رەسەيدىڭ تۇمەن وبلىسىندا قازاق سىنىبى اشىلدى

پەتروپاۆل. قازاقپارات - رەسەيدىڭ تۇمەن وبلىسىندا جاقىندا اشىلعان قازاق سىنىبىنا وقۋلىقتار تارتۋ ەتىلدى، دەپ حابارلايدى قازاقپارات ءتىلشىسى.

رەسەيدىڭ تۇمەن وبلىسىندا 28 - قازان قازاق سىنىبى اشىلىپ، قازىر 25 بالا ءوز انا تىلىندە ءبىلىم الىپ جاتىر. الايدا مۇندا ۇستازدار مەن وقۋشىلارعا ارنالعان قازاق تىلىندەگى وقۋ- ادىستەمەلىك قۇرالدار تاپشى.

تۇمەندەگى قازاق بالالارىنا قولداۋ كورسەتۋ ماقساتىندا بۇگىن وبلىستىق قازاقستان حالقى اسسامبلەياسىندا «باعا جەتپەس سىي» اتتى اكسيا ءوتتى. وعان تۇمەن وبلىسى قازاقتارىنىڭ ۇلتتىق- مادەني اۆتونومياسىنىڭ ءتوراعاسى ەسەنعالي يبرايەۆ، وبلىستىق ءبىلىم باسقارماسىنىڭ، تىلدەردى دامىتۋ باسقارماسىنىڭ، ورتالىقتاردىڭ وكىلدەرى قاتىستى.

س ق و قازاقستان حالقى اسسامبلەياسىنىڭ مالىمەتىنشە، سولتۇستىكقازاقستاندىقتار جاقىندا اشىلعان قازاق سىنىبىنا كومەك رەتىندە جانە وندا ءبىلىم الىپ جاتقان قازاق بالالارىنا قولداۋ كورسەتۋ ماقساتىندا رەسەيلىك ارىپتەستەرىنە 200 كىتاپتى سىيعا بەردى. قازاق ءتىلىن تەرەڭ مەڭگەرۋگە مۇمكىندىك بەرەتىن عىلىمي- ادىستەمەلىك قۇرالدار، قازاق تىلىندەگى وقۋلىقتار جانە قازاقتىڭ اقيىق اقىنى ماعجاننىڭ جىر جيناقتارى، ابايدىڭ قارا سوزدەرى، «داڭقتى ادامدار» سەرياسىمەن شىققان ادەبيەت، تاعى باسقا كوپتەگەن قۇندى شىعارمالار بالالاردىڭ عانا ەمەس، ءتۇرلى جاستاعى ءتىل ۇيرەنۋشىلەردىڭ كەرەگىنە جارايدى.

«بولاشاقتا مۇنداي جۇمىس جالعاسىن تابادى. تىلدەردى دامىتۋ باسقارماسى تاراپىنان وسى سياقتى جۇمىستار 2015 -جىلدان ىسكە اسىرىلىپ كەلەدى. بۇل - «تىلدەردى دامىتۋ مەن قولداۋ» مەملەكەتتىك باعدارلاماسى اياسىندا جۇزەگە اسىرىلادى. بۇل جوبانىڭ شەتەلدە تۇرىپ جاتقان ەتنيكالىق قازاقتاردى وقۋ- ادىستەمەلىك قۇرالدارمەن قامتۋعا كومەك كورسەتۋ دەگەن ارنايى تارماعى بار» ، - دەيدى س ق و تىلدەردى دامىتۋ جونىندەگى باسقارمانىڭ ءبولىم جەتەكشىسى اسەم سۇلەيمەنوۆا.