ديماش قۇدايبەرگەن تۋريستەر اراسىندا اقتوبە وبلىسىنىڭ تانىمالدىعىن ەسەلەدى - وڭداسىن ورازالين
كەزدەسۋ بارىسىندا الەۋمەتتىك-ەكونوميكالىق، ءبىلىم، مادەني قارىم-قاتىناستار جايى ءسوز بولدى. ايماق باسشىسى اقتوبە وڭىرىنە العاش رەت كەلگەن چجان سياوعا وبلىستىڭ دامۋ جولىن ايتىپ بەردى.
«مەملەكەت باسشىسى قاسىم-جومارت توقايەۆ قىتاي حالىق رەسپۋبليكاسىنا رەسمي ساپارى كەزىندە قىتاي قازاقستاننىڭ ەڭ ءىرى سىرتقى ساۋدا جانە ەكونوميكالىق ارىپتەستەرىنىڭ ءبىرى بولعانىن مالىمدەدى. بيىلعى جىلدىڭ 8 ايىندا قىتاي مەن اقتوبە وبلىسى اراسىنداعى تاۋار اينالىمى 664,6 ميلليون ا ق ش دوللارىن قۇراپ، بۇل وتكەن جىلدىڭ سايكەس كەزەڭىمەن سالىستىرعاندا %34 وسكەنىن كورسەتتى»، - دەپ اتاپ ءوتتى وڭداسىن ورازالين.
قازاقستان ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى يندۋستريالاندىرۋ جانە ينۆەستيتسيالار سالاسىنداعى ىنتىماقتاستىقتى نىعايتۋ تۋرالى كەلىسىم اياسىندا اقتوبە وبلىسىندا 695 ميلليون ا ق ش دوللارىن قۇرايتىن 4 جوبا ىسكە اسىرىلۋدا. سونداي-اق، وڭداسىن ورازالين جوعارى تەحنولوگيالىق جوبالار اشۋعا نيەتتى ينۆەستورلارعا تولىق جاعداي جاسالاتىندىعىن، ال ينۆەستورلار تاراپىنان قىزمەتكەرلەردىڭ جالاقىسىن ارتتىرۋ، قىزمەتكەرلەردى وقىتۋ، قاۋىپسىزدىك تەحنيكاسى مەن ەكولوگيالىق تالاپتار ساقتالۋى ءتيىس ەكەندىگىن ايتتى.
«اقتوبە وبلىسىنىڭ ماقتانىشى ديماش قۇدايبەرگەن العاش رەت قىتايدا الەمگە تانىمال بولدى. قىتايدىڭ جانكۇيەرلەرى الەم بويىنشا ديماشپەن بىرگە جۇرەدى. وسىنىڭ ءبارى تۋريستەر اراسىندا اقتوبە وبلىسىنىڭ تانىمالدىعىن ەسەلەپ كوتەرەدى»، - دەدى ءوڭىر باسشىسى.
ءوز كەزەگىندە ق ح ر قازاقستانداعى توتەنشە جانە وكىلەتتى ەلشىسى ەلباسى ن. نازاربايەۆتىڭ 27 جىل بويى ەكى مەملەكەتتىڭ دوستىق قارىم-قاتىناسىن نىعايتۋعا قوسقان زور ۇلەسى مەن ۇلگىلى سارا جولىن ءارى قاراي دا جالعاستىرۋ قاجەت ەكەنىن جەتكىزدى. ەلشى سونداي-اق، ينۆەستورلارعا قاتىستى ايتىلعان پىكىرمەن كەلىسەتىندىگىن جانە وسى باعىتتا جۇمىستار جاسالاتىندىعىن ايتتى. جيىن سوڭىندا وبلىس باسشىسى بۇل كەزدەسۋ ەكىجاقتى مادەني، ءبىلىم، الەۋمەتتىك ەكونوميكالىق سالانىڭ دامۋىنا سەپتىگىن تيگىزەرىنە سەنىم ءبىلدىردى.