ق ر پرەزيدەنتى قارۋلى كۇشتەردى زامان تالابىنا ساي جاساقتاۋ جونىندە تاپسىرما بەردى
قازاقستان پرەزيدەنتى - قارۋلى كۇشتەردىڭ جوعارعى باس قولباسشىسى قاسىم- جومارت توقايەۆ قورعانىس ءمينيسترىنىڭ قازاقستان اسكەرىنىڭ قازىرگى احۋالى مەن دامۋ پەرسپەكتيۆالارى تۋرالى ەسەبىن تىڭدادى.
نۇرلان ەرمەكبايەۆ مەملەكەت باسشىسىنا ارىس قالاسىنداعى توتەنشە جاعدايدىڭ سالدارىن جويۋ تۋرالى باياندادى. اسكەري ۆەدومستۆو باسشىسىنىڭ ايتۋىنشا، ەلىمىزدەگى بارلىق وق- ءدارى قويمالارىنا تەكسەرۋ جۇرگىزىلگەن. ناتيجەسىندە اتالعان نىسانداردى قاجەتتى قاۋىپسىزدىك دەڭگەيىنە جەتكىزۋ جانە وڭتايلاندىرۋ جوسپارى دايىندالعان.
قورعانىس ءمينيسترى ۆەدومستۆونىڭ ورتالىق اپپاراتىنىڭ قىزمەتىنە فۋنكتسيونالدى تالداۋ جۇرگىزۋدىڭ ءبىرىنشى كەزەڭى تۋرالى ەسەپ بەردى. ونىڭ ايتۋىنشا، اتقارىلعان جۇمىستاردىڭ ناتيجەسىندە مينيسترلىكتىڭ، باس شتابتىڭ جانە اسكەري باسقارمانىڭ جەرگىلىكتى ورگاندارىنىڭ 300-دەن اسا شتاتتىق بىرلىگى وڭتايلاندىرىلدى. سونىڭ ەسەبىنەن 2020 -جىلدان باستاپ جىل سايىنعى ۇنەم 450 ميلليون تەڭگەدەن اساتىن بولادى. بۇل قارجى اسكەري قۇرامدى ماتەريالدىق تۇرعىدان ىنتالاندىرۋعا باعىتتالادى.
سونىمەن قاتار نۇرلان ەرمەكبايەۆ قاسىم- جومارت توقايەۆقا كەزەكتى اسكەر قاتارىنا شاقىرۋ ناۋقانىنىڭ قورىتىندىلارى، قىسقى وقىتۋ ماۋسىمىنا دايىندىق جانە اسكەري تەحنيكالاردى قىسقى رەجيمگە كوشىرۋ جونىندە مالىمەت بەردى. بۇدان بولەك اۋە قورعانىسى مەن اسكەري- تەڭىز كۇشتەرىن دامىتۋ، جەڭىستىڭ 75 جىلدىعىنا ارنالعان اسكەري شەرۋگە دايىندىق، سونداي- اق، اسكەري قىزمەتشىلەردى الەۋمەتتىك تۇرعىدان قورعاۋ ماسەلەلەرى قوزعالدى.
كەزدەسۋ سوڭىندا قاسىم- جومارت توقايەۆ ەلىمىزدىڭ قارۋلى كۇشتەرىن قازىرگى زامان تالابىنا ساي جاساقتاۋعا قاتىستى ءبىرقاتار ناقتى تاپسىرما بەردى.