تاڭداندىرۋدان تاڭعان ەمەس. قىزداردىڭ جۇمىستا كوزىلدىرىك تاقپاۋى دا، سونداي جاڭاشىلدىقتارىنىڭ ءبىر پاراسى. جۇمىستا كوزىلدىرىك تاققان قىزدىڭ ءجۇزى سۋىق كورىنەدى ەكەن. ءارقاشان جايدارلى جۇرەتىن جاپوندار ءۇشىن بۇل ەرسى كورىنىس سانالادى- مىس. قازىرگى تاڭدا اۋە كومپانيالارى قاۋىپسىزدىك ءۇشىن كوزىلدىرىك تاقپاۋ جايلى ەرەجەنى ەنگىزۋدى باستاپ كەتكەن. ءسان فيرمالارى دا قىزداردىڭ كوزىلدىرىك تاعۋىن قولداماۋدا. سەبەبى كوزىلدىرىك قىزداردىڭ ماكياجىن كولەگەيلەيدى ەكەن. ەلدەگى ۇلتتىق مەيرامحانا قىزمەتكەرلەرى دە كوزىلدىرىك تاقپاۋى ءتيىس. ونىڭ دا سەبەبى بار. كوزىلدىرىك ۇلتتىق ناقىشقا ساي كەلمەيدى، سونداي- اق قىزداردىڭ تارتىمدىلىعىن دا جاسىرادى. ولار كوزى ناشار كورەتىندەر ءۇشىن لينزا تاعۋعا كەڭەس بەرەدى.

 جاپون قىزدارى جۇمىستا كوزىلدىرىك تاقپاۋ تۋرالى ەرەجەگە تۇبەگەيلى قارسى. ارنايى حەشتەگ (#メガネ着用禁止) ارقىلى ءوز قارسىلىقتارىن بىلدىرۋدە. - جۇمىستا كوزىلدىرىك تاعىپ ءجۇرۋ قىزدارعا شىنىمەن قيىن بولاتىن بولسا، وندا ەرەجە بارىنە بىردەي بولۋ كەرەك. ايەلدەر سەكىلدى ەرلەر كوزىلدىرىك تاقپاۋى ءتيىس، - دەيدى ەلدەگى اكتريسا يۋمي يسيكاۆا. ول بيىك وكشەلى اياق كيىم كيۋگە قارسى شىققان بەلسەندىلەردىڭ ءبىرى بولاتىن. كۇنشىعىس ەلىندە قىزدار ۇناتا بەرمەيتىن داۋلى جايتتار كوپ- اق. وسىعان دەيىن ەلدەگى ءبىراز كومپانيا جۇمىسقا قىزدار تەك بيىك وكشەلى اياق كيىممەن كەلۋلەرى كەرەك دەپ ەرەجە شىعارعان. بۇل دا قوعامدىق داۋ تۋدىرعان ەدى. ءتىپتى جىل باسىندا قىزدار جۇمىسقا مىندەتتى تۇردە ماكياج جاساتىپ كەلۋ كەرەك دەپ تە تالاپ قويعان جۇمىس بەرۋشىلەر بولعان. بۇل جايىندا كيوتو ۋنيۆەرسيتەتىنىڭ پروفەسسورى، الەۋمەتتانۋشى كۋميكو نەموتو ءوز ويىن بىلدىرگەن.

ول كوزىلدىرىك تاقپاۋ، بيىك وكشەلى اياق كيىم كيۋ سەكىلدى ەرەجەلەر قىزداردىڭ دارەجەسىن تومەندەتۋ بولىپ سانالمايتىنىن العا تارتادى. جۇمىس ساپاسىنا دا اسەرى بولمايتىنىن ءسوز ەتەدى. تەك جۇمىس بەرۋشى كومپانيالار قىزداردىڭ نازىك ءارى كورىكتى بولىپ جۇرگەنىن تالاپ ەتۋدەن تۋىنداعان ەرەجە دەپ تۇسىندىرەدى. كوزىلدىرىك تاقپاۋ جايلى ەرەجەنى قولداعاندار دا ءبىرشاما. مىسالى، ۇلتتىق مەيرامحانالاردا كيمونو كيىپ قىزمەت كورسەتەتىن قىزدار كوزىلدىرىك تاقسا ءبىرتۇرلى كورىنەتىنىن ايتۋشىلار دا بار. ال بۇلارعا قارسى قىزدار كيمونو كيىپ، كوزىلدىرىك تاعىپ تۇسكەن سۋرەتتەرىن الەۋمەتتىك جەلىلەرىنە كوپتەپ جۇكتەي باستادى.

Massaget.kz