ءدال قازىر ءساتى كەلىپ تۇر: نازاربايەۆ پۋتين مەن زەلەنسكيدى كەزدەستىرۋدى ۇسىندى

نۇر-سۇلتان. قازاقپارات – ق ر تۇڭعىش پرەزيدەنتى - ەلباسى نۇرسۇلتان نازاربايەۆ رەسەي مەن ۋكراينا اراسىنداعى قاقتىعىسقا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«رەسەي مەن ۋكراينانىڭ اراسىنداعى جاعداي، ارينە، قىنجىلتادى. ولار ءبىر-بىرىنە وتە جاقىن ەلدەر. الايدا بولارى بولدى. ىشكى جانە سىرتقى كۇشتەر ارالاسىپ كەتتى. قازىر قارىم-قاتىناستىڭ اجىراپ كەتكەنى سونشالىق... ۋكراينا مەن رەسەيدى وتە جاقسى بىلەمىن. العاشقى كۇندەردەن باستاپ-اق ەكى ەلدى تاتۋلاستىرۋعا تىرىسىپ كەلەمىن. مەنىڭ جۇمىسىمنىڭ ناتيجەسى - مينسكتەگى العاشقى كەزدەسۋ بولدى. باسىندا مەن ەۋروپالىق ەلدەردى ارالاپ، مەركەل حانىممەن كەزدەستىم. كەيىن كيەۆكە كەلىپ، پوروشەنكومەن كەزدەستىم. ودان كەيىن ماسكەۋگە باردىم. فرانسيا پرەزيدەنتى قازاقستاندا بولعان كەزدە جول ورتادا پۋتينمەن كەزدەسۋدى ءوتىندىم. وسىنىڭ ناتيجەسىندە ءبىز مينسكتە باس قوسىپ، ماسەلەلەردى شەشۋگە تىرىستىق»، - دەدى نۇرسۇلتان نازاربايەۆ Astana Club وتىرىسىندا.

ەلباسىنىڭ ايتۋىنا قاراعاندا، ءبارى ويداعىداي كەلە جاتقان.

«ماسكەۋدىڭ تالابى مەن ءوتىنىشى - ۋكراينانىڭ شىعىسىنداعى ازاماتتاردى قورعاۋ تۋرالى زاڭ قابىلداۋ ەدى. ول ازاماتتار - سونداعى پروتسەسكە قاتىسقاندار، سوتتالعاندار، تاعى باسقا... ۋكراينا راداسى مۇنداي زاڭدى قابىلداعانىمەن، ول ورىندالماي جاتا بەردى. زاڭ وسى جىلدىڭ 31- جەلتوقسانىندا كۇشىن جويادى»، - دەدى ول.

نۇرسۇلتان نازاربايەۆ ۋكراينانىڭ قازىرگى پرەزيدەنتى ۆلاديمير زەلەنسكيمەن كەزدەسكەنىن ايتىپ ءوتتى.

«كەشە ۆلاديمير پۋتينمەن بۇل ماسەلەنى ارى قاراي قالاي شەشۋگە بولاتىنى تۋرالى تىلدەستىم. قارىم-قاتىناستىڭ ۋشىققانى سونشالىق، ۋكراينا باتىس پەن ا ق ش- قا اپپەلياتسيامەن شىعىپ وتىر. مەنىڭ ويىمشا، رەسەي مەن ۋكراينانىڭ پرەزيدەنتتەرىن جەكە كەزدەستىرۋ كەرەك. تەك وسىلاي عانا كەلىسۋگە بولادى. سەبەبى، ەكى ەل اراسىنداعى ناقتى جاعداي شەشىلەدى. مەن وسىنداي كەزدەسۋ مۇمكىن دەپ ويلايمىن. مەنىڭشە، قازىر وسى كەزدەسۋدىڭ ءدال ءساتى تۋىپ تۇر. بىرىنشىدەن، زەلەنسكي سايلاۋدا حالىقتىڭ قولداۋىنا يە بولدى. دۋما دا جاڭا پرەزيدەنتتى قولدايتىن ازاماتتاردى سايلادى. ول وسى ماسەلەنى شەشە الادى. قوس تاراپ كەلىسسە، بۇل ماسەلەنى العا جىلجىتۋ كەرەك»، - دەدى ەلباسى.

نۇرسۇلتان نازاربايەۆتىڭ ايتۋىنشا، قازىر اسكەرلەر ءبىر-بىرىنەن الىستاپ جاتىر.

«ياعني، ماسەلەنىڭ شەشىمى بار. العا جىلجۋ كەرەك. رەسەي مەن ۋكراينا پرەزيدەنتتەرى جىگەر تانىتا ءبىلۋى ءتيىس. بۇل باعىتتا جۇمىس جۇرگىزىپ جاتىرمىن. بارشاڭىزدى رەسەي مەن ۋكراينانىڭ اراسىنداعى قاتىناستى بۇزباي، كەرىسىنشە جاقىنداستىرۋدى ۇسىنامىن. دونباس پەن لۋگانسكتەگى ماسەلەنى شەشۋ كەرەك. پروتسەسس ءجۇرىپ جاتىر. تۇتقىنداعى ازاماتتار بوساپ، اسكەر ءبىر-بىرىنەن الىستاي باستادى. سوندىقتان، وسىنداعى ساراپشىلار دا ونداعى بەيبىتشىلىكتى ساقتاۋ باعىتىندا وي ايتۋى ءتيىس»، - دەدى ول.

تۇڭعىش پرەزيدەنت رەسەي مەن ۋكراينا پرەزيدەنتتەرىنىڭ كەزدەسۋى ءۇشىن نەيترالدى ايماق رەتىندە قازاقستاندى ۇسىندى.

ەسكە سالا كەتەيىك، كەشە ق ر تۇڭعىش پرەزيدەنتى نۇرسۇلتان نازاربايەۆ رەسەي فەدەراتسياسىنىڭ پرەزيدەنتى ۆلاديمير پۋتينمەن تەلەفون ارقىلى سويلەسكەن ەدى. ال جاپونياعا ساپارى كەزىندە ەلباسى ۋكراينا پرەزيدەنتى ۆلاديمير زەلەنسكيمەن كەزدەسكەن.