باعدارشام تۋرالى قىزىقتى دەرەكتەر

نۇر-سۇلتان. قازاقپارات - الەمدەگى ەڭ العاشقى باعدارشامنىڭ قاشان جانە قاي جەردە ورناتىلعانىن بىلەسىز بە؟

ول وسىدان تۋرا 105 جىل بۇرىن، ياعني 1914 -جىلى 5 - شىلدەدە امەريكانىڭ كليۆلەند قالاسىندا ورناتىلعان. الايدا ول جارتىلاي عانا اۆتوماتتاندىرىلعاندىقتان، باعدارشامدى جانىنداعى ارنايى كۇركەدە وتىرعان پوليسەي باسقارعان ەكەن.

جول قوزعالىسىن رەتتەۋدىڭ ءتۇرلى ادىستەرى بۇرىن دا قولدانىلعان. كەيبىرى باعدارشام 1968 -جىلى لوندوندا ويلاپ تابىلدى دەگەن پىكىردە. الايدا قۇرىلىمى بويىنشا زاماناۋي باعدارشامدارعا ۇقسامايتىن بۇل قۇرىلعىلار قولدانىستا قالا الماعان. وعان اسا ۇلكەن ءارى كۇردەلى بولۋى سەبەپ. سونىمەن قاتار قاۋىپسىز بولماعان. ءتىپتى، مۇنداي باعدارشامداردىڭ ءبىرى جارىلىپ كەتىپ، جانىندا تۇرعان پوليتسەي ايتارلىقتاي اۋىر جاراقاتتانىپتى. سوندىقتان قازىر ءبىز كورىپ جۇرگەن باعدارشامدار 1914 -جىلى دجەيمس حوگ ويلاپ تاپقان باعدارشامنىڭ جالعاسى بولىپ تابىلادى.

سول ۋاقىتتا جاڭا ونەرتابىس بىرنەشە جىلعا ۇمىت بولعان. سەەبى جول قوزعالىسى باعدارشامدى قاجەت ەتەتىندەي ايتارلىقتاي كۇردەلى بولمادى. تەك ارادا 6 جىل وتكەننەن كەيىن دەترويتتاعى ترافيك ارتىپ، جول قوزعالىسىن رەتتەۋ ءۇشىن ءتيىمدى قۇرىلعى قاجەت بولعاندا حوگتىڭ باعدارشامى ەسكە تۇسكەن. سوندا ۆۋدۆورد جانە ميچيگان كوشەلەرىنىڭ قيىلىسىنا ەكىنشى باعدارشام ورناتىلدى. ونىڭ بىرىنشىسىنەن ايىرماشىلىعى - سارى ءتۇستىڭ قوسىلۋى. العاشقى باعدارشامدا تەك قىزىل جانە جاسىل تۇستەر بولعان. 1923 -جىلى گاررەت مورگان اۆتوماتتاندىرىلعان العاشقى باعدارشامدى ۇسىنىپ، ول 5 - تامىزدا پاتەنتتەلدى.

باعدارشامدار الەم بويىنشا تەز تارادى. رەسەيدە العاشقى باعدارشام 1930 -جىلى لەنينگراد جانە ماسكەۋدە پايدا بولدى.

ال كەيبىر ەلدەرگە باعدارشام وزگەرتىلگەن تۇردە جەتكەن. مىسالى، جاپيونيادا ونداعان جىلدار بويى جاسىلدىڭ ورنىنا كوك ءتۇسىپ قولدانىلىپ كەلدى. مۇندا باعدارشامداردىڭ ءداستۇرلى تۇرىنە اۋىستىرىلعانىنا قانشاما ۋاقىت وتسە دە، «كوك ءتۇس جانعاندا ءجۇر، قىزىل بەلگىسىنە توقتا» دەگەن اكسيوما ءالى دە تۋريستەردى تاڭعالدىرۋدا.

باعدارشام تۋرالى قىزىقتى دەرەكتەر:

لوندوندا باعدارشامعا ارنالعان ەڭ ۇلكەن ەسكەرتكىش ورناتىلعان.

مەگاپوليس تۇرعىنى ورتاشا ەسەپپەن ءومىرىنىڭ شامامەن 6 ايىن باعدارشامنىڭ جاسىل بەلگىسىن كۇتۋمەن وتكىزەدى.

2005 -جىلدان بەرى ريو- دە- جانەيرودا تۇنگى ۋاقىتتا باعدارشامنىڭ قىزىل بەلگىسىنە نازار اۋدارماۋعا رەسمي تۇردە رۇقسات ەتىلگەن. بۇل جۇرگىنشى توقتاعان جاعدايدا ونى توناپ كەتۋ قاتەرىنىڭ ارتۋىمەن بايلانىستى.

ق ح د ر استاناسى پحەنياندا تەك 2010 -جىلى باعدارشامدار جاپپاي تاراي باستاعان. وعان دەيىن اتالعان قۇرىلعىنى جول قوزعالىسىن رەتتەۋشى قىزدار الماستىرعان.

بەرليندە 13 بەلگىسى بار باعدارشام بار. ارنايى دايىندىعى جوق ادامدارعا ونىڭ بەلگىلەرىن ءتۇسىنۋ مۇمكىن ەمەس. سوندىقتان جانىندا وتىرعان پوليسەي باعدارشامنىڭ جول قوزعالىسىنا قاتىسۋشىلاردان نە تالاپ ەتەتىنىن ءتۇسىندىرىپ وتىرادى.

جۇزدەن اسا جىل ىشىندە باعدارشامدار ايتارلىقتاي وزگەرىپ، جوعارىتەحنولوگيالى جانە قۋاتتى ۇنەمدەيتىن تۇرگە جەتتى. ولاردىڭ كەيبىرىن ينتەللەكتۋالدى كولىك جۇيەسىنە قوسۋدا. بۇل باعدارشام قوزعالىس ترافيگىنە بايلانىستى جۇمىسن ءتارتىبىن وزدەگىنەن وزگەرتە الۋى ءۇشىن جاسالعان.

جول قاۋىپسىزدىگىن قامتاماسىز ەتۋگە قاتىستى تەحنولوگيالار مۇنان ءارى دە دەمي بەرمەك. كورەيالىق ديزاينەر حانيۋن لي باعدارشامداردى گولوگراممالارمەن تولىقتىرۋ تۋرالى يدەيا ۇسىندى. ونىڭ يدەياسىنا سايكەس، جاياۋ جۇرگىنشىلەر جولدان ءوتىپ بارا جاتقاندا، جۇرگىزۋشىلەر جولدان ءوتىپ بارا جاتقان ادامدار بەينەلەنگەن ۇلكەن قىزىل گولوگراممانى كورۋى ءتيىس.

مۇنداي تەحنولوگيا قولدانىسقا ءسىڭىپ كەتە الا ما، الدە ودان دا ءتيىمدى قۇرىلعى ويلاپ تابىلا ما، ونى ۋاقىت كورسەتەدى. الايدا بارلىق باعدارشامنىڭ اتاسى 105 جىل بۇرىن كليۆلەندتە ورناتىلعان العاشقى باعدارشام بولىپ قالا بەرەدى.