مۇقاعاليدىڭ «شاشىڭنان يىسكەيىن» ءانىنىڭ كىمگە ارنالعانى بەلگىلى بولدى

نۇر-سۇلتان. قازاقپارات - بۇگىندە ءانشى ەركىن نۇرجانوۆ ورىنداپ جۇرگەن ءاننىڭ ءسوزىن اقيىق اقىن مۇقاعالي ماقاتايەۆتىڭ جەتپىسىنشى جىلداردىڭ ورتاسىندا جازعانى بەلگىلى.

ال ولەڭنىڭ كىمگە ارنالعانىن جانە شىعۋ تاريحىن كۇلسىنبۇبى قىبىرايەۆا ايتىپ بەردى.

1974 -جىلى جاز ايى بولاتىن. ول كەزدە مەن 24 جاستامىن. جولداسىم جانە قازاق راديوسىنىڭ ديكتورى باقىتجان اتاگەلديەۆ ۇشەۋىمىز كوشەدە كەلە جاتقانبىز. جولدا مۇقاعالي اتامىزبەن قاراما- قارسى جولىعىپ قالدىق. ول كىسىنىڭ ءبىر قاسيەتى ءبىزدىڭ جاقتىڭ ادامدارىن بىردەن تانيتىن. ولار امانداسىپ، جاقىن جەردە فويە بار ەكەن، سوندا بارىپ وتىردى.

مەن ەر ادامدارعا ارالاسپايىن دەپ ءبىر تالدىڭ كولەڭكەسىندە تۇردىم. بۇل كىسى ءبىر-ەكى رەت ارتىنا قاراپ قويىپ وتىرعان. ءبىر كەزدە ماعان قارادى دا «اناۋ مەنىڭ جەرىمنىڭ قىزى، مەنىڭ ەلىمنىڭ توپىراعىنىڭ ءيىسى شىعىپ تۇر عوي، نەعىپ تۇر انا جەردە، شاقىرىڭدار»، دەدى. سودان قاستارىنا كەلىپ وتىردىم. ول كىسى قاراپ وتىرىپ ءبىر-ەكى سۇراق قويدى.

- قاي وقۋدى ءبىتىردىڭ، دەدى.

- شەت تىلدەر ينستيتۋتىن ءبىتىردىم، دەدىم،

- و- و، شەت تىلدەر ينستيتۋتىن بىتىرسەڭ نەگە شاشىڭدى قيمادىڭ، نەگە بويانبادىڭ، دەدى. ول كەزدە قالادا قانشا جىل وقىسام دا شاشىمدى قيماي قوس بۇرىم ەتىپ ءورىپ قوياتىنمىن. سودان قاراپ وتىردى دا، ءبىر كەزدە وزىنە قاراي تارتىپ، ماڭدايىمنان ءسۇيىپ، شاشىمنان سيپادى دا وسى ولەڭدى وقىدى.

يەك ارتقان تەڭىزگە مۇيىستەيىن،

كەلشى، قارعام، شاشىڭنان يىسكەيىن؟

يىسكەيىن تەك قانا، تيىسپەيىن،

كەلشى، قارعام، شاشىڭنان يىسكەيىن؟

قويۋ قارا شاشىڭ-اي كۇن قاقتاعان!

قوس بۇرىم-اي جوتاڭدا بۇلعاقتاعان!

قارعام، سەندە جەرىمنىڭ ءيىسى بار-اۋ،

جەر ءيىسى جۇپاردان قىمبات ماعان!

ءتورت شۋماق. وقىپ ءبىتىپ «وسى ولەڭدى مەن ساعان ارنادىم، قالقام»، دەدى.

ءبىر-ەكى ايدان سوڭ «لەنينشىل جاس» گازەتى بولسا كەرەك سول كىسىنىڭ ولەڭدەر جيناعى جارىق كوردى. جولداسىم الىپ جۇگىرىپ كەلىپتى. «مىناعان قارا، ساعان ارناعان ولەڭ شىعىپتى»، - دەدى. راسىندا دا سول گازەتكە جاريالانعان ولەڭدەردىڭ ىشىندە ءجۇر ەكەن.

ولەڭدى العاش رەت ءان رەتىندە رامازان ستامعازيەۆ دومبىرامەن ورىندادى. كەيىن ەركىن نۇرجانوۆ ەستراداعا الىپ كەلدى. ال انگە ارقاۋ بولعان كۇلسىنبۇبى قىبىرايەۆا قازىر الماتى قالاسىندا تۇرادى. بالالى-شاعالى. سان جىلدار ءال-فارابي اتىنداعى دارىندى بالالارعا ارنالعان گيمنازيادا ماماندىعى بويىنشا ۇستازدىق ەتكەن. بۇگىندە قۇرمەتتى زەينەتكە شىققان...

جاننا تولەنديەۆانىڭ الەۋمەتتىك جەلىدەگى پاراقشاسىنان