اسقار مامين ەلوردادا ءوتىپ جاتقان عارىش فورۋمىنا قاتىستى

نۇر- سۇلتان. قازاقپارات - اسقار مامين «قازاقستانداعى عارىش كۇندەرى: بايقوڭىر - الەمدىك عارىشكەرلىك بەسىگى» فورۋمىن اشتى، دەپ حابارلايدى قازاقپارات پرەمەر- ءمينيستردىڭ باسپا ءسوز قىزمەتىنە سىلتەمە جاساپ.

ۇكىمەت باسشىسى «روس كوسموس» كورپوراتسياسىنىڭ باسشىسى د. روگوزينمەن جانە «One Web»  كومپانياسىنىڭ قارجى ديرەكتورى ت. ۋەينمەن كەزدەسۋلەر وتكىزدى، ولارمەن قازاقستاننىڭ عارىش سالاسىن دامىتۋ ماسەلەلەرى تالقىلاندى.

«ەلباسى ن. نازاربايەۆ پەن پرەزيدەنت ق. توقايەۆ «بايقوڭىر» عارىش ايلاعىنىڭ ينفراقۇرىلىمىن دامىتۋعا جانە ونى الدىڭعى قاتارلى ستاندارتتارعا سايكەستەندىرە وتىرىپ، جاڭعىرتۋعا ەرەكشە كوڭىل بولەدى»، - دەدى ا. مامين فورۋمنىڭ اشىلۋىندا.

ۇكىمەت باسشىسى الەمنىڭ العاشقى عارىش ايلاعى ءوزىنىڭ دامۋىنىڭ جاڭا كەزەڭى قارساڭىندا ەكەنىن، بۇل كۇشتەردى، يدەيالاردى جانە سەرىكتەستىك قولداۋدى شوعىرلاندىرۋدى قاجەت ەتەتىنىن اتاپ ءوتتى.

«ەلوردامىز نۇر- سۇلتان قالاسىندا قازاقستان مەن فرانسيا كاسىپورىندارىنىڭ كووپەراتسياسى اياسىندا ءتۇرلى ماقساتتاعى سپۋتنيكتەردى قۇراستىرۋعا جانە سىناقتان وتكىزۋگە مۇمكىندىك بەرەتىن عارىش اپپاراتتارىن قۇراستىرۋ- سىناۋ كەشەنىن قۇرۋ اياقتالۋعا جاقىنداپ قالدى. بۇل جوبا تۇراقتى جانە ۇزاق مەرزىمدى قازاقستاندىق- فرانسۋز ونەركاسىپتىك كووپەراتسياسىنا ارنالعان»، - دەدى ا. مامين.

پرەمەر- مينيستر قازاقستاندىق كاسىپورىندار مەن ۆەدومستۆولاردىڭ ب ا ءا، تۇركيا، ا ق ش، يوردانيا، وڭتۇستىك كورەيا، ۋكراينا، ۇلى بريتانيا، جاپونيا، قىتاي جانە باسقا دا كوپتەگەن ەلدەردىڭ عارىش سالاسىنداعى ۇيىمدارمەن جۇمىستارى بەلسەندى جۇرگىزىلىپ جاتقانىن اتاپ ءوتتى. جۋىردا جەردى ديستانتسيالىق زوندتاۋ دەرەكتەرىمەن الماسۋ، جدز جەرسەرىكتىك توپتامالارىن بىرلەسىپ ءوندىرۋ جانە كوممەرتسيالاندىرۋ بويىنشا ىنتىماقتاستىقتى دامىتۋ كوزدەلىپ وتىر.

«ءبىز بايلانىس جەرسەرىگىن ءوندىرۋ بويىنشا ونەركاسىپتىك كووپەراتسياعا، بايقوڭىر عارىش ايلاعىندا بىرلەسكەن ينۆەستيتسيالىق كوممەرتسيالىق جوبالاردى جۇزەگە اسىرۋعا اشىقپىز»، - دەدى ا. مامين.

ۇكىمەت باسشىسى فورۋم قاتىسۋشىلارىنا قازاقستاننىڭ بايلانىس عارىش جۇيەلەرىن جانە ج د ز قارجىلاندىرۋدى $300 ميلليون دەيىن جەتكىزۋ بويىنشا جوسپارلارىمەن ءبولىستى، ونىڭ ىشىندە جەكە كاپيتالدى تارتۋ كوزدەلگەن. جاقىندا بايقوڭىر عارىش ايلاعىندا «بايتەرەك» ەكولوگيالىق قاۋىپسىز عارىش زىمىران كەشەنىن قۇرۋ بويىنشا اۋقىمدى جوبانى ىسكە اسىرۋ باستالادى، بۇل كەشەن رەسەيلىك تاراپتىڭ باستاماسىمەن «نازاربايەۆ ستارتى» دەپ قايتا اتالدى.

«بايقوڭىر عارىش ايلاعىندا №1 «گاگارين ستارتى» ستارتتىق الاڭىن جاڭعىرتۋ بويىنشا جوبانى پىسىقتاۋ جۇرگىزىلۋدە»، - دەدى ا. مامين.

«قازاقستانداعى عارىش كۇندەرى» حالىقارالىق فورۋمى جىل سايىن 2013 -جىلدان بەرى وتكىزىلىپ كەلەدى. بيىلعى ءىس- شاراعا الەمنىڭ 25-تەن استام ەلىنەن 650 قاتىسۋشى - ق ر سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگىنىڭ باسشىلارى، ق ر پارلامەنتنىڭ ءماجىلىس جانە سەنات دەپۋتاتتارى، قازاقستان رەسپۋبليكاسىنىڭ عارىشكەرلەرى، شەتەلدىك مەملەكەتتەردىڭ ەلشىلىكتەرىنىڭ وكىلدەرى، «روس كوسموس»،  وتاندىق جانە شەتەلدىك ۇيىمدار جانە باسقالارى قاتىستى.